«Բնակչության անհատական պաշտպանության միջոցների տեսակները, դրանց ցանկը և ապահովման կարգը հաստատելու մասին» ՀՀ կառավարության որոշման նախագիծ

ՀԻՄՆԱՎՈՐՈՒՄ

«Բնակչության անհատական պաշտպանության միջոցների տեսակները, դրանց ցանկը ԵՎ ապահովման կարգը հաստատելու մասին» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1․ Ընթացիկ իրավիճակը և իրավական ակտերի ընդունման անհրաժեշտությունը.

Ներկայումս ոլորտը կարգավորվում է ՀՀ կառավարության 2000 թվականի հոկտեմբերի 25-ի «Բնակչության անհատական պաշտպանության միջոցների տեսակները, դրանց ցանկը և ապահովման կարգը հաստատելու մասին» N 679 որոշմամբ։

Նախագծի ընդունման անհրաժեշտությունը պայմանավորված է «Արտակարգ իրավիճակներում բնակչության պաշտպանության մասին» օրենքի՝ 2027 թվականի հունվարի 1-ից ուժը կորցրած ճանաչվելու հանգամանքով։

Միաժամանակ, նախագծի ընդունման համար հիմք է հանդիսանում «Աղետների ռիսկի կառավարման և բնակչության պաշտպանության մասին օրենքի 4-րդ հոդվածի 1-ին մասը, ինչպես նաև՝ ՀՀ վարչապետի 2025 թվականի օգոստոսի 12-ի թիվ 705-Ա որոշումը։

2․ Առաջարկվող կարգավորման բնույթը․

Նախագծով պետական կառավարման համակարգի մարմնի անվանումը համապատասխանեցվում է ներկայիս կառավարման մարմնի անվան հետ։ Մասնավորապես, ներկայումս «Արտակարգ իրավիճակներում բնակչության պաշտպանության մասին» օրենքով լիազոր մարմին է հանդիսանում ՀՀ ներքին գործերի նախարարությունը։ Բացի այդ, նախագծով կանոնակարգվում է բնակչությանն անհատական պաշտպանության միջոցներով ապահովման գործընթացը։

Միևնույն ժամանակ, «Արտակարգ իրավիճակներում բնակչության պաշտպանության մասին» օրենքը 2027 թվականի հունվարի 1-ից ուժը կորցրած է ճանաչվելու, և միաժամանակ ուժի մեջ է մտնելու «Աղետների ռիսկի կառավարման և բնակչության պաշտպանության մասին օրենքը, որի 4-րդ հոդվածի 1-ին մասով սահմանվում է նոր լիազորող նորմ, համաձայն որի՝ բնակչության անհատական պաշտպանության միջոցների տեսակները, դրանց ցանկը և ապահովման կարգը հաստատում է Կառավարությունը, իսկ «Աղետների ռիսկի կառավարման և բնակչության պաշտպանության մասին» օրենքի 2-րդ հոդվածի 1-ին մասի 33-րդ կետով սահմանված մարմինը հանդիսանալու է որպես լիազոր մարմին։

3․ Նախագծի մշակման գործընթացում ներգրավված ինստիտուտները, անձինք և նրանց դիրքորոշումը.

Նախագիծը մշակվել է ՀՀ ներքին գործերի նախարարության կողմից:

4․ Ակնկալվող արդյունքը․

2027 թվականի հունվարի 1-ից կապահովվի «Աղետների ռիսկի կառավարման և բնակչության պաշտպանության մասին» օրենքի 4-րդ հոդվածի 1-ին մասի կիրառումը։

5․ Տեղեկատվություն լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին․

Նախագծի ընդունման կապակցությամբ լրացուցիչ ֆինանսական միջոցների անհրաժեշտություն, պետական բյուջեի եկամուտներում և ծախսերում փոփոխություններ չեն նախատեսվում:

6․ Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

Նախագծի ընդունումը բխում է ՀՀ կառավարության 2023 թվականի  հոկտեմբերի 5-ի N 1717-Լ որոշմամբ հաստատված Աղետների ռիսկի կառավարման 2023-2030թթ․ ռազմավարությունից։

ՀՀ ներքին գործերի նախարարություն