«Փարիզյան համաձայնագրի ներքո Հայաստանի Հանրապետության 2023-2030 թվականների ազգային մակարդակով սահմանված գործողությունների իրականացման ծրագիրը, ֆինանսավորման ռազմավարությունն ու ներդրումային պլանը հաստատելու մասին» Կառավարության որոշման նախագիծ

Փարիզյան համաձայնագրի առանցքային դրույթները ներառում են կլիմայի փոփո­խու­թյան անբարենպաստ ազդեցություններին հարմարվելու կարողության բարձրացումը և կլիմայի փոփոխության նկատմամբ դիմակայունության խթանումը, ինչպես նաև ջերմոցային գազերի արտանետումների ցածր մակարդակի ապահովումն այնպես, որ բացասական ազդե­ցություն չունենան կայուն զարգացման և աղքատության կրճատման օրակարգերի վրա: Այս իմաստով, Կառավարությունը ամրագրել է, որ ԱՍԳ-ն հիմնված է կանաչ տնտեսություն սկզբունքի վրա և համատեղելի է Կայուն զարգացման նպատակների հետ, որոնք արտացոլված են Հայաստանի սոցիալական և տնտեսական զարգացման նպա­տակ­ներում: Միաժամանակ, ԱՍԳ-ն ձևակերպ­վել է այն ենթադրու­թյամբ, որ մեղմման և հարմարվողա­կանության գործողություններում կկիրառվի էկոհամա­կար­գային մոտե­ցումը՝ նախա­պատ­վու­թյունը տալով հավասարակշռված և համակցված գործողու­թյուն­ներին: Սա թույլ կտա տնտեսության համապատասխան ճյուղերում ներկա­ռուցել մեղմման գործո­ղությունները՝ նպաստելով տարածաշրջանային արդար համագոր­ծակ­ցությանը: ԱՍԳ թիրախի սահման­ման և իրագործման հիմքում դրված են ազգային և ոլորտային ռազմա­վա­րու­թյուն­ներով ամրագրված նպատակադրումներն ու հեռանկարային ծրագրերը:

ԱՍԳ իրականացման ֆինանսավորման ռազմավարության (Ռազմավարություն) նպատակն է ուղղորդել կլիմայական ֆինանսավորման արդյունավետ գնահատման, հավաքագրման, ընդլայնման և կիրառման հարցում՝ կյանքի կոչելու ԱՍԳ իրականացման ծրագիրը:

Ռազմավարությունը ներկայացնում է ֆինանսավորման դեռևս չօգտագործված միջոցների արդյունավետ հավաքագրման ներուժը առավելագույնին հասցնելու համար անհրաժեշտ գործողությունները՝ հասցեագրելով ՋԳ արտանետումների ոլորտները: Ամրագրված լինելով ազգային և ոլորտային ռազմավարություններով ու դրանց իրականացման ծրագրերով՝ ԱՍԳ սահմանված թիրախի իրագործումը զգալիորեն կախված է նախատեսված գործողություն­ների ու ծրագրերի իրականացման ֆինանսական բաղադրիչի ընտրության գործընթացից:

Կլիմայական ֆինանսավորումը վերաբերում է պետական, մասնավոր և այլընտրանքային ազգային կամ միջազգային աղբյուրներին և ուղղվում է՝ աջակցելու կլիմայի փոփոխության մեղմման և հարմարվողականության միջոցառումներին:

Ներդրումային ծրագրերի շրջանակը ձևավորվել է հետևյալ սկզբունքների հիման վրա.

• Համապատասխանեցում երկրի երկարաժամկետ ռազմավարական տեսլա­կա­նի, մշակվող քաղաքականության ակնկալվող արդյունքների, կլիմայի փոփո­խության մեղմման և հարմարվողականության առաջնահերթությունների հետ:
• Փաստահեն որոշումների կայացման համար անհրաժեշտ կլիմայական բովանդակության ձևավորում և առավելագույնս հասանելի կլիմայական տվյալների օգտագործում:
• Ֆինանսավորման հնարավոր գործընկերների, ինչպես նաև պետական կառա­վար­ման մարմինների, մասնավոր կազմակերպու­թյունների և ոլորտային փորձագետների մոտեցումներից առավելագույնս արտացոլում:
• Նախագծի իրականացման ֆինանսական միջոցների, այդ թվում՝ ակնկալվող եկամուտների և ներդրումների գումարների ներկայացում:
• Հարակից օգուտների, ներառյալ՝ սոցիալական և տնտեսական դիտարկում:
• Գենդերային պատասխանատվություն, գենդերային հավասարության և հավասար մասնակցության խթանում: