«ՏԱՐԵՑ ԿԱՄ ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ԽՆԱՄՔԻ ՏՐԱՄԱԴՐՄԱՆ ԿԱՐԳԵՐԻՑ ԵՎ ՊԱՅՄԱՆՆԵՐԻՑ ԲԽՈՂ ԸՆԹԱՑԱԿԱՐԳԵՐԸ ԵՎ ՕՐԻՆԱԿԵԼԻ ՁԵՎԱԹՂԹԵՐԸ ՀԱՍՏԱՏԵԼՈՒ ՄԱՍԻՆ» ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐԻ ՀՐԱՄԱՆԻ ՆԱԽԱԳԻԾ

Հավելված 1

Հայաստանի Հանրապետության

աշխատանքի և սոցիալական հարցերի

նախարարի 2025 թվականի

դեկտեմբերի «___»-ի N ____-Ն հրամանի

ԸՆԹԱՑԱԿԱՐԳԵՐ

ՏԱՐԵՑ ԿԱՄ ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ԽՆԱՄՔԻ ՏՐԱՄԱԴՐՄԱՆ ԿԱՐԳԵՐԻՑ ԵՎ ՊԱՅՄԱՆՆԵՐԻՑ ԲԽՈՂ 

I. ՏՆԱՅԻՆ ՊԱՅՄԱՆՆԵՐՈՒՄ ՏԱՐԵՑ ԿԱՄ ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ԽՆԱՄՔԻ ՏՐԱՄԱԴՐՄԱՆ ԸՆԹԱՑԱԿԱՐԳԸ

1.   Սույն հավելվածի առաջին բաժինը կարգավորում է տնային պայմաններում տարեց կամ հաշմանդամություն ունեցող անձանց տրամադրվող խնամքի կարգերից և պայմաններից բխող հարաբերությունները։

2.    Տնային պայմաններում խնամք տրամադրվում է խնամք հայցող անձի, նրա ներկայացուցչի կամ խնամակալի դիմումի հիման վրա՝ Հավելված 2-ի Ձև 1-ի համաձայն։ Դիմումը ներկայացվում է Միասնական սոցիալական ծառայության՝ խնամք հայցող անձի բնակության վայրի տարածքը սպասարկող տարածքային կենտրոն (այսուհետ՝ տարածքային կենտրոն)։

3.    Դիմումը և պահանջվող փաստաթղթերը ստանալուց հետո տասն աշխատանքային օրվա ընթացքում տարածքային կենտրոնի սոցիալական աշխատողը կատարում է տնայց՝ խնամք հայցող անձի և նրա ընտանիքի սոցիալական կարիքների գնահատման նպատակով։ Սոցիալական դեպքի վարման ընթացքում բացի համալիր գնահատումից, որն իրականացվում է Հայաստանի Հանրապետության աշխատանքի և սոցիալական հարցերի նախարարի 2025 թվականի հուլիսի 23-ի N 75-Ն հրամանով հաստատված կարգի և հարցաշարերի համաձայն, իրականացվում է նաև առանձնահատուկ կարիքների գնահատում` տարեց կամ հաշմանդամություն ունեցող անձի դեպքում սույն հրամանի Հավելված 2-ի Ձև 2-ի համաձայն, իսկ հաշմանդամություն ունեցող երեխաների դեպքում՝ Հայաստանի Հանրապետության աշխատանքի և սոցիալական հարցերի նախարարի 2025 թվականի հուլիսի 23-ի N 75-Ն հրամանով հաստատված կարգի և հարցաշարերի համաձայն։ Տնայցի արդյունքում կազմված եզրակացությունը՝ խնամք հայցող անձին խնամք տրամադրելու կամ խնամքի տրամադրումը մերժելու մասին, ներկայացվում է տարածքային կենտրոնի տնօրենին։

4.    Տարածքային կենտրոնի տնօրենը, պահանջվող փաստաթղթերն ու սույն հավելվածի 3-րդ կետում նշված եզրակացությունը ստանալուց հետո երկու աշխատանքային օրվա ընթացքում ընդունում է որոշում` խնամք հայցող անձին խնամք տրամադրելու մասին՝ Հավելված 2-ի Ձև 3-ի համաձայն, կամ խնամքի տրամադրումը մերժելու մասին՝ Հավելված 2-ի Ձև 4-ի համաձայն՝ նշելով խնամքի համապատախան տեսակը, և այդ որոշումը ներկայացնում է Միասնական սոցիալական ծառայություն։

5.    Տարածքային կենտրոնից ստացված որոշման և կից փաստաթղթերի հիման վրա Միասնական սոցիալական ծառայությունն իրականացնում է խնամք հայցող անձի հաշվառում և ազատ տեղերի առկայության դեպքում այդ մասին մեկ աշխատանքային օրվա ընթացքում տեղեկացնում է համապատասխան հերթացուցակում առաջին համարը զբաղեցնող խնամք հայցող անձի խնամքի տրամադրման վերաբերյալ որոշում կայացրած տարածքային կենտրոնին և տնային պայմաններում խնամք տրամադրող համապատասխան կազմակերպությանը (այսուհետ՝ կազմակերպություն)։

6.   Տարածքային կենտրոնը, Միասնական սոցիալական ծառայությունից ստանալով սույն հավելվածի 5-րդ կետում նշված տեղեկատվությունը, մեկ աշխատանքային օրվա ընթացքում խնամք հայցող անձին տրամադրում է ուղեգիր՝ Հավելված 2-ի Ձև 5-ի համաձայն։

7.    Խնամք հայցող անձն ուղեգիրը ստանալու օրվանից սկսած յոթ աշխատանքային օրվա ընթացքում այն պետք է ներկայացնի համապատասխան կազմակերպություն։

8.   Խնամք հայցող անձը տնային պայմաններում խնամք ստացող շահառուների ցուցակում ընդգրկվում է կազմակերպության ղեկավարի հրամանով՝ Հավելված 2-ի Ձև 6-ի համաձայն։

9.   Սույն հրամանի  8-րդ կետով նշված հրամանի ընդունումից հետո կազմակերպության՝ համապատասխան լիազորություններ ունեցող աշխատողը շահառուի մասին տվյալները գրանցում է կազմակերպության հաշվառման մատյանում՝ Հավելված 2-ի Ձև 7-ի համաձայն։

10. Տնային պայմաններում խնամք ստացող շահառուների ցուցակում ընդգրկվելու հրամանից հետո կազմակերպության ղեկավարի և խնամք հայցող անձի, նրա ներկայացուցչի կամ խնամակալի միջև կնքվում է տնային պայմաններում խնամքի տրամադրման վերաբերյալ պայմանագիր՝ Հավելված 2-ի Ձև 8-ի համաձայն։

11.  Այն դեպքում, երբ  շահառուն հայերենին չի տիրապետում, կնքվում է երկլեզու պայմանագիր՝ և՛ հայերենով, և՛ այն լեզվով, որը հասկանալի է  շահառուին։ Տեսողական խնդիրներ ունեցող անձի պարագայում պետք է նախատեսվի բրայլյան գրերի միջոցով պայմանագիրը կնքելու հնարավորություն:

12.  Կազմակերպության՝ համապատասխան լիազորություններ ունեցող աշխատողը նոր ընդունված շահառուի մասին տվյալները գրանցում է սոցիալական պաշտպանության ծրագրերում ընդգրկված և խնամք ստացող շահառուների հաշվառման տեղեկատվական համակարգում (այսուհետ՝ տեղեկատվական համակարգ)։

13. Տնային պայմաններում խնամք ստացող յուրաքանչյուր շահառուի համար կազմակերպության սոցիալական աշխատողը կամ համապատասխան լիազորություններ ունեցող այլ աշխատող լրացնում է հաշվառման քարտ՝ Հավելված 2-ի Ձև 9-ի համաձայն։

14.  Շահառուի համաձայնության դեպքում կարող է իրականացվել շահառուի ինքնագնահատում՝ Հավելված 2-ի Ձև 10-ի համաձայն։

15.  Շահառուի կողմից ուղեգիրը կազմակերպություն ներկայացնելուց հետո յոթ աշխատանքային օրվա ընթացքում կազմակերպության բազմամասնագիտական խումբը՝ տեղեկատվական համակարգում շահառուի գրանցումից հետո իրականացնում է շահառուի սոցիալական կարիքների գնահատում՝ Հավելված 2-ի Ձև 11-ի համաձայն։

16. Սույն հավելվածի 15-րդ կետում նշված գնահատման արդյունքում կազմվում է  շահառուի անհատական սոցիալական ծրագիրը՝ Հավելված 2-ի Ձև 12-ի համաձայն:

17.  Տնային պայմաններում խնամքի տրամադրումը կարող է դադարեցվել շահառուի, նրա ներկայացուցչի կամ խնամակալի դիմումի հիման վրա՝ Հավելված 2-ի Ձև 13-ի համաձայն:

18. Տնային պայմաններում խնամքի տրամադրման դադարեցումը ձևակերպվում է կազմակերպության ղեկավարի հրամանով՝ Հավելված 2-ի Ձև 14-ի համաձայն:

19. Տնային պայմաններում խնամք ստացող  շահառուների նկատմամբ բռնության ենթադրյալ կամ հաստատված բոլոր դեպքերը գրանցվում են համապատասխան մատյանում՝ Հավելված 2-ի Ձև 15-ի համաձայն։

20. Անկողնային շուրջօրյա խնամքի կարիք ունեցող անձանց համար, մինչև վերջիններիս շուրջօրյա խնամքի կենտրոն տեղավորելը, Միասնական սոցիալական ծառայության կողմից պարզեցված ընթացակարգով կարող է կազմակերպվել տնային խնամքի տրամադրում՝ ելնելով խնամք հայցող անձի ցանկությունից և խնամքի տրամադրման հրատապությունից՝ խնամք հայցող անձի, նրա ներկայացուցչի կամ խնամակալի դիմումի հիման վրա՝ Հավելված 2-ի Ձև 16-ի համաձայն։