«ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ՀԱՄԱՐ ՀԱՍԱՐԱԿԱԿԱՆ ՆՇԱՆԱԿՈՒԹՅԱՆ ՄԻ ՇԱՐՔ ՕԲՅԵԿՏՆԵՐԻ ՇԱՀԱԳՈՐԾՄԱՆ ՄԱՏՉԵԼԻՈՒԹՅՈՒՆՆ ՈՒ ԱՆՁՆԱԳՐԱՎՈՐՈՒՄՆ ԱՊԱՀՈՎՈՂ ՄԻՋՈՑԱՌՈՒՄՆԵՐԻ ԾՐԱԳԻՐԸ, ԺԱՄԱՆԱԿԱՑՈՒՅՑՆ ՈՒ ՕԲՅԵԿՏՆԵՐԻ ՑԱՆԿԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2022 ԹՎԱԿԱՆԻ ՄԱՐՏԻ 3-Ի N 250-Լ ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

«      »______________ 2024 թվականի N ___ - Լ

ՀԱՇՄԱՆԴԱՄՈՒԹՅՈՒՆ  ՈՒՆԵՑՈՂ  ԱՆՁԱՆՑ ՀԱՄԱՐ ՀԱՍԱՐԱԿԱԿԱՆ  ՆՇԱՆԱԿՈՒԹՅԱՆ ՄԻ ՇԱՐՔ ՕԲՅԵԿՏՆԵՐԻ  ՇԱՀԱԳՈՐԾՄԱՆ ՄԱՏՉԵԼԻՈՒԹՅՈՒՆՆ ՈՒ ԱՆՁՆԱԳՐԱՎՈՐՈՒՄՆ ԱՊԱՀՈՎՈՂ ՄԻՋՈՑԱՌՈՒՄՆԵՐԻ ԾՐԱԳԻՐԸ, ԺԱՄԱՆԱԿԱՑՈՒՅՑՆ ՈՒ ՕԲՅԵԿՏՆԵՐԻ ՑԱՆԿԸ ՀԱՍՏԱՏԵԼՈՒ  ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2022 ԹՎԱԿԱՆԻ ՄԱՐՏԻ 3-Ի N 250-Լ ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

   Հիմք ընդունելով «Քաղաքաշինության մասին» օրենքի 10-րդ հոդվածի 1-ին մասի  3-րդ կետը, 10.1-ին հոդվածի 3-րդ մասի 20-րդ կետը, «Հաշմանդամություն ունեցող անձանց իրավունքների մասին» օրենքի 6-րդ հոդվածի 4-րդ մասի 2-րդ կետը, 16-րդ հոդվածի 2-րդ մասը, 17-րդ հոդվածի 1-ին մասի 3-րդ կետը և «Նորմատիվ իրավական ակտերի մասին» օրենքի 37-րդ հոդվածը՝  Հայաստանի Հանրապետության կառավարությունը որոշում է.

1. Հաստատել՝

1) հասարակական նշանակության մի շարք օբյեկտների  ցանկը՝ համաձայն N 1 հավելվածի.

2) հաշմանդամություն ունեցող  անձանց համար հասարակական  նշանակության մի շարք օբյեկտների  շահագործման մատչելիությունն ու անձնագրավորումն ապահովող միջոցառումների ծրագիրը՝ համաձայն N 2 հավելվածի.

3) հաշմանդամություն ունեցող  անձանց համար հասարակական  նշանակության մի շարք օբյեկտների  շահագործման մատչելիությունն ու անձնագրավորումն ապահովող միջոցառումների ժամանակացույցը (այսուհետ՝ միջոցառումների ժամանակացույց)՝ համաձայն N 3 հավելվածի:

2. Հանձնարարել՝

1) Հայաստանի Հանրապետության տարածքային կառավարման և ենթակառուցվածքների նախարարին, տարածքային կառավարման և տեղական ինքնակառավարման մարմինների ղեկավարներին, Երևանի քաղաքապետին (առաջարկությամբ), սույն որոշումն ուժի մեջ մտնելու օրվանից, երկամսյա ժամկետում, սահմանել սույն որոշմամբ հաստատված N1 և N3 Հավելվածներով (ՄԱՍ II) ՀՀ մարզերում և Երևան քաղաքում նախատեսված միջոցառումների պատասխանատուներ, նախաձեռնել աշխատանքների և ծառայությունների ձեռքբերման նախապատրաստական գործընթաց,

2) Հայաստանի Հանրապետության տարածքային կառավարման և տեղական ինքնակառավարման մարմինների ղեկավարներին (Երևանի քաղաքապետին, առաջարկությամբ) մինչև յուրաքանչյուր եռամսյակին հաջորդող ամսվա 10-ը, ՀՀ տարածքային կառավարման և ենթակառուցվածքների նախարարություն և ՀՀ քաղաքաշինության կոմիտե ներկայացնել տեղեկատվություն ծրագրի (ՄԱՍ II) կատարման ընթացքի վերաբերյալ:

3. Հայաստանի Հանրապետության քաղաքաշինության կոմիտեի նախագահին՝

1) համակարգել սույն որոշման N1 և N3 Հավելվածներով (ՄԱՍ I, ՄԱՍ II) Երևան քաղաքում միջոցառումների ժամանակացույցով նախատեսված ծառայությունների և աշխատանքների ձեռքբերման շարունակական գործընթացը,

2) մինչև յուրաքանչյուր եռամսյակին հաջորդող ամսվա 20-ը, ՀՀ վարչապետի աշխատակազմ ներկայացնել ամփոփ տեղեկատվություն ՀՀ մարզերում և Երևան քաղաքում ծրագրի (ՄԱՍ I, ՄԱՍ II) իրագործման ընթացքի վերաբերյալ:

4. Սույն որոշման Հավելված N1-ով հաստատված ցանկում ընգրկված հասարակական նշանակության մի շարք օբյեկտների շահագործման մատչելիության ապահովման և անձնագրավորման արդյունքում գրանցման ենթակա գույք առաջանալու դեպքում դրանց նկատմամբ իրավունքի պետական գրանցման հետ կապված ծախսերը կատարվում են պետական այն մարմինների կողմից, որոնց ամրացված են այդ անշարժ գույքերը:

5. Հայաստանի Հանրապետության կառավարության 2022 թվականի մարտի 3-ի «Նախագծային հատուկ լուծումներով համալրման ենթակա մի շարք կարևորագույն նշանակության օբյեկտների ցանկը և դրանց շահագործման մատչելիությունն ապահովող միջոցառումների ծրագիրը հաստատելու մասին» N 250-Լ որոշումն ուժը կորցրած ճանաչել:

6. Սույն որոշումն ուժի մեջ է մտնում հրապարակմանը հաջորդող օրվանից: