Հիշել նախագիծը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՕՐԵՆՍԳՐՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հիմնավորում

«Հայաստանի Հանրապետության հարկային օրենսգրքում լրացում կատարելու մասին» ՀՀ օրենքի նախագծի վերաբերյալ

 

1. Իրավական ակտի անհրաժեշտությունը (նպատակը). Նախագծի նպա­տակը առևտրա­­­կան (առք ու վաճառքի) գործունեությամբ զբաղ­վող շահութահարկ վճա­րողների մոտ խոտան ապրանքի տեսքով ձևավորված որակական կորուստները համա­­­­խառն եկամ­տից նվա­զեց­նելու հնարավորությունների ընձեռումն է:

2. Կարգավորման հարաբերությունների ներկա վիճակը և առկա խնդիրները. Հար­կա­­յին օրենս­­­գրքի (այսուհետ՝ Օրենսգիրք) 122-րդ հոդվածի 3-րդ մասի համաձայն՝ գույքի՝ փաս­տա­թղթերով հիմնավորված որակական կորուստը համախառն եկամտից նվազեցվում է այդ կորստի տեղի ունենալու կամ այդ կորուստը հայտնաբերելու հարկային տարվա համա­խառն եկա­մտի մեկ տոկոսը չգերազանցող չափով՝ տվյալ հարկային տարվա ընթացքում: Նույն մասի կիրա­ռության իմաստով՝ գույքի որակական կորուստ է համարվում պիտանիության (պահ­պան­ման) ժամկետ ունեցող ապրանքի պիտանիության (պահպանման) ժամկետի սպառման կամ ժամա­նակի ընթացքում մաշվածության և (կամ) քայքայման արդյունքում գույքի սպառողական հատ­կանիշների անկման կամ Օրենսգրքով կամ Հայաստանի Հանրապետության օրենքներով սահ­մանված դեպքերում ապրանքի մատակարարման արգելքների կամ սահմանափակումների առա­ջացման արդյունքում շրջանառությունից հանվող գույքը կամ ապրանքը:

Խնդիրը կայանում է նրանում, որ առևտրա­յին գործունեությամբ զբաղվող տնտեսավարող սուբ­յեկտների մոտ առևտրա­կան (առք ու վաճառքի) գոր­­ծունեության նպատակով ձեռք բերված խոտան ապ­րանքների մասով ձևավորված որակական կորուստները համախառն եկամտից նվա­զեցնելու նպատակով գործող հարկային օրենսդրությամբ համապատասխան կար­գա­վո­րում­ներ նախատեսված չեն:

3. Առկա խնդիրների առաջարկվող լուծումները. Նախագծով առաջարկվում է սահ­մա­նել, որ որակական կորուստ է համարվում նաև առևտրա­կան (առք ու վաճառքի) գոր­­ծու­նեու­թյան նպատակով ձեռք բերված խոտան ապ­րանքը, եթե Օրենսգրքի 122-րդ հոդվածի 6-7-րդ մասերին համապատասխան՝ որպես այլ կորուստ չի նվա­զեց­վում համախառն եկամտից:

4. Կարգավորման առարկան. Նախագծի կարգավորման առարկան առևտրա­­կան (առք ու վաճառքի) գործունեության մասով շահութահարկ վճարողի հարկման բազայի որոշման նպա­տակով համախառն եկամտից նվազեցվող՝ գույքի՝ փաստաթղթերով հիմնավորված որա­կա­կան կորուստներն են:

5. Նախագծի մշակման գործընթացում ներգրավված ինստիտուտները և անձինք. Նախա­­գի­ծը մշակվել է ՀՀ ֆինանսների նախարարության կող­­մից:

6. Իրավական ակտի կիրառման դեպքում ակնկալվող արդյունքը. Նախագծի ընդուն­­­­­­­­­­­­­ման արդ­յուն­­քում ակնկալվում է հնարավորություն ընձեռել շահութահարկ վճա­րողներին առևտրա­­­կան (առք ու վաճառքի) գոր­­ծու­նեու­թյան նպատակով ձեռք բերված խոտան ապ­րանքը նվազեցնել համա­­խառն եկամ­տից:

Միաժամանակ, նախագծի ընդունումը լրացուցիչ ֆինանսական միջոցների անհրա­ժեշ­տու­թյուն չի պահանջում, իսկ դրա ընդուն­­մամբ պայմանավորված՝ պե­տա­­կան բյուջեի եկա­­մուտ­­ների էական նվա­­զե­­ցում կամ ծախ­­­­սերի ավելա­ցում տեղի չի ունենա:

Բացի այդ, նախագծի ընդունմամբ պայմանավորված՝ համապատասխան լրացումներ կատա­­րելու անհրաժեշտություն կառաջանա նաև ՀՀ կառավարության 2017 թվականի հոկ­տեմ­բերի 5-ի  N 1261-Ն որոշման մեջ:

7. Կապը ռազմավարական փաստաթղթերի հետ. Հայաստանի վերափոխման ռազ­մա­վա­րություն 2050, Կառավարության 2021-2026թթ. ծրագիր, ոլորտային և/կամ այլ ռազ­մա­վա­րություններ

