ԿՈՌՈՒՊՑԻԱՅԻ ԿԱՆԽԱՐԳԵԼՄԱՆ ՀԱՆՁՆԱԺՈՂՈՎԻ 2022 ԹՎԱԿԱՆԻ ՀՈՒԼԻՍԻ 22-Ի N 04-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

ԿՈՌՈՒՊՑԻԱՅԻ ԿԱՆԽԱՐԳԵԼՄԱՆ ՀԱՆՁՆԱԺՈՂՈՎԻ 2022 ԹՎԱԿԱՆԻ ՀՈՒԼԻՍԻ 22-Ի N 04-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ ՈՐՈՇՄԱՆ ՆԱԽԱԳԾԻ

 1․ Ընթացիկ իրավիճակը և իրավական ակտի ընդունման անհրաժեշտությունը.

2020 թվականի դեկտեմբերի 29-ին ընդունված «Կուսակցությունների մասին» սահմանադրական օրենքում և հարակից օրենքներում փոփոխություններ և լրացումներ կատարելու մասին օրենսդրական փաթեթով սահմանվել է, որ կուսակցության տարեկան հաշվետվության ձևը, դրա լրացման և հրապարակման կարգը, հրապարակման ոչ ենթակա տվյալների ցանկը, ինչպես նաև տարեկան հաշվետվությունը Կոռուպցիայի կանխարգելման հանձնաժողով ներկայացնելու կարգը սահմանում է Կոռուպցիայի կանխարգելման հանձնաժողովը։

Կոռուպցիայի կանխարգելման հանձնաժողովի «Կուսակցության տարեկան հաշվետվության ձևը, դրա լրացման և հրապարակման կարգը, հրապարակման ոչ ենթակա տվյալների ցանկը, ինչպես նաև տարեկան հաշվետվությունը Կոռուպցիայի կանխարգելման հանձնաժողով ներկայացնելու կարգը սահմանելու մասին» 2022 թվականի հուլիսի 22-ի N 04-Ն որոշման մեջ Հանձնաժողովի 2025 թվականի հոկտեմբերի 27-ի N 04-Ն որոշմամբ (ուժի մեջ է մտել 2025 թվականի նոյեմբերի 7-ից) մի շարք փոփոխություններ և լրացումներ են կատարվել կուսակցության տարեկան հաշվետվության ձևում, ինչի արդյունքում  անհրաժեշտություն է առաջացել կատարել դրանից բխող փոփոխություններ նույն որոշման Հավելված N 3-ով հաստատված կուսակցության տարեկան հաշվետվության հրապարակման ոչ ենթակա տվյալների ցանկում։

2․ Առաջարկվող կարգավորման բնույթը.

Որոշման նախագծով առաջարկվում է Կուսակցությունների տարեկան հաշվետվության՝ «Գույք», «Պարտավորություններ», «Ծանոթագրություն 1», «Ծանոթագրություն 2», «Ծանոթագրություն 3», «Ծանոթագրություն 4» և «Ծանոթագրություն 5» թերթերում ներառված հրապարակման ոչ ենթակա տվյալներում կատարել փոփոխություններ և լրացումներ։

Միաժամանակ, «Կոռուպցիայի կանխարգելման հանձնաժողովի 2022 թվականի հուլիսի 22-ի N 04-ն որոշման մեջ փոփոխություններ կատարելու մասին» 2025 թվականի հոկտեմբերի 27-ին որոշմամբ ավելացվել է «Չթույլատրված աղբյուրներից ստացված նվիրատվություններ» և «Ֆիզիկական անձանցից ստացված՝ օրենքով սահմանված չափը գերազանցող և օրենքով սահմանված ժամկետում չվերադարձված կամ պետական բյուջե չփոխանցված, ինչպես նաև չթույլատրված աղբյուրներից ստացված և օրենքով սահմանված ժամկետում պետական բյուջե չփոխանցված նվիրատվություններ» վերտառությամբ աղյուսակներ և «Ծանոթագրություն 6» վերտառությամբ առանձին թերթ, որը ընդգրկում է «6.1 Այլ մուտքերի բացվածք» և «6.2 Այլ ելքերի բացվածք» վերտառությամբ աղյուսակները, հետևաբար անհրաժեշտություն է առաջացել նաև սահմանել այդ աղյուսակներում լրացվող տվյալների հրապարակման ոչ ենթակա լինելը:

3. Կապը ռազմավարական փաստաթղթերի հետ․

Նախագիծը չի բխում ռազմավարական փաստաթղթերից և նպատակ է հետապնդում ապահովել «Կոռուպցիայի կանխարգելման հանձնաժողովի 2022 թվականի հուլիսի 22-ի N 04-ն որոշման մեջ փոփոխություններ կատարելու մասին» 2025 թվականի հոկտեմբերի 27-ի որոշման դրույթների կիրարկումը։

4․ Նախագծի մշակման գործընթացում ներգրավված ինստիտուտները, անձինք.

Նախագիծը մշակվել է Կոռուպցիայի կանխարգելման հանձնաժողովի կողմից:

5․ Պետական կամ տեղական ինքնակառավարման մարմնի բյուջեում եկամուտների և ծախսերի էական ավելացման կամ նվազեցման վերաբերյալ.

Նախագծի ընդունմամբ պետական և տեղական ինքնակառավարման մարմնի բյուջեում եկամուտների և ծախսերի ավելացում կամ նվազեցում չի նախատեսվում: