«Հայաստանի Հանրապետության կրթության և գիտության նախարարի 2011 թվականի մայիսի 17-ի թիվ 571-Ն հրամանում փոփոխություններ և լրացում կատարելու մասին» Հայաստանի Հանրապետության կրթության, գիտության, մշակույթի և սպորտի նախարարի հրամանի նախագիծ

Կարծում եմ, որ ներկայացված նախագիծը արդիական և հիմնավորված փոփոխություն է առաջարկում։

Մասնավորապես, աշակերտական խորհրդի առաջին ժողովի հրավիրման իրավունքը տնօրենի փոխարեն խորհրդի նախագահին վերապահելը նպաստում է ինքնավարության սկզբունքի լիարժեք պահպանմանը։ Ժամկետների տեղափոխումը մայիս ամիս հնարավորություն է տալիս խորհրդի կազմը ձևավորել նախապես և նոր ուսումնական տարին սկսել արդեն կազմակերպված աշխատանքով։ Փորձնական ծրագրի արդյունքները ևս ցույց են տալիս առաջարկվող մոտեցման արդյունավետությունը և շարունակականության ապահովումը։ Ընդհանուր առմամբ, նախագիծը հիմնավորված է և կարող է դրական ազդեցություն ունենալ ուսումնական հաստատություններում աշակերտական ինքնակառավարման զարգացման վրա։

Հաշվի առնելով հանրակրթական ուսումնական հաստատություններում ուսումնական գործընթացի առանձնահատկությունները և նպատակ ունենալով բարձրացնել աշակերտական ինքնավարության արդյունավետությունը՝ առաջարկում եմ Աշակերտական խորհրդի (ԱԽ) ձևավորման գործընթացն իրականացնել ոչ թե մայիս, այլ ապրիլ ամսվա ընթացքում։

Մայիս ամիսը հանրակրթական դպրոցներում հագեցած է ամփոփիչ ստուգումներով, պետական ավարտական քննություններով և «Վերջին զանգի» միջոցառումներով։ Այս շրջանում ԱԽ ձևավորումը ստեղծում է հավելյալ ծանրաբեռնվածություն և նվազեցնում ընտրական գործընթացի որակը։ Գործընթացն ապրիլին տեղափոխելը տալիս է հետևյալ առավելությունները.

1. Ապրիլին ձևավորված նոր խորհուրդը հնարավորություն է ստանում մոտ երկու ամիս աշխատել հին կազմի (հատկապես շրջանավարտների) հետ համատեղ։ Նորընտիր անդամները մասնակցում են նիստերին որպես դիտորդներ՝ յուրացնելով աշխատանքային նրբությունները։
2. Շրջանավարտները պաշտոնապես փոխանցում են ընթացիկ և կիսատ թողած նախագծերը, կապերը և ռեսուրսները, ինչը բացառում է սեպտեմբերին աշխատանքները «զրոյական կետից» սկսելու սխալը։
3. Նոր կազմը ամռան ամիսներին հնարավորություն է ունենում նախապատրաստել սեպտեմբերի 1-ի և առաջին եռամսյակի միջոցառումների հստակ օրացույցը։
4. Սեպտեմբերի առաջին օրերին ԱԽ-ն հանդես է գալիս որպես կայացած թիմ, ինչը զգալիորեն թեթևացնում է ՄԿԱ գծով փոխտնօրենի և դաստիարակչական աշխատանքների կազմակերպչի ծանրաբեռնվածությունը։

Այս փոփոխության շնորհիվ աշակերտական ինքնավարությունը ձևական բնույթից կանցնի գործնական-կիրառական փուլի։ Ուսումնական տարվա մեկնարկին դպրոցը կունենա արդեն իսկ վերապատրաստված և ծրագրային հստակ հենք ունեցող աշակերտական մարմին, ինչը կնպաստի դպրոցի ժողովրդավարական մշակույթի զարգացմանը։

Նպատակահարմար եմ գտնում աշակերտական խորհուրդը ձևավորել նախորդ ուսումնական տարվա ապրիլ ամսին՝ հաշվի առնելով մայիս ամսվա ծանրաբեռնվածությունը