«Հայաստանի Հանրապետության կառավարության 2006 թվականի ապրիլի 13-ի թիվ 488-Ն որոշման մեջ փոփոխություններ կատարելու մասին» ՀՀ կառավարության որոշման նախագիծ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ԱՊՐԻԼԻ 13-Ի ԹԻՎ 488-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

     1․ Ընթացիկ իրավիճակը և իրավական ակտի ընդունման անհրաժեշտությունը․

«Տեխնիկական անվտանգության ապահովման պետական կարգավորման մասին» օրենքի 10-րդ հոդվածի համաձայն՝ հաշվառման և տեխնիկական քննության ենթակա են արտադրական վտանգավոր օբյեկտում տեղի ունեցած տեխնածին վթարի յուրաքանչյուր դեպք, ինչպես նաև մահացու կամ ծանր ելքով արտադրական դժբախտ դեպքերը։ Տեխնածին վթարների և արտադրական դժբախտ դեպքերի հաշվառումն իրականացնում է լիազոր մարմինը: Տեխնիկական քննություն կարող են իրականացնել հավատարմագրված անձինք: Տեխնիկական քննություն չի կարող իրականացնել այն կազմակերպությունը, որը տեխնածին վթարին կամ արտադրական դժբախտ դեպքին նախորդող 1 տարվա ընթացքում դրական փորձագիտական եզրակացություն է տվել տվյալ օբյեկտի վերաբերյալ: ՀՀ կառավարության նախատեսած առանձին դեպքերում տեխնիկական քննություն իրականացնում է լիազոր մարմնի կողմից ստեղծված հանձնաժողովը:

Սույն օրենքի համաձայն՝ տեխնիկական քննության և հաշվառման կարգը սահմանում է ՀՀ կառավարությունը: ՀՀ կառավարության 2006 թվականի ապրիլի 13-ի «Տեխնածին վթարների, մահացու կամ ծանր ելքով արտադրական դժբախտ դեպքերի տեխնիկական քննության և հաշվառման կարգը սահմանելու մասին» N 488-Ն որոշմամբ կարգավորվում է Հայաստանի Հանրապետության տարածքում շահագործվող, շահագործման նպատակով նախապատրաստվող, կոնսերվացվող, ապամոնտաժվող, արտադրական վտանգավոր օբյեկտում տեղի ունեցած տեխնածին վթարների, մահացու կամ ծանր ելքով արտադրական դժբախտ դեպքերի (այսուհետ` արտադրական դժբախտ դեպք) հաշվառման և տեխնիկական քննության գործընթացը: Հաշվառման և տեխնիկական քննության ենթակա են արտադրական վտանգավոր օբյեկտներում տեղի ունեցած տեխնածին վթարների յուրաքանչյուր դեպք, արտադրական դժբախտ դեպքերը, բացառությամբ՝ միջուկային և էներգատեղակայանքների, ռադիոակտիվ նյութերի վերամշակման, ջրային համակարգերի, ավիացիայի, ավտոմոբիլային և երկաթուղային տրանսպորտի, ինչպես նաև ռազմական նշանակության օբյեկտների:

Նույն որոշման հավելվածի 6-րդ կետի համաձայն՝ տեխնածին վթարների, արտադրական դժբախտ դեպքերի տեխնիկական քննությունն իրականացնում է «Տեխնիկական անվտանգության ազգային կենտրոն» պետական ոչ առևտրային կազմակերպությունը, ինչպես նաև հավատարմագրված անձինք: Հատուկ, կարևորագույն և ռազմավարական նշանակության օբյեկտներում տեխնածին վթարների, արտադրական դժբախտ դեպքերի տեխնիկական քննությունն իրականացնում է ՀՀ արտակարգ իրավիճակների նախարարի կողմից ստեղծված հանձնաժողովը:

 Սույն որոշման ընդունման անհրաժեշտությունը պայմանավորված է «Տեխնիկական անվտանգության ապահովման պետական կարգավորման մասին» օրենքում փոփոխություններ կատարելու մասին» օրենքի ընդունմամբ (ընդունվել է 2025 թվականի հոկտեմբերի 24-ին ՀՕ-328-Ն), որի  համաձայն ուժը կորցրած է ճանաչվել օրենքի 18-րդ հոդվածը, իսկ 2025 թվականի նոյեմբերի 1-ից լուծարվել է ՀՀ ներքին գործերի նախարարության «Տեխնիկական անվտանգության ազգային կենտրոն» ՊՈԱԿ-ը։

2․ Կարգավորման նպատակը․

3․ Կապը ռազմավարական փաստաթղթերի հետ․

Սույն որոշման ընդունումը չի բխում որևէ ռազմավարական փաստաթղթից։

     4․ Նախագծի մշակման գործընթացում ներգրավված ինստիտուտները և անձինք․

Նախագիծը մշակվել է ՀՀ ներքին գործերի նախարարության  կողմից։

5․ Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները․

Սույն որոշման ընդունմամբ պետական բյուջեում ծախսերի և եկամուտների ավելացում կամ նվազեցում չի նախատեսվում:

6․ Ակնկալվող արդյունքը․

Սույն որոշման ընդունման արդյունքում կիրականացվի «Տեխնիկական անվտանգության ապահովման պետական կարգավորման մասին» օրենքի պահանջը, ինչպես նաև կապահովվի տեխնածին վթարների, մահացու և ծանր ելքով արտադրական դժբախտ դեպքերի տեխնիկական քննության իրականացման գործընթացի կանոնակարգումն ու լավարկումը։

ՀՀ ներքին գործերի նախարարություն