ԿԻԲԵՌԱՆՎՏԱՆԳՈՒԹՅԱՆ ՈԼՈՐՏՈՒՄ ԿԻՐԱՌԵԼԻ ՄԻՋԱԶԳԱՅԻՆ ՍՏԱՆԴԱՐՏՆԵՐԻ ՑԱՆԿԸ ՍԱՀՄԱՆԵԼՈՒ ՄԱՍԻՆ

ՀԻՄՆԱՎՈՐՈՒՄ

«ԿԻԲԵՌԱՆՎՏԱՆԳՈՒԹՅԱՆ ՈԼՈՐՏՈՒՄ ԿԻՐԱՌԵԼԻ ՄԻՋԱԶԳԱՅԻՆ ՍՏԱՆԴԱՐՏՆԵՐԻ ՑԱՆԿԸ ՍԱՀՄԱՆԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1.   Ընթացիկ իրավիճակը և իրավական ակտի ընդունման անհրաժեշտությունը

Վերջին տարիներին Հայաստանի Հանրապետությունում տեղեկատվական և թվային ենթակառուցվածքների օգտագործման ծավալների աճին զուգահեռ էականորեն աճել են կիբեռսպառնալիքները։

Կիբեռսպառնալիքների նվազեցման և կանխարգելման նպատակով «Կիբեռանվտանգության մասին» Հայաստանի Հանրապետության օրենքով նախատեսվել է միջազգային ստանդարտների ցանկի սահմանում, որը հնարավորություն է տալիս Հայաստանի Հանրապետությունում ներդնել կիբեռանվտանգության ոլորտում միջազգային լավագույն փորձը, ապահովել միասնական մոտեցում և բարձրացնել տեղեկատվական համակարգերի պաշտպանվածության մակարդակը։

2.  Կարգավորման բնույթը և ակնկալվող արդյունքը

Նախագծի հիմնական նպատակն է կենսական նշանակության ոլորտում շահագործվող կրիտիկական տեղեկատվական ենթակառուցվածքների, կիբեռանվտանգության ապահովման ծառայություն մատուցողների և կիբեռանվտանգության աուդիտորների համար սահմանել հստակ միջազգային ստանդարտներ, որոնց վերջիններս պարտավոր են բավարարել։

Նախագիծը ներառում է կիրառելի միջազգային ստանդարտների ցանկ, դրանց կիրառման ժամկետը և ըստ անհրաժեշտության, նաև կիրառման ոլորտը։

Նախագծի ընդունման արդյունքում ակնկալվում է կիբեռանվտանգության ոլորտում միջազգային ստանդարտների իմպլեմենտացիան Հայաստանի Հանրապետության իրավական միջավայրում, ինչպես նաև կենսական նշանակության ոլորտում շահագործվող կրիտիկական տեղեկատվական ենթակառուցվածքների, կիբեռանվտանգության ապահովման ծառայություն մատուցողների և կիբեռանվտանգության աուդիտորների գործունեության համար հստակ, միասնական և կանխատեսելի կարգավորումների սահմանումը։

3.  Նախագծի մշակման գործընթացում ներգրավված ինստիտուտները և անձինք

·                Բարձր տեխնոլոգիաների արդյունաբերության նախարարություն,

·                «Հայաստանի տեղեկատվական համակարգերի գործակալություն» հիմնադրամ։

4.  Պետական բյուջեի եկամուտներում ու ծախսերում սպասվելիք փոփոխությունները

Նախագծի ընդունման դեպքում Հայաստանի Հանրապետության պետական բյուջեի եկամուտների և ծախսերի մասով փոփոխություններ չեն առաջանա:

5.  Կապը ռազմավարական փաստաթղթերի հետ

Նախագիծը բխում է «Կիբեռանվտանգության մասին» Հայաստանի Հանրապետության օրենքից։