Բարի գալուստ կայքի թարմացված տարբերակ
    Հիշել նախագիծը

    «Հայաստանի Հանրապետության կառավարության 2018 թվականի հուլիսի 19-ի N 814-Ն որոշման մեջ փոփոխություն կատարելու մասին» Կառավարության որոշման նախագիծ

    ՆԱԽԱԳԻԾ

     

     

     

    ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ  ԿԱՌԱՎԱՐՈՒԹՅՈՒՆ

     

    Ո  Ր  Ո  Շ  Ո Ւ  Մ

     

    2025 թվականի N          -Ն

     

     

    ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2018 ԹՎԱԿԱՆԻ ՀՈՒԼԻՍԻ 19-Ի N 814-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

     

     

     Ղեկավարվելով «Նորմատիվ իրավական ակտերի մասին» օրենքի 33-րդ և 34-րդ հոդվածներով` Հայաստանի Հանրապետության կառավարությունը    ո ր ո շ ու մ     է.

    1. Հայաստանի Հանրապետության կառավարության 2018 թվականի հուլիսի 19-ի «Ծառայողական քննություն անցկացնելու կարգը սահմանելու մասին» N 814-Ն որոշմամբ սահմանված հավելվածը շարադրել նոր խմբագրությամբ՝ համաձայն հավելվածի:
    2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից, բացառությամբ սույն որոշմամբ սահմանված հավելվածի 21-րդ, 39-րդ կետերի, որոնք ուժի մեջ են մտնում 2026 թվականի հունվարի 1-ից։
    3. Սույն որոշումը չի տարածվում մինչև սույն որոշումն ուժի մեջ մտնելը նշանակված ծառայողական քննությունների վրա։

     

     

     

     

    Հայաստանի Հանրապետության
    վարչապետ

    Ն. Փաշինյան

     

     

     

    Հավելված ՀՀ կառավարության

    2025 թվականի ---ի  N -Ն որոշման

     

    «Հավելված

    ՀՀ կառավարության 2018 թվականի

    հուլիսի 19-ի N 814-Ն որոշման 

     

     

    Կ Ա Ր Գ

     ԾԱՌԱՅՈՂԱԿԱՆ ՔՆՆՈՒԹՅՈՒՆ ԱՆՑԿԱՑՆԵԼՈՒ

     

    1. 1. ԸՆԴՀԱՆՈՒՐ ԴՐՈՒՅԹՆԵՐ

     

    1. Սույն իրավական ակտով սահմանվում է «Քաղաքացիական ծառայության մասին» օրենքի (այսուհետ՝ օրենք) 2-րդ հոդվածի 1-ին մասով նախատեսված մարմիններում (այսուհետ՝ համապատասխան մարմին) ծառայողական քննություն անցկացնելու կարգը (այսուհետ՝ կարգ):
    2. Ծառայողական քննությունը քաղաքացիական ծառայողի ծառայողական պարտականությունների և (կամ) բարեվարքության և (կամ) նրա գործունեությանն առնչվող և (կամ) աշխատանքային հարաբերությունների հետ կապված հարցերի ուսումնասիրությունն է։
    3. Ծառայողական քննությունն անցկացվում է էլեկտրոնային եղանակով՝ քաղաքացիական ծառայության տեղեկատվական հարթակի միջոցով (այսուհետ՝ էլեկտրոնային եղանակ):
    4. Ծառայողական քննության խնդիրն է ապահովել՝

    1) «Հանրային ծառայության մասին» օրենքի 12-րդ և 22-րդ հոդվածներով նախատեսված սկզբունքների իրականացումը.

    2) քաղաքացիական ծառայողի գործունեությանն առնչվող և (կամ) աշխատանքային հարաբերությունների մասով առաջացած խնդիրների պարզաբանումը.

         3) քաղաքացիական ծառայողի կողմից կատարված կարգապահական և (կամ) քաղաքացիական ծառայողի վարքագծի կանոնները խախտելու և (կամ) հանրային ծառայողի նկատմամբ կիրառվող այլ սահմանափակումները չպահպանելու և (կամ) շահերի բախման կանոնները խախտելու յուրաքանչյուր դեպքի բացահայտումը.

    4) խախտումների կանխարգելումը և դրանց առաջացմանը նպաստող պայմանների վերացումը.

    5) քաղաքացիական ծառայողների՝ սույն կարգով նախատեսված դեպքերում` իրավունքների մինչդատական պաշտպանությունը.

    6) ծառայողական քննությամբ պարզաբանման ենթակա հարցերի ժամանակին, լրիվ, բազմակողմանի և օբյեկտիվ պարզաբանումը և (կամ) բացահայտումը։

    1. Գաղտնիության ռեժիմի ապահովման խախտումների դեպքում ծառայողական քննությունն անցկացվում է «Պետական գաղտնիքի մասին» օրենքով սահմանված կարգով:
    2. Ծառայողական քննությամբ պարզաբանման ենթակա հարցերը որոշում է ծառայողական քննություն նշանակողը՝ ծառայողական քննություն նշանակելու մասին որոշմամբ:

     

    1. ԾԱՌԱՅՈՂԱԿԱՆ ՔՆՆՈՒԹՅՈՒՆ ՆՇԱՆԱԿԵԼՈՒ ԴԵՊՔԵՐԸ, ՀԻՄՔԸ ԵՎ ԱՆՑԿԱՑՄԱՆ ԵՂԱՆԱԿՆԵՐԸ

     

    1. Ծառայողական քննություն նշանակվում է ծառայողական պարտականություններն անհարգելի պատճառով չկատարելու և (կամ) ոչ պատշաճ կատարելու և (կամ) ծառայողական լիազորությունները վերազանցելու և (կամ) աշխատանքային կարգապահական ներքին կանոնները խախտելու և (կամ) ծառայողական քննություն անցկացնելու կարգը խախտելու և (կամ) քաղաքացիական ծառայողի վարքագծի կանոնները խախտելու և (կամ) հանրային ծառայողի նկատմամբ կիրառվող այլ սահմանափակումները չպահպանելու և (կամ) շահերի բախման կանոնները խախտելու դեպքերում, ինչպես նաև քաղաքացիական ծառայողի գործունեությանն առնչվող և (կամ) աշխատանքային հարաբերությունների հետ կապված հարցերի պարզաբանման դեպքերում:
    2. Ծառայողական քննությունը նշանակում է պաշտոնի նշանակելու իրավասություն ունեցող պաշտոնատար անձը:
    3. Օրենքի 22-րդ հոդվածի 3-րդ մասով նախատեսված քաղաքացիական ծառայողի վարքագծի կանոնների, անհամատեղելիության պահանջների, հանրային ծառայողի նկատմամբ կիրառվող այլ սահմանափակումների, շահերի բախման վերաբերյալ այլ անձի դիմումի և (կամ) լրատվամիջոցների հրապարակումների հիման վրա ծառայողական քննություն նշանակում է գլխավոր քարտուղարը:
    4. Ծառայողական քննություն անցկացնելու հիմքը ծառայողական քննություն նշանակելու իրավասություն ունեցող պաշտոնատար անձի կողմից էլեկտրոնային եղանակով ընդունված համապատասխան իրավական ակտն է:
    5. Ծառայողական քննություն նշանակելու մասին որոշման մեջ նշվում են՝

    1) ծառայողական քննություն նշանակելու դեպքը (դեպքերը), պարզաբանման ենթակա հարցերը և անցկացման եղանակը.

    2) ծառայողական քննություն վարողի (վարողների) մասին տվյալները.

    3) ծառայողական քննություն նշանակելու օրը, ամիսը, տարեթիվը.

    4) ծառայողական քննությանն առնչվող այլ անհրաժեշտ տվյալներ:

    1. Ծառայողական պարտականություններն անհարգելի պատճառով չկատարելու և (կամ) ոչ պատշաճ կատարելու և (կամ) ծառայողական լիազորությունները վերազանցելու և (կամ) աշխատանքային կարգապահական ներքին կանոնների հետ կապված հարցերի և (կամ) ծառայողական քննություն անցկացնելու կարգը խախտելու և (կամ) քաղաքացիական ծառայողի գործունեությանն առնչվող և (կամ) աշխատանքային հարաբերությունների հետ կապված հարցերի ուսումնասիրության համար նշանակված ծառայողական քննությունն անցկացնում է այն անձը (աշխատանքային խումբը, կառուցվածքային ստորաբաժանումը), ում ծառայողական քննություն նշանակելու մասին իրավական ակտով վերապահված է ծառայողական քննություն անցկացնելու գործառույթը (այսուհետ՝ ծառայողական քննություն վարող):
    2. Քաղաքացիական ծառայողի վարքագծի կանոնների, անհամատեղելիության պահանջների, հանրային ծառայողի նկատմամբ կիրառվող այլ սահմանափակումների, շահերի բախման վերաբերյալ հարցերի ուսումնասիրության համար նշանակված ծառայողական քննությունն անցկացնում է օրենքի 33-րդ հոդվածով նախատեսված կարգով ձևավորված քաղաքացիական ծառայողների էթիկայի հանձնաժողովը (այսուհետ՝ ծառայողական քննություն վարող):
    3. Ծառայողական քննությունն անցկացվում է հետևյալ եղանակներով՝

    1) միանձնյա, երբ դրված է պարզաբանման ենթակա մինչև երեք հարց.

    2) աշխատանքային խմբով կամ կառուցվածքային ստորաբաժանման  կողմից, երբ դրված է պարզաբանման ենթակա երեք և ավելի հարց, կամ դրված հարցը հնարավոր չէ պարզել միանձնյա եղանակով ծառայողական քննության դեպքում.

         3) քաղաքացիական ծառայողների էթիկայի հանձնաժողովի կողմից։

    1. Սույն կարգի 14-րդ կետի 2-րդ և 3-րդ ենթակետերով նախատեսված Էթիկայի հանձնաժողովը կամ աշխատանքային խումբը իրենց աշխատանքները կազմակերպում են պարտադիր արձանագրման ենթակա նիստերի միջոցով՝ աշխատանքային նպատակահարմարությունից ելնելով առկա կամ հեռավար կարգով։
    2. Էթիկայի հանձնաժողովի ձևավորումից հետո էթիկայի հանձնաժողովի անդամները էլեկտրոնային եղանակով ինքնաշխատ ծանուցվում են էթիկայի հանձնաժողովի կազմում ընդգրկված լինելու և ծառայողական քննության նյութերի վերաբերյալ:
    3. Էթիկայի հանձնաժողովի նախագահը ծանուցումը ստանալուց հետո՝ երկու աշխատանքային օրվա ընթացքում, հրավիրում է հանձնաժողովի նիստ, որի ընթացքում կատարում է աշխատանքի բաշխում, որոշվում է նիստերի անցկացման նախնական ժամանակացույցը, ծառայողական քննության ենթակա հարցի ուսումնասիրության համար փաստական և իրավական հանգամանքների քննության նախնական հերթականությունը։
    4. Էթիկայի հանձնաժողովի որևէ անդամի հարգելի բացակայության դեպքում համապատասխան մարմնի (բացակայող քաղաքացիական ծառայողի) գլխավոր քարտուղարը քաղաքացիական ծառայության տեղեկատվական հարթակում լրացնում է համակարգող փոխվարչապետի սահմանած պահանջները բավարարող փոխարինող քաղաքացիական ծառայողի թեկնածությունը: Սույն կետում նշված փոփոխությունը էլեկտրոնային եղանակով ինքնաշխատ արտացոլվում է ձևավորված էթիկայի հանձնաժողովի կազմում:
    5. Ծառայողական քննության փուլերն են՝

    1) ծառայողական քննության նշանակում.

    2) ծառայողական քննության անցկացում և ավարտում.

    3) ծառայողական քննության նյութերին ծանոթացում.

    4) ծառայողական քննության արդյունքների հիման վրա համապատասխան եզրակացության կազմում և այն ներկայացնելը.

    5) ծառայողական քննության արդյունքների հիման վրա որոշման կայացում, եթե օրենքով այլ բան նախատեսված չէ:

    1. Ծառայողական քննությունն անցկացվում է 30 օրացուցային օրվա ընթացքում, որն սկսվում է ծառայողական քննություն նշանակող պաշտոնատար անձի կողմից ծառայողական քննություն նշանակելու մասին իրավական ակտն ստորագրվելու պահից:
    2. Ելնելով ծառայողական քննության մեծածավալությունից, բարդությունից կամ այլ անհրաժեշտությունից՝ ծառայողական քննությունը վարողի էլեկտրոնային եղանակով ընդունված պատճառաբանված զեկուցագրի հիման վրա ծառայողական քննություն նշանակած պաշտոնատար անձը 2 աշխատանքային օրվա ընթացքում էլեկտրոնային եղանակով համապատասխան իրավական ակտով կարող է երկարաձգել ծառայողական քննություն անցկացնելու ժամկետը՝ մինչև 30 օրացուցային օր: Ծառայողական քննության ժամկետն առաջին անգամ մինչև 30 օրացուցային օրով երկարաձգելուց հետո ծառայողական քննությունը վարողի էլեկտրոնային եղանակով ընդունված պատճառաբանված զեկուցագրի հիման վրա ծառայողական քննություն նշանակած պաշտոնատար անձը 2 աշխատանքային օրվա ընթացքում էլեկտրոնային եղանակով համապատասխան իրավական ակտով կարող է ևս մեկ անգամ երկարաձգել ծառայողական քննություն անցկացնելու ժամկետը՝ մինչև 15 օրացուցային օր։
    3. Ծառայողական քննության ժամկետը չերկարաձգելու դեպքում այն շարունակվում և ավարտվում է ծառայողական քննություն նշանակելու մասին որոշմամբ սահմանված ժամկետում:

     

    1. 3. ԾԱՌԱՅՈՂԱԿԱՆ ՔՆՆՈՒԹՅԱՆ ՄԱՍՆԱԿԻՑՆԵՐԸ, ՄԱՍՆԱԿԻՑՆԵՐԻ ԼԻԱԶՈՐՈՒԹՅՈՒՆՆԵՐԸ

     

    1. Ծառայողական քննության մասնակիցներն են՝

    1) ծառայողական քննություն նշանակող պաշտոնատար անձը (այսուհետ՝ կողմ).

    2) քաղաքացիական ծառայողը (քաղաքացիական ծառայողները), ում նկատմամբ նշանակված է ծառայողական քննությունը (այսուհետ՝ կողմ).

    3) ծառայողական քննությունը վարողը.

    4) ծառայողական քննությանը ներգրավված մասնագետը.

    5) ծառայողական քննությանը մասնակցող այլ անձ, ով կարող է առնչություն ունենալ ծառայողական քննության հետ (այսուհետ՝ այլ անձ):

    1. Ծառայողական քննություն նշանակող պաշտոնատար անձի (կողմի) լիազորություններն են՝

    1) ծառայողական քննություն նշանակելը.

    2) ծառայողական քննություն վարողին նշանակելը.

    3) ծառայողական քննություն անցկացնելու եղանակը սահմանելը.

    4) ծառայողական քննությամբ պարզաբանման ենթակա հարցերը սահմանելը.

    5) անհրաժեշտության դեպքում հիմնավորումներ, փաստաթղթեր ներկայացնելը.

    6) ծառայողական քննության ընթացքին տեղեկանալը.

    7) ծառայողական քննություն նշանակելու մասին որոշմամբ կամ ծառայողական քննության ընթացքում քաղաքացիական ծառայողի լիազորությունները կասեցնելը՝ պահպանելով նրա աշխատավարձը.

    8) մասնագետ ներգրավելը.

    9) ծառայողական քննության նյութերը միավորելը կամ առանձնացնելը և դրանց հիման վրա նոր ծառայողական քննություն նշանակելը.

    10) ծառայողական քննության վերաբերյալ, ծառայողական քննության արդյունքների հիման վրա, անհրաժեշտության դեպքում, համապատասխան որոշումներ կայացնելը, այդ թվում՝ ծառայողական քննությունը կասեցնելու և (կամ) վերսկսելու և (կամ) դադարեցնելու և (կամ) ծառայողական քննության նյութերը միավորելու կամ առանձնացնելու մասին և երկու աշխատանքային օրվա ընթացքում էլեկտրոնային եղանակով  կողմերին տրամադրելը.

    11) ծառայողական քննություն վարողի պահանջով համապատասխան մարմնին ենթակա մարմիններից, կազմակերպություններից և հիմնարկներից փաստաթղթեր, նյութեր, տվյալներ պահանջելը։

    1. Ծառայողական քննություն վարողի լիազորություններն են՝

    1) օրենքով և սույն կարգով սահմանված ժամկետներում և դրույթներին համապատասխան լրիվ, բազմակողմանի և օբյեկտիվ ծառայողական քննություն անցկացնելը՝ կատարված գործողություններին տալով համապատասխան փաստաթղթային ձևակերպում.

    2) օրենքով և սույն կարգով սահմանված ժամկետները պահպանելը.

    3) ծառայողական քննություն նշանակած պաշտոնատար անձի պահանջով ծառայողական քննության նյութերը ներկայացնելը և քննության ընթացքի մասին զեկուցելը.

    4) համապատասխան կառուցվածքային ստորաբաժանումներից և գրասենյակներից փաստաթղթեր, նյութեր, տվյալներ, իրեր ստանալը, որոնք առնչվում են ծառայողական քննությանը, անհրաժեշտության դեպքում դրանք ծառայողական քննության նյութերին կցելը.

    5) քաղաքացիական ծառայողից, ծառայողական քննության մասնակիցներից և ծառայողական քննությանն առնչվող այլ անձանցից բացատրություններ վերցնելը.

    6) ծառայողական քննությանը վերաբերող նյութերի, իրերի, փաստաթղթերի ուսումնասիրություն կատարելը.

    7) ծառայողական քննության ընթացքում ծառայողական քննություն նշանակելու իրավասություն ունեցող պաշտոնատար անձին միջնորդություն ներկայացնելը` կարգապահական խախտում կատարած քաղաքացիական ծառայողի լիազորությունները ժամանակավորապես դադարեցնելու համար.

    8) պաշտոնի նշանակելու իրավասություն ունեցող պաշտոնատար անձին և (կամ) ծառայողական քննություն նշանակելու իրավասություն ունեցող պաշտոնատար անձին մեկ այլ կարգապահական խախտման փաստի հայտնաբերման մասին տեղեկացնելը.

    9) ծառայողական քննություն նշանակելու իրավասություն ունեցող պաշտոնատար անձին միջնորդելը՝ ծառայողական քննությանը մասնագետ ներգրավելու համար.

    10) ծառայողական քննություն նշանակելու իրավասություն ունեցող պաշտոնատար անձին միջնորդելը՝ ծառայողական քննությունը կասեցնելու և (կամ) վերսկսելու և (կամ) դադարեցնելու և (կամ) ծառայողական քննության նյութերը միավորելու կամ առանձնացնելու համար.

    11) քաղաքացիական ծառայողին նրա վերաբերյալ ծառայողական քննության նյութերին տեղեկացնելը.

    12) ծառայողական քննությունն ավարտելուց հետո ծառայողական քննության արդյունքների հիման վրա եզրակացություն կազմելը.

    13) պաշտոնի նշանակելու իրավասություն ունեցող պաշտոնատար անձին և (կամ) ծառայողական քննության կողմերին ծառայողական քննության արդյունքների հիման վրա կազմված եզրակացությունը ներկայացնելը.

    14) համապատասխան մարմնի իրավասու պաշտոնատար անձանց կարգապահական խախտումների կանխարգելման և վերացման և (կամ) բարեվարքության համակարգի վերաբերյալ առաջարկություններ ներկայացնելը.

    15) ծառայողական քննության նյութերը կազմելը և համարակալելը:

    1. Քաղաքացիական ծառայող հանդիսացող կողմի, ում նկատմամբ նշանակվել է ծառայողական քննությունը, լիազորություններն են՝

    1) տեղեկանալը, թե ինչի կապակցությամբ է անցկացվում ծառայողական քննությունը.

    2) ստանալը  ծառայողական քննության ընթացքի վերաբերյալ էլեկտրոնային եղանակով ընդունված իրավական ակտերը.

    3) ծառայողական քննության կապակցությամբ բացատրություններ ներկայացնելը, իր կողմից ներկայացված բացատրություններն ստորագրելը.

    4) իր կողմից խախտում կատարելու փաստն ընդունելը.

    5) բացատրություն ներկայացնելուց հրաժարվելը.

    6) միջնորդություն ներկայացնելը՝ ծառայողական քննության նյութերում փաստաթղթեր, իրեր ներառելու համար.

    7) փաստաթղթեր, իրեր ներկայացնելը՝ ծառայողական քննության նյութերում ներառելու համար.

    8) միջնորդություն ներկայացնելը՝ խախտման վերաբերյալ այլ անձից (անձանցից) բացատրություն պահանջելու համար.

    9) ծառայողական քննությունն ավարտվելուց հետո ծառայողական քննության նյութերին ծանոթանալը.

    10) ծառայողական քննության արդյունքների հիման վրա կազմված եզրակացությունն ստանալը։

    1. Այլ անձի լիազորություններն են՝

    1) բացատրություն ներկայացնելը.

    2) խախտում կատարելու մասին հիմնավորումներ, փաստաթղթեր ներկայացնելը.

    3) միջնորդություն ներկայացնելը՝ խախտման վերաբերյալ այլ անձանցից բացատրություն պահանջելու համար։

    1. Ծառայողական քննությանը ներգրավված մասնագետի լիազորություններն են՝

    1) ծառայողական քննությամբ պարզաբանման ենթակա հարցերին տեղեկանալը.

    2) ծառայողական քննություն վարողի պահանջով մասնագիտական գրավոր եզրակացություն ներկայացնելը՝ իրեն առաջադրված և իր իրավասությանը վերաբերող հարցերի վերաբերյալ.

    3) ծառայողական քննություն վարողի պահանջով բացատրություններ (լրացուցիչ բացատրություններ) տալը՝ իր կողմից ներկայացված գրավոր եզրակացության կամ իր մասնակցությամբ կատարված գործողությունների պարզաբանման կապակցությամբ.

    4) իր մասնակցությամբ կատարված գործողությունների ընթացքի, բովանդակության, արդյունքների վերաբերյալ կազմված փաստաթղթերին ծանոթանալը և դրանց կապակցությամբ դիտողություններ ներկայացնելը.

    5) ծառայողական քննություն վարողին գրավոր կամ բանավոր առաջարկություններ ներկայացնելը՝ առանձին գործողություններ կատարելու, ինչպես նաև քննության նյութերին փաստաթղթեր, առարկաներ կցելու, դրանց ընթացք տալու վերաբերյալ.

    6) ծառայողական քննություն վարողի պահանջով ներկայանալը, անհրաժեշտ գործողությունների կատարմանը մասնակցելը և իր մասնագիտական գիտելիքների սահմաններում առանձին հարցերի պարզաբանման և գործողությունների կատարման կապակցությամբ խորհրդատվություն տրամադրելը, անհրաժեշտության դեպքում՝ դրանց մասնակցելը.

    7) իր մասնակցությամբ կատարված գործողությունների ընթացքի, բովանդակության և արդյունքների վերաբերյալ կազմված արձանագրություններում (տեղեկանքներում) եղած գրառումների ամբողջականությունն ու ստույգությունն ստորագրությամբ հաստատելը, իսկ չստորագրելու դեպքում՝ գրավոր պատճառաբանություն ներկայացնելը:

    1. Մասնագետը ներգրավվում է ծառայողական քննությանը՝ հատուկ ոլորտի մասնագիտական գիտելիքների և կոմպետենցիաների վերաբերյալ խորհրդատվություն տրամադրելու համար:
    • Ծառայողական քննություն նշանակելու իրավասություն ունեցող պաշտոնատար անձն իր որոշմամբ՝ ծառայողական քննություն վարողի համապատասխան միջնորդության հիման վրա դիմում է համապատասխան իրավասու պետական մարմիններին և (կամ) իրավաբանական և (կամ) համապատասխան արտոնագիր ունեցող ֆիզիկական անձանց՝ մասնագետ տրամադրելու և (կամ) որպես մասնագետ ներգրավվելու համար:
    1. Մասնագետը ծառայողական քննություն վարողին է ներկայացնում իր կրթության և (կամ) որակավորման վերաբերյալ փաստաթղթերը:

                                                                                         4. ԾԱՌԱՅՈՂԱԿԱՆ ՔՆՆՈՒԹՅԱՆ ԱՆՑԿԱՑՄԱՆ ԸՆԹԱՑՔԸ

     

    1. Ծառայողական քննություն իրականացնող անձը ծառայողական քննությունն անցկացնում է հանգամանքների ստուգմամբ, համադրմամբ և պարզաբանմամբ:
    2. Ծառայողական քննության ընթացքում խախտում (խախտումներ) հայտնաբերելու դեպքում ծառայողական քննություն վարողը դրա մասին տեղեկացնում է պաշտոնի նշանակելու իրավասություն ունեցող և (կամ) ծառայողական քննություն նշանակելու իրավասություն ունեցող պաշտոնատար անձին:
    3. Ծառայողական քննություն վարողը ծառայողական քննության հիմքում չի կարող դնել կամ օգտագործել այն փաստական տվյալները, որոնք ձեռք են բերվել սպառնալիքով, խաբեությամբ կամ այլ անօրինական գործողություններով, ինչպես նաև տվյալ գործողությունը կատարելու իրավունք չունեցող անձի կողմից:
    4. Ծառայողական քննություն վարողը ծառայողական քննության ընթացքում ձեռք բերված իրավական և փաստական հանգամանքները գնահատում է իր ներքին համոզմունքով` հանգամանքների լրիվ, բազմակողմանի և օբյեկտիվ հետազոտմամբ, ծառայողական քննության ընթացքում հավաքված հավաստի տվյալների բավարար ամբողջությամբ:
    5. Ծառայողական քննության նյութերում հանցագործությունների և (կամ) զանցանքների հատկանիշներ հայտնաբերվելու դեպքում դրա մասին հայտնվում է համապատասխան պետական մարմիններին, և ծառայողական քննությունը էլեկտրոնային եղանակով ընդունված իրավական ակտով կասեցվում է: Համապատասխան պետական մարմինների կողմից այդ հատկանիշները չհաստատվելու կամ դրանց հիման վրա Հայաստանի Հանրապետության օրենսդրությամբ սահմանված կարգով համապատասխան ընթացք տրվելու հիմքերի բացակայության դեպքերում ծառայողական քննությունը էլեկտրոնային եղանակով ընդունված իրավական ակտով վերսկսվում է։
    6. Ծառայողական քննությունը կասեցվում է նաև, եթե`

    1) անհնարին է տվյալ ծառայողական քննության արդյունքում ակնկալվող որոշման ընդունումը մինչև սահմանադրական, վարչական, քաղաքացիական կամ քրեական դատավարության կարգով քննվող գործով որոշում (դատական ակտ) կայացնելը.

    2) կողմը բացակայում է, և ծառայողական քննություն վարողն անհրաժեշտ է համարում նրա ներկայությունը` ծառայողական քննությանն առնչվող որոշ կարևոր հանգամանքներ նրանից պարզելու համար։

    1. Ծառայողական քննությունը դադարեցվում է, եթե՝

    1) լրացել են օրենքի 21-րդ հոդվածի 5-րդ մասով նախատեսված՝ կարգապահական տույժ կիրառելու համար սահմանված ժամկետները.

    2) ծառայողական քննություն նշանակելու իրավասություն ունեցող պաշտոնատար անձը էլեկտրոնային եղանակով ընդունված իրավական ակտով դադարեցրել է ծառայողական քննություն նշանակելու մասին որոշման գործողությունը.

    3) անձը դադարել է քաղաքացիական ծառայող համարվելուց։

    1. Ծառայողական քննությունը կասեցվում, վերսկսվում, միավորվում է այլ ծառայողական քննությանը, առանձնացվում կամ դադարեցվում է ծառայողական քննությունը նշանակելու իրավասություն ունեցող պաշտոնատար անձի էլեկտրոնային եղանակով ընդունված իրավական ակտով: Ծառայողական քննություն վարողը, ծառայողական քննության կողմերը համապատասխան իրավական ակտի ստորագրման պահից ինքնաշխատ եղանակով ստանում են ստորագրված անհատական իրավական ակտը:

     

    1. ԾԱՌԱՅՈՂԱԿԱՆ ՔՆՆՈՒԹՅԱՆ ԱՎԱՐՏԸ, ԱՐԴՅՈՒՆՔՆԵՐԻ ՁԵՎԱԿԵՐՊՈՒՄԸ

     