Նախագիծը բխում է Կառավարության 2021-2026 թվականների ծրագրի 6.8-րդ «Հարկա­բյու­ջետային քաղաքականություն» մասով սահմանված քաղաքականության ուղղություններից, ըստ որի հարկային օրենսդրության բարելավման միջոցով կարևորվելու է ներդրողների համար արդար, ընկալելի և կանխատեսելի միջավայրի ձևավորումը:

  • Քննարկվել է

    16.12.2021 - 31.12.2021

  • Տեսակ

    Օրենք

  • Ոլորտ

    Տնտեսական

  • Նախարարություն

    Ֆինանսների նախարարություն

Ուղարկել նամակ նախագծի հեղինակին

Ձեր ուղարկած առաջարկը կտեղադրվի կայքում 10 աշխ. օրվա ընթացքում

Չեղարկել

Դիտումներ` 4114

Տպել

Առաջարկներ`

"Զիգզագ" ՍՊԸ

24.12.2021

Հարգելի գործընկերներ, «ՀՀ հարկային օրենսգրքում լրացում կատարելու մասին» ՀՀ օրենքի նախագծի վերաբերյալ ներկայացնում ենք հետևյալ կարծիք / առաջարկությունը։ 1․ ՀՀ հարկային օրենսգրքի (այսուհետ՝ «Օրենսգիրք») 122-րդ հոդվածի 3-րդ մասում «շրջանառությունից հանվող գույքը կամ ապրանքը» բառերից հետո առաջարկվել է լրացնել «ինչպես նաև առևտրա¬կան (առք ու վաճառքի) գոր¬¬ծունեության նպատակով ձեռք բերված խոտան ապրանքը, եթե սույն հոդվածի 6-7-րդ մասե¬րին համապատասխան՝ որպես այլ կորուստ չի նվազեցվում համախառն եկամտից» բառերը։ Ներկայացված ձևակերպումը նշանակում է, որ նվազեցվել կարող են միա՛յն ձեռք բերված ապրանքների, և միա՛յն ի սկզբանե խոտան ապրանքների գծով կորուստները։ Այս պարագայում կարգավորումից դուրս են մնում՝ • ի սկզբանե առանց խոտանի, սակայն շահագործման ընթացքում խոտանված ապրանքները, • գնորդին վաճառված՝ շահագործման ընթացքում խոտանված ապրանքները, որոնք ենթակա չեն վերանորոգման և վաճառողի կողմից ետ են ընդունվում՝ փոխարինվելով նոր ապրանքով։ Նկարագրված դեպքերը գերակշռող են՝ ի տարբերություն ձեռքբերված, ի սկզբանե խոտան հանդիսացող ապրանքների դեպքերի, որոնք նշվել են նախագծում, որի պարագայում առաջարկում ենք Օրենսգրքի 122-րդ հոդվածի 3-րդ մասում լրացումը կատարել հետևյալ խմբագրությամբ՝ «շրջանառությունից հանվող գույքը կամ ապրանքը, ինչպես նաև առևտրա¬կան (առք ու վաճառքի) գոր¬¬ծունեության նպատակով ձեռք բերված խոտան և/կամ հետագայում խոտանված և/կամ որպես խոտան հաճախորդից ետ ընդունված ապ¬րանքը։»։ 2․ Միևնույն ժամանակ, առաջարկում ենք նույն լրացումից հանել «եթե սույն հոդվածի 6-7-րդ մասե-րին համապատասխան՝ որպես այլ կորուստ չի նվազեցվում համախառն եկամտից» բառերը, հետևյալ հիմնավորմամբ․ լրացման մեջ ներառված այս ձևակերպումն, ըստ էության, նշանակում է, որ 122-րդ հոդվածի 3-րդ մասին համապատասխան խոտան ապրանքի գծով կորստի յուրաքանչյուր նվազեցման դեպքում տնտեսվարողը, ըստ անհրաժեշտության, պետք է միանշանակորեն հիմնավորի, որ բացակայում էին այդ կորուստը 6-7-րդ մասերին համապատասխան նվազեցնելու հիմքերը։ Դա էապես բարդացնում է փոփոխության գործնական կիրառելիությունը։ Միաժամանակ, քանի որ նույն ապրանքի գծով կորստի նվազեցումը համախառն եկամտից կարող է կատարվել մեկ անգամ, տրամաբանական է, որ եթե առկա են տվյալ ապրանքի գծով կորստի նվազեցումը 6-7-րդ մասերին համապատասխան իրականացնելու հիմքերը, ապա տնտեսվարողը կկատարի հենց այդ նվազեցումը՝ ապրանքի ամբողջ արժեքի չափով, այլ ոչ թե կկիրառի 3-րդ մասով առաջարկվող նվազեցման հնարավորությունը, որի դեպքում գործում է տարեկան շրջանառության 1 տոկոսի սահմանափակում։ «Զիգզագ» ՍՊԸ

Տեսնել ավելին