Հիմնավորում
«Հայաստանի Հանրապետության կառավարության 2017 թվականի հուլիսի 6-ի N 772-Ն որոշման մեջ փոփոխություն կատարելու մասին» ՀՀ կառավարության որոշման նախագծի վերաբերյալ
- Իրավական ակտի անհրաժեշտությունը (նպատակը). Նախագծի նպատակը ՀՀ ազգային ժողովի կողմից 2024 թվականի դեկտեմբերի 4-ին ընդունված` «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՕ-499-Ն ՀՀ օրենքով ՀՀ հարկային օրենսգրքում (այսուհետ՝ Օրենսգիրք) կատարված որոշ փոփոխությունների կիրարկումն ապահովելն է:
- Կարգավորման հարաբերