Հայաստանի Հանրապետության կառավարության 2015 թվականի դեկտեմբերի 10-ի N 1459-Ն որոշման մեջ փոփոխություններ կատարելու մասին» Հայաստանի Հանրապետության կառավարության որոշման նախագիծ

ՀԻՄՆԱՎՈՐՈՒՄ

«Հայաստանի Հանրապետության կառավարության 2015 թվականի դեկտեմբերի 10 N 1459-Ն որոշման մեջ փոփոխություններ կատարելու մասին»

Հայաստանի Հանրապետության կառավարության որոշման նախագծի

1.    Ընթացիկ իրավիճակը և իրավական ակտի ընդունման անհրաժեշտությունը.

«Ոստիկանությունում ծառայության մասին» օրենքի 14.1-ին հոդվածով սահմանված են ոստիկանությունում թափուր պաշտոն զբաղեցնելու համար անցկացվող մրցույթի հետ կապված կարգավորումները։ Ոստիկանության ավագ և գլխավոր խմբերի պաշտոններում թափուր պաշտոն առաջանալու դեպքում ոստիկանության ծառայողների պաշտոնի նշանակումը կատարվում է արտամրցութային կարգով կամ մրցույթով, իսկ մրցույթի անցկացման կարգը և պայմանները սահմանում է Կառավարությունը:

Որոշման նախագծի ընդունումը պայմանավորված է Ներքին գործերի նախարարությունում մեկնարկած բարեփոխումների շրջանակներում իրականացված կառուցվածքային փոփոխություններից և օրենսդրական վերանայումներից, մասնավորապես 2026 թվականի փետրվարի 15-ի ստեղծվել է Հայաստանի Հանրապետության ներքին գործերի նախարարության 112 օպերատիվ կառավարման կենտրոնը, «Ոստիկանության բարեվարքության և կարգապահական կանոնագիրք» օրենքով սահմանվել է, որ Ներքին գործերի նախարարության ներքին վերահսկողական գործառույթներ իրականացնող ստորաբաժանումում առաջին անգամ պաշտոնի նշանակվելուց առաջ թեկնածուները պարտադիր պետք է անցնեն բարեվարքության ուսումնասիրություն, «Ոստիկանությունում ծառայության մասին» օրենքում կատարված փոփոխություններով մի շարք հարաբերությունների կանոնակարգման լիազորությունը վերապահվել է Ներքին գործերի նախարարին։

2.    Կարգավորման նպատակն ու բնույթը.

Նախագծով նախատեսվում է Կառավարության որոշմամբ սահմանված կարգավորումները տարածել նաև Ներքին գործերի նախարարությունում ոստիկանության ավագ և գլխավոր խմբերի պաշտոններում թափուր պաշտոն առաջանալու դեպքում ոստիկանության ծառայողների պաշտոնի նշանակման հետ կապված հարաբերությունների վրա։

3. Լրացուցիչ ֆինանսական միջոցների անհրաժեշտության և պետական բյուջեի եկամուտների և ծախսերի սպասվելիք փոփոխությունների մասին.

Նախագծի ընդունմամբ պետական բյուջեում ծախսերի և եկամուտների ավելացում կամ նվազեցում չի նախատեսվում:

4. Նախագծի մշակման գործընթացում ներգրավված ինստիտուտները և անձինք.

Նախագիծը մշակվել է Հայաստանի Հանրապետության ներքին գործերի նախարարության կողմից։

5․ Կապը ռազմավարական փաստաթղթերի հետ.

Նախագծի ընդունումը բխում է Հայաստանի Հանրապետության կառավարության 2024 թվականի նոյեմբերի 15-ի Ոստիկանության բարեփոխումների իրականացման ռազմավարությունը և դրանից բխող 2024-2026 թվականների գործողությունների ծրագիրը հաստատելու մասին N 1803-Լ որոշման 2-րդ հավելվածի 5-րդ՝ «Հանրապետական մեկ միասնական օպերատիվ կառավարման կենտրոնի (112) ստեղծում ուղղությունից, որը միտված է օպերատիվ կառավարման միասնական կենտրոնի ստեղծմանը և քաղաքացիներից ստացվող ահազանգերի ընդունման արդյունավետության բարձրացմանը:

6. Ակնկալվող արդյունքը․

Նախագծի ընդունման արդյունքում Ներքին գործերի նախարարությունում ոստիկանության ավագ և գլխավոր խմբերի պաշտոններում թափուր պաշտոն առաջանալու դեպքում ոստիկանության ծառայողների պաշտոնի նշանակումը կիրականացվի արտամրցութային կարգով կամ մրցույթով։

ՀՀ ներքին գործերի նախարարություն