ՄԵԿՈՒՍԱՑՄԱՆ ԵՎ ՕԲՍԵՐՎԱՑԻԱՅԻ ԻՐԱԿԱՆԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Կարգում անհրաժեշտ է սահմանել տվյալների հավաքման, մշակման, ապանձնավորման և կանոնավոր հրապարակման պարտականություն՝ մարդու իրավունքների պաշտպանության ապահովման և քաղաքականության ձևավորման նպատակով։ Առաջարկում ենք հավելվածը լրացնել նոր կետով՝ հետևյալ բովանդակությամբ. «X. Լիազոր մարմինն ապահովում է մեկուսացման և օբսերվացիայի վերաբերյալ տվյալների պարբերական հավաքումը, ապանձնավորումը և հրապարակումը՝ մարդու իրավունքների պաշտպանության վերլուծության և քաղաքականության մշակման նպատակով։ Հավաքվող տվյալները ներառում են տարիքային, սեռային, հաշմանդամության, սոցիալ-տնտեսական և այլ համապատասխան հատկանիշներ՝ առանց անձի նույնականացման հնարավորություն տվող տվյալների հրապարակման։»։

Կարգում անհրաժեշտ է սահմանել մեկուսացում կամ օբսերվացիա իրականացնելու հրահանգի, ինչպես նաև դրա կատարման վայրի կամ պայմանների վերաբերյալ որոշումների բողոքարկման իրավունք և մեխանիզմ։ Առաջարկում ենք հավելվածը լրացնել նոր կետով՝ հետևյալ բովանդակությամբ. «X. Մեկուսացում կամ օբսերվացիա իրականացնելու հրահանգը, ինչպես նաև դրա կատարման վայրը և պայմանները ենթակա են բողոքարկման անձի կամ նրա օրինական ներկայացուցչի դիմումի հիման վրա։»։

Կարգում պետք է հստակ ամրագրվի, որ մեկուսացումը և օբսերվացիան կիրառվում են միայն որպես վերջին միջոց, երբ առկա են համաճարակաբանական հիմքեր, և հանրային առողջության պաշտպանությունը հնարավոր չէ ապահովել պակաս սահմանափակող միջոցներով։ Առաջարկում ենք հավելվածը լրացնել նոր կետով՝ հետևյալ բովանդակությամբ. «X. Մեկուսացումը կարող է կիրառվել միայն այն դեպքում, երբ նախապես դիտարկվել և բավարար արդյունք չեն տվել պակաս սահմանափակող այլ միջոցներ։ Մեկուսացում և օբսերվացիա իրականացնելու հրահանգից առաջ լիազոր մարմինը կամ տեսչական մարմինը պարտավոր են անձին առաջարկել տալ հոժարակամ գրավոր համաձայնություն՝ մշտադիտարկման պայմանով (այսուհետ՝ հոժարակամ համաձայնություն), որը ներառում է նրա կողմից վարակիչ հիվանդության կանխարգելման նպատակով ինքնամեկուսացման, բուժման, տեղաշարժի սահմանափակման և այլ հնարավոր միջոցառումներին հետևելու պարտավորությունների ընդունումը»։