    • Ծառայողական քննության անցկացման ընթացքում ծառայողական քննության պարզաբանման ենթակա հանգամանքների վերաբերյալ բազմակողմանի և օբյեկտիվ հետազոտման, ինչպես նաև հավաքված հավաստի տվյալների բավարար ամբողջության արդյունքում ծառայողական քննություն վարողը ծառայողական քննության անցկացումը համարում է ավարտված:
    1. Ծառայողական քննություն վարողը ծառայողական քննության կողմերին էլեկտրոնային եղանակով ծանուցում  է ծառայողական քննության անցկացումն ավարտելու մասին և նրանց ծանոթացմանն է տրամադրում ծառայողական քննության նյութերը: Ծառայողական քննություն վարողը ծառայողկան քննության ավարտի և ծառայողական քննության նյութերը ծանոթացման տրամադրելու  վերաբերյալ էլեկտրոնային եղանակով կազմվում է համապատասխան արձանագրություն:
    2. Ծառայողական քննության նյութերին ծանոթանալու համար ծառայողական քննության կողմերին տրվում է երկու աշխատանքային օր:
    3. Ծառայողական քննության նյութերը ծանոթացման համար ծառայողական քննության կողմերին տրամադրվում են համարակալվելուց և կարվելուց հետո:
    4. Ծառայողական քննության նյութերին ծանոթանալուց կամ այդ կապակցությամբ կազմված արձանագրությունն ստորագրելուց կողմերի հրաժարվելու դեպքում ծառայողական քննություն վարողը պատճառների մասին էլեկտրոնային եղանակով կազմում է արձանագրություն:
    5. Ծառայողական քննության նյութերին ծանոթանալուց հետո կողմերը երկու աշխատանքային օրվա ընթացքում կարող են էլեկտրոնային եղանակով ներկայացնել գրավոր միջնորդություն՝ ծառայողական քննության նյութերին փաստաթղթեր և այլ փաստական տվյալներ կցելու վերաբերյալ:
    6. Ծառայողական քննություն վարողը մեկ աշխատանքային օրվա ընթացքում քննարկում և լուծում է սույն կարգի 45-րդ կետով նախատեսված միջնորդությունը, ինչի մասին էլեկտրոնային եղանակով ծանուցում է կողմերին:
    7. Ծառայողական քննության արդյունքներն ամփոփվում են ծառայողական քննությունն անցկացնելու՝ սույն կարգի 41-րդ կետով նախատեսված արձանագրություն կազմելուց հետո՝ 5 աշխատանքային օրվա ընթացքում, ծառայողական քննություն վարողի կողմից կազմված համապատասխան եզրակացությամբ: Եզրակացությունը առնվազն ներառում է ծառայողական քննությամբ պարզված հանգամանքները և դրանց վերաբերյալ հետևությունները, անհրաժեշտության դեպքում` համապատասխան առաջարկություններ և դրանց վերաբերյալ հիմնավորումներ:
    8. Ծառայողական քննություն վարողը ծառայողական քննության արդյունքների հիման վրա կազմված եզրակացությունը ներկայացնում է կողմերին:
    9. Օրենքի 35-րդ հոդվածով նախատեսված դեպքերում քաղաքացիական ծառայողների էթիկայի հանձնաժողովը ծառայողական քննության արդյունքների հիման վրա էլեկտրոնային եղանակով ընդունում է եզրակացություն և անմիջապես ներկայացնում ծառայողկան քննության կողմերին:
    10. Պաշտոնի նշանակելու իրավասություն ունեցող պաշտոնատար անձը եզրակացությունը ստանալուց հետո` երեք աշխատանքային օրվա ընթացքում, քննարկում է եզրակացությունը և էլեկտրոնային եղանակով ընդունում է համապատասխան որոշում, բացառությամբ օրենքի 35-րդ հոդվածով նախատեսված դեպքերի:
    11. Պաշտոնի նշանակելու իրավասություն ունեցող պաշտոնատար անձը սույն կարգի 50-րդ կետով նախատեսված որոշումն ընդունելուց հետո՝ 3 աշխատանքային օրվա ընթացքում, էլեկտրոնային եղանակով ծանուցում է ծառայողական քննության  կողմերին և ծառայողական քննություն վարողին:
    12. Սույն կարգի 19-րդ կետով նախատեսված ծառայողական քննության յուրաքանչյուր փուլի ընթացքում ձեռք բերված նյութերը և արդյունքների վերաբերյալ տեղեկատվությունը յուրաքանչյուր փուլի ավարտից հետո ինքնաշխատ եղանակով արտացոլվում է քաղաքացիական ծառայության տեղեկատվական հարթակի համապատասխան տիրույթում։»:

             

     

      

    Հայաստանի Հանրապետության
    վարչապետ    ի աշխատակազմի ղեկավար

    Ա. Հարությունյան
    Նախագիծ

    • Քննարկվել է

      16.04.2025 - 01.05.2025

    • Տեսակ

      Որոշում

    • Ոլորտ

      Քաղաքացիական ծառայություն

    • Գերատեսչություն

      Վարչապետի աշխատակազմի քաղաքացիական ծառայության գրասենյակ

    Ուղարկել առաջարկ էլեկտրոնային փոստով

    Ձեր ուղարկած առաջարկը կտեղադրվի կայքում 10 աշխ. օրվա ընթացքում

    Չեղարկել

    Դիտումներ` 2461

    Տպել

    Առնչվող փաստաթղթեր/ հղումներ

    Առաջարկներ`

    Տեսնել ավելին
    Եվրոպական Միություն
    Այս կայքը ստեղծվել և թարմացվել է Եվրոպական միության ֆինանսական աջակցությամբ: Կայքի բովանդակության համար պատասխանատվություն են կրում հեղինակները, և պարտադիր չէ, որ այն արտահայտի Եվրոպական միության, ՄԱԿ-ի Զարգացման ծրագրի, ՄԱԿ-ի բնակչության հիմնադրամի, ՅՈՒՆԻՍԵՖ-ի և ԵԱՀԿ-ի տեսակետները: