ՀԻՄՆԱՎՈՐՈՒՄ
«ԱՌՈՂՋԱՊԱՀԱԿԱՆ ԵՎ ԱՇԽԱՏԱՆՔԻ ՏԵՍՉԱԿԱՆ ՄԱՐՄՆԻ ԿՈՂՄԻՑ ԱՆՁԻ ՖՈՒՆԿՑԻՈՆԱԼՈՒԹՅԱՆ ԳՆԱՀԱՏՄԱՆ ՈԼՈՐՏՈՒՄ ԻՐԱԿԱՆԱՑՎՈՂ ԴԻՏԱՐԿՈՒՄՆԵՐԻ ՍՏՈՒԳԱԹԵՐԹԵՐԸ ՀԱՍՏԱՏԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ
- Իրավական ակտի ընդունման անհրաժեշտությունը
Նախագծի ընդունումը պայմանավորված է անձի ֆունկցիոնալության գնահատման նկատմամբ վերահսկողական աշխատանքների պատշաճ կազմակերպման անհրաժեշտությամբ:
- Ընթացիկ իրավիճակը և խնդիրները
2025 թվականի մայիսի 12-ին Ազգային ժողովի կողմից ընդունվել է «Անձի ֆունկցիոնալության գնահատման մասին» օրենքում լրացումներ և փոփոխություններ կատարելու մասին» ՀՕ-105-Ն օրենքը (այսուհետև՝ Օրենք): Օրենքի 7-րդ հոդվածով լրացված 11.1-ին հոդվածով սահմանվել են անձի ֆունկցիոնալության գնահատման նկատմամբ վերահսկողության իրականացմանը վերաբերող իրավակարգավորումներ, մասնավորապես՝ լրացված 11.1-ին հոդվածի 1-ին և 2-րդ մասերով սահմանվել է, որ անձի ֆունկցիոնալության գնահատման նկատմամբ վերահսկողությունը իրականացնելու է առողջապահության ոլորտում վերահսկողություն իրականացնող տեսչական մարմինը՝ դիտարկումների միջոցով, իսկ դիտարկումները իրականացվելու են Կառավարության կողմից հաստատված դիտարկման ստուգաթերթով։
Միաժամանակ, Վարչական իրավախախտումների վերաբերյալ Հայաստանի Հանրապետության օրենսգրքի 47.28-րդ հոդվածով սահմանված են տուգանքներ անձի ֆունկցիոնալության գնահատման բնագավառում առկա կարգերի խախտումների համար: Վկայակոչված հոդվածով վարչարարությունը նախատեսվում է իրականացնել անձի ֆունկցիոնալության գնահատումն իրականացնող հանձնաժողովի անդամների (մասնագետների), անձի ֆունկցիոնալության գնահատման ամփոփագրերը մշակողների և անձի ֆունկցիոնալության գնահատման համար ուղեգրող մասնագետների նկատմամբ:
Այսպիսով, որպեսզի առողջապահության ոլորտում վերահսկողություն իրականացնող տեսչական մարմինը հնարավորություն ստանա դիտարկումներ իրականացնել իրեն վերապահված ոլորտում, պետք են հաստատվի վերոնշված մասնագետների դիտարկումների համար անհրաժեշտ ստուգաթերթերը:
- Առաջարկվող կարգավորման նպատակը և բնույթը
Նախագծի ընդունման նպատակն է հաստատել անձի ֆունկցիոնալության գնահատման նկատմամբ իրականացվող դիտարկումների ստուգաթերթերը:
- Նախագծի մշակման գործընթացում ներգրավված ինստիտուտները և անձինք
Նախագիծը մշակվել է Հայաստանի Հանրապետության վարչապետի աշխատակազմի տեսչական մարմինների աշխատանքների համակարգման գրասենյակի կողմից:
5.Ակնկալվող արդյունքը
Նախագծի ընդունումը Տեսչական մարմնին անձի ֆունկցիոնալության գնահատման ոլորտում կտրամադրի իրենց գործառույթների իրականացման համար անհրաժեշտ գործիքակազմը:
- Այլ իրավական ակտերում փոփոխությունների և/կամ լրացումների անհրաժեշտությունը.
Նախագծի ընդունման դեպքում այլ իրավական ակտերում փոփոխություններ և/կամ լրացումներ կատարելու անհրաժեշտությունը բացակայում է:
- Կապը ռազմավարական փաստաթղթերի հետ. 2050 Հայաստանի վերափոխման ռազմավարություն, Կառավարության 2021-2026թթ. ծրագիր, ոլորտային և/կամ այլ ռազմավարություններ․
Նախագծի ուղղակի կապը ռազմավարական փաստաթղթերի հետ բացակայում է:
- Պետական կամ տեղական ինքնակառավարման մարմնի բյուջեում եկամուտների և ծախսերի էական ավելացման կամ նվազեցման վերաբերյալ
Նախագծի ընդունման կապակցությամբ պետական կամ տեղական ինքնակառավարման մարմնի բյուջեում եկամուտների և ծախսերի ավելացում կամ նվազեցում չի նախատեսվում։
