«Հայաստանի Հանրապետության կառավարության 2012 թվականի դեկտեմբերի 27-ի N 1667-Ն որոշման մեջ փոփոխություն կատարելու մասին», «Հայաստանի Հանրապետության կառավարության 2023 թվականի փետրվարի 9-ի N 167-Ն որոշման մեջ փոփոխություն կատարելու մասին» Հայաստանի Հանրապետության կառավարության որոշումների նախագծերը, «Հայաստանի Հանրապետության կրթության, գիտության, մշակույթի և սպորտի նախարարի 2021 թվականի մարտի 5-ի N 24-Ն հրամանում փոփոխություն կատարելու մասին», «Հայաստանի Հանրապետության կրթության, գիտության, մշակույթի և սպորտի նախարարի 2020 թվականի սեպտեմբերի 7-ի N 1162-Ա/2 հրամանում փոփոխություն կատարելու մասին» Հայաստանի Հանրապետության կրթության, գիտության, մշակույթի և սպորտի նախարարի հրամանների նախագծերը

Ըստ նախագծի՝ սահմանվել է, որ եթե տվյալ մոդուլով վերապատրաստված ուսուցիչների առնվազն 30%-ը չի հաղթահարել ատեստավորումը, ապա ԿԳՄՍ նախարարությունը կազմակերպությանը 3 տարով զրկում է տվյալ մոդուլի վերապատրաստում իրականացնելու իրավունքից։ Հաշվի առնելով համակարգի արդյունավետության բարձրացման և որակյալ կազմակերպություններին խրախուսելու անհրաժեշտությունը՝ առաջարկում եմ նաև սահմանել խրախուսման մեխանիզմ։ Օրինակ այն կազմակերպությունները, որոնք ապահովում են վերապատրաստված ուսուցիչների բարձր հաջողություն (օրինակ՝ 80% և ավելի ատեստավորում հաղթահարած), պետք է որևէ ձևով խրախուսվեն։

Ուսուցիչների հերթական ատեստավորման գործընթացի արդարացիությունն ու թափանցիկությունը բարձրացնելու նպատակով առաջարկում եմ կատարել փոփոխություն գնահատման մեխանիզմում։ Մասնավորապես՝ ուսուցչի գնահատմանը պետք է մասնակցեն ոչ միայն ինքը (ինքնագնահատում) և դպրոցի տնօրենը, այլև տվյալ առարկան դասավանդող մեկ այլ մասնագետ կամ տվյալ մեթոդական միավորման նախագահը: Իսկ վերջնական գնահատականը պետք է ստացվի նշված երեք գնահատականների միջինացման արդյունքում։ Այս մոտեցումը կնպաստի ավելի օբյեկտիվ գնահատմանը, կբարձրացնի վստահությունը արդյունքների նկատմամբ և կնպաստի ուսուցիչների միջև մասնագիտական համագործակցությանը։

Այս նախագծի ընդունումը անհրաժեշտ եմ համարում, քանի որ այն վերացնում է <<Հանրակրթության մասին>> օրենքի և նախարարի հրամանի միջև առկա ուղղակի իրավական հակասությունը՝ ապահովելով օրենսդրական դաշտի ներդաշնակությունը։ Այս փոփոխությունը ոչ միայն տեխնիկական շտկում է, այլև ունի կարևոր գործնական նշանակություն ՝ թույլ տալով ավելի արագ և արդյունավետ լուծել մարզային դպրոցների մանկավարժական կադրերի համալրման խնդիրը։ Արդյունքում ուսուցչի կարիք ունեցող դպրոցները ստիպված չեն լինի սպասել երկրորդ անհաջող մրցույթին, ինչը կնպաստի կրթության անընդհատության ապահովմանը և մարզերում կրթության որակի բարելավմանը;