«Հայաստանի Հանրապետության ներքին գործերի նախարարի 2024 թվականի փետրվարի 29-ի թիվ 3-Ն հրամանում փոփոխություններ և լրացումներ կատարելու մասին« ՀՀ ներքին գործերի նախարարի հրամանի նախագիծ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐԻ 2024 ԹՎԱԿԱՆԻ ՓԵՏՐՎԱՐԻ 29-Ի ԹԻՎ 3-Ն ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀՀ ՆԵՐՔԻՆ ԳՈՐԾԵՐԻ ՆԱԽԱՐԱՐԻ ՀՐԱՄԱՆԻ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը․

Նախագծի ընդունումը պայմանավորված է ՀՀ վարչապետի 2025 թվականի դեկտեմբերի 11-ի «Ոստիկանության բարեվարքության և կարգապահական կանոնագիրք» օրենքի և հարակից օրենքների կիրարկումն ապահովող միջոցառումների ցանկ հաստատելու մասին» թիվ 1150-Ա որոշմամբ հաստատված հավելված N 1-ի 11-րդ և հավելված N 5-ի 9-րդ կետերի պահանջների կատարման ապահովման անհրաժեշտությամբ։

2025 թվականի հոկտեմբերի 2-ին ընդունվել է (ուժի մեջ է մտնելու 26․12․2025թ․) «Ոստիկանության բարեվարքության և կարգապահական կանոնագիրք» ՀՕ-315-Ն օրենքը (այսուհետ՝ ՀՕ-315-Ն օրենք), որի 44-րդ հոդվածի 7-րդ մասի համաձայն՝ կարգապահական հանձնաժողովի կազմը և գործունեության կարգը սահմանում է լիազոր մարմնի ղեկավարը:

Միաժամանակ, նույն նախագծերի փաթեթով 2025 թվականի հոկտեմբերի 2-ին ընդունվել է (ուժի մեջ է մտնելու 26․12․2025թ․) նաև «Փրկարարական ծառայության կանոնագիրքը հաստատելու մասին» օրենքում փոփոխություններ և լրացումներ կատարելու մասին» ՀՕ-320-Ն օրենքը (այսուհետ՝ ՀՕ-320-Ն օրենք), որի 8-րդ հոդվածով լրացվող «Փրկարարական ծառայության կանոնագիրքը հաստատելու մասին» օրենքի 85․34-րդ հոդվածի 7-ին մասի համաձայն՝ կարգապահական հանձնաժողովի կազմը և գործունեության կարգը սահմանում է լիազոր մարմնի ղեկավարը:

Վերոնշյալ օրենքներից բխող իրավական պահանջները ապահովելու նպատակով անհրաժեշտություն է առաջացել փոփոխություններ կատարել Հայաստանի Հանրապետության ներքին գործերի նախարարի 2024 թվականի փետրվարի 29-ի N 3-Ն հրամանում, մասնավորապես սահմանելով նոր լիազորող նորմ ոստիկանական ծառայողների՝ կարգապահական հանձնաժողովի կազմի և գործունեության կարգի առնչությամբ։ Միաժամանակ, լրացվում են նաև փրկարարական ծառայողների առնչությամբ կարգապահական հանձնաժողովի կազմի և գործունեության կարգի վերաբերյալ իրավակարգավորումները։

2․ Առաջարկվող կարգավորման բնույթը․

Նախագծով առաջարկվում է գործող հրամանի լիազորող նորմերը համապատասխանեցնել ՀՕ-315-Ն և ՀՕ-320-Ն օրենքներով սահմանվող կարգավորումներին, ինչպես նաև փրկարարական ծառայողների՝ կարգապահական հանձնաժողովի կազմին և գործունեության կարգին վերաբերող կարգավորումները նույնպես առաջարկվում է սահմանել ՀՀ ներքին գործերի նախարարի 2024 թվականի փետրվարի 29-ի N 3-Ն հրամանով։

3. Նախագծի մշակման գործընթացում ներգրավված ինստիտուտները և անձինք․

Նախագիծը մշակվել է ՀՀ ներքին գործերի նախարարության կողմից:

4. Կապը ռազմավարական փաստաթղթերի հետ․

Նախագծի ընդունումը չի բխում ռազմավարական ծրագրերից։

5. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները․

Նախագծի ընդունումը լրացուցիչ ֆինանսական միջոցների հատկացման, ինչպես նաև՝ պետական բյուջեի եկամուտներում և ծախսերում փոփոխություններ կատարելու անհրաժեշտություն չի առաջացնելու։

6. Ակնկալվող արդյունքը․

Նախագծի ընդունմամբ ակնկալվում է ապահովել ՀՀ վարչապետի 2025 թվականի դեկտեմբերի 11-ի «Ոստիկանության բարեվարքության և կարգապահական կանոնագիրք» օրենքի և հարակից օրենքների կիրարկումն ապահովող միջոցառումների ցանկ հաստատելու մասին» թիվ 1150-Ա որոշմամբ հաստատված հավելված N 1-ի 11-րդ և հավելված N 5-ի 9-րդ կետերի պահանջների կատարումը։

ՀՀ ներքին գործերի նախարարություն