«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ՀՈԿՏԵՄԲԵՐԻ 5-Ի N 1717-Լ ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՀԻՄՆԱՎՈՐՈՒՄ

«Հայաստանի Հանրապետության կառավարության 2023 թվականի հոկտեմբերի 5-ի N 1717-Լ որոշման մեջ լրացում կատարելու մասին» Հայաստանի Հանրապետության կառավարության որոշման նախագծի ընդունման

1․ Իրավական ակտի ընդունման անհրաժեշտությունը

Նախագծի ընդունումը պայմանավորված է Ասիական զարգացման բանկի «Հարկաբյուջետային կայունության և ֆինանսական շուկաների զարգացման ծրագիր – Ենթածրագիր 3» քաղաքականության աղյուսակի մաս կազմող պարտավորության կատարման անհրաժեշտությամբ։      

2․ Ընթացիկ իրավիճակը և խնդիրները

Աղետների ռիսկի կառավարման արդյունավետությունը մեծապես կախված է ոչ միայն կանխարգելիչ և կազմակերպչական միջոցառումներից, այլև ֆինանսական կայուն և ճկուն մեխանիզմների առկայությունից։ Ներկայումս գործող Աղետների ռիսկի կառավարման 2023-2030 թվականների ռազմավարությունը ընդգրկում են մի շարք կարևոր ուղղություններ, սակայն բաց է մնում ֆինանսական պլանավորման և ֆինանսական ռեսուրսների կառավարման համակարգված ապահովման բաղադրիչը։ Աղետների ժամանակ անհրաժեշտ է օպերատիվ արձագանք և միջոցների արագ ուղղում։ Առանց նախօրոք մշակված ֆինանսական պլանավորման և պատասխանատու մարմնի հստակ մանդատի՝ առաջանում են ուշացումներ և անարդյունավետություն։

3․ Առաջարկվող կարգավորումները

Առաջարկվում է վերոնշյալ ռազմավարության N 1 հավելվածում լրացնել նոր կետ, ըստ որի՝ Ֆինանսների նախարարությունը կդառնա պատասխանատու մարմին Աղետների ռիսկի կառավարման 2023-2030 թվականների ռազմավարության շրջանակներում աղետների ռիսկերի կառավարման ֆինանսական պլանավորման, հետագա վերականգնման և միջազգային ֆինանսական աջակցություն ներգրավելու ուղղությամբ:

4․ Նախագծի մշակման գործընթացում ներգրավված ինստիտուտները և անձինք

Նախագիծը մշակվել է ՀՀ ներքին գործերի նախարարության կողմից:

5․ Ներկայացվող հարցի կապակցությամբ լրացուցիչ ֆինանսական միջոցների պահանջի անհրաժեշտությունը, ինչպես նաև Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունների մասին

Նշված նախագծի ընդունումը Հայաստանի Հանրապետության պետական բյուջեի ծախսերի կամ եկամուտների փոփոխություն չի առաջացնում:

6․ Ակնկալվող արդյունքը

Նախագծի ընդունումը կկանոնակարգի և կդյուրացնի Աղետների ռիսկի կառավարման 2023-2030 թվականների ռազմավարության շրջանակներում ֆինանսական պլանավորման, մասնավորապես՝ դրա շրջանակներում հետաղետային վերականգնման և այդ ուղղությամբ միջազգային ֆինանսական աջակցություն ներգրավելու գործընթացը, կապահովի հետաղետային վերականգնման միջոցառումների իրականացմանն ուղղված ֆինանսական միջոցների ներգրավումն ու կառավարումն, ինչպես նաև ոլորտում ներգրավված շահագրգիռ պետական մարմինների, մասնավոր և միջազգային կազմակերպությունների հետ համագործակցությամբ՝ կնպաստի աղետների ռիսկի կառավարման շրջանակներում միջազգային կազմակերպությունների կողմից ֆինանսական միջոցների ներգրավմանը։

7․ Կապը ռազմավարական փաստաթղթերի հետ. Հայաստանի վերափոխման ռազմավարություն 2050, կառավարության 2021-2026թթ. ծրագիր, ոլորտային և/կամ այլ ռազմավարություններ

Նախագիծը բխում է Ասիական զարգացման բանկի «Հարկաբյուջետային կայունության և ֆինանսական շուկաների զարգացման ծրագիր – Ենթածրագիր 3» քաղաքականության աղյուսակի մաս կազմող պարտավորության կատարման պահանջից։

ՀՀ ներքին գործերի նախարարություն