04.06.2025
Եթե գործառույթների խանգարման աստիճանը որոշելու է ԲԿ-ի կամ ԿԲՀ-ի բժիշկը, թե տվյալ խնդիրը զինակոչիկին ինչքանով է խանգարում, ապա մեծամասամբ սխալ եզրակացություններ են կազմվելու և ներառելու են "չունեն կլինիկական դրսևորումներ, չեն հանգեցնում գործառույթների խանգարման, ագրեսիվ չեն, չեն պահանջում բուժում" տեքստը։ Սեփական փորձից կարող եմ ասել, որ բժիշկը կկանգնի զինակոչիկի առաջ ու կասի՝ "5000 զինակոչիկ կարող է գալ ու ասել այսինչ տեղս ցավում է, վազելիս խանգարում է", կամ կասի՝ "տվյալ կիստան պետք է չցավի"։ Շատ հաճախ զինակոչիկների գանգատները անտեսվում են, համարվում են "խաբեության փորձ" զինակոչիկի կողմից։ Ինչպես նաև, որպես կանոն, ԲԿ-ներ զինկոմիսարիատի ուղեգրով ներկայացած զինակոչիկների հետազոտությունները կատարվում են կա՛մ անհրաժեշտ մասնագիտացումը չունեցող կա՛մ ամենաքիչ աշխատանքային փորձ ունեցող բժշկի կողմից։ Այս պատճառով հետազոտության սխալ արդյունքների քանակը նշանակալիորեն աճում է։ Առաջարկում եմ փոփոխությունն այսպես ընդունելու պարագայում հետամուտ լինել զինակոչիկների ԲԿ-ներում կատարվող հետազոտություններին, որպեսզի նրանք հետազոտվեն լավագույն ԲԿ-ներում և լավագույն մասնագետների կողմից, ի վերջո, զինակոչիկը ժամանակակից բանակի կառուցման համար կարևոր քաղաքացի է։
