«ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԻ ՀԱՄԱՐԱՆԻՇԻՆ ԱԿՏԻՎ ԿԱՄ ՊԱՍԻՎ ԿԱՐԳԱՎԻՃԱԿ ՏՐԱՄԱԴՐԵԼՈՒ ԿԱՐԳԸ ԵՎ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

«   » «              »   2025 թվականի                   N «         - Ն »

ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԻ ՀԱՄԱՐԱՆԻՇԻՆ ԱԿՏԻՎ ԿԱՄ ՊԱՍԻՎ ԿԱՐԳԱՎԻՃԱԿ ՏՐԱՄԱԴՐԵԼՈՒ ԿԱՐԳԸ ԵՎ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Բնակչության պետական ռեգիստրի մասին» օրենքի 13-րդ հոդվածի 11-րդ մասը՝  Հայաստանի Հանրապետության կառավարությունը որոշում է.

1. Սահմանել հանրային ծառայությունների համարանիշին ակտիվ կամ պասիվ կարգավիճակ տրամադրելու կարգը և պահանջները՝ համաձայն հավելվածի։
2. Սույն որոշումն ուժի մեջ է մտնում բնակչության պետական ռեգիստրի տվյալների շտեմարանի գործարկմանը հաջորդող օրվանից։

Հավելված

ՀՀ կառավարության 2025 թվականի

    _______-ի ________-ի թիվ ___-Ն որոշման

ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԻ ՀԱՄԱՐԱՆԻՇԻՆ ԱԿՏԻՎ ԿԱՄ ՊԱՍԻՎ ԿԱՐԳԱՎԻՃԱԿ ՏՐԱՄԱԴՐԵԼՈՒ ԿԱՐԳԸ ԵՎ ՊԱՀԱՆՋՆԵՐԸ

1. Սույն կարգը սահմանում է բնակչության պետական ռեգիստրում հանրային ծառայությունների համարանիշին (այսուհետ՝ ՀԾՀ) ակտիվ կամ պասիվ կարգավիճակ տրամադրելու հիմքերը, գործընթացը և հետևանքները։
2. ՀԾՀ-ին տրամադրվում է ակտիվ կարգավիճակ, եթե բնակչության հաշվառման տվյալները բնակչության պետական ռեգիստրում համարվում են ամբողջական, օրինական և համապատասխանում են «Բնակչության պետական ռեգիստրի մասին» օրենքով սահմանված պահանջներին։
3. ՀԾՀ-ին տրամադրվում է պասիվ կարգավիճակ է, եթե անձը՝
   • չունի գրանցված հիմնական հասցե․
   • տրամադրված անձնական տվյալները չեն համապատասխանում օրենքով սահմանված ծավալին կամ ստուգման արդյունքում ճանաչվել են կեղծ կամ ոչ հավաստի․
   • դուրս է եկել Հայաստանի Հանրապետության տարածքից և հյուպատոսական հաշվառման չի կանգնել 183 օրվանից ավելի ժամկետով․
   • մահացած է, քաղաքացիությունից հրաժարված է, կամ ճանաչվել է անհայտ բացակայող:

4. ՀԾՀ-ի կարգավիճակը ավտոմատ ձևով սահմանվում կամ թարմացվում է բնակչության պետական ռեգիստրում տվյալների մուտքագրման, թարմացման, հստակեցման կամ հեռացման գործընթացների արդյունքում։
5. ՀԾՀ-ի կարգավիճակի փոփոխման իրավունք ունի միայն միգրացիայի և քաղաքացիության բնագավառի պետական լիազոր մարմինը։
6. Կարգավիճակի փոփոխության դեպքում այդ մասին ավտոմատացված եղանակով ծանուցում է ուղարկվում տվյալ սուբյեկտին՝ տեղեկատվական մուտքի հարթակի միջոցով, եթե առկա է էլեկտրոնային փոստի հասցե։
7. Ընտրողների ռեգիստրը ձևավորելու համար հիմք են ընդունվում միայն ակտիվ կարգավիճակ ունեցող ՀԾՀ-ները։
8. Պասիվ կարգավիճակ ունեցող ՀԾՀ ունեցող անձը չի կարող ծառայություն ստանալ այն մարմիններից, որոնց համար ՀԾՀ ակտիվ կարգավիճակով նույնականացումը պարտադիր է։
9. Միգրացիայի և քաղաքացիության բնագավառի պետական լիազոր մարմինը իրականացնում է պարբերական մոնիթորինգ՝ պարզելու ՀԾՀ կարգավիճակների համապատասխանությունը բնակչության իրական տվյալներին։
10. Պասիվ կարգավիճակ ունեցող անձին միգրացիայի և քաղաքացիության բնագավառի պետական լիազոր մարմնի կողմից կարող են ուղարկվել ծանուցումներ՝ կարգավիճակի վերականգնման համար անհրաժեշտ գործողությունների վերաբերյալ։
11. Սույն կարգի կիրառմամբ ՀԾՀ կարգավիճակի տրամադրումը, փոփոխումը կարող է վերանայվել վարչական կարգով՝ ըստ անձի դիմումի կամ միգրացիայի և քաղաքացիության բնագավառի պետական լիազոր մարմնի նախաձեռնությամբ։
12. ՀԾՀ կարգավիճակի վերաբերյալ բոլոր տվյալները ենթակա են պահպանման և արխիվացման՝ «Արխիվների մասին» օրենքով սահմանված կարգով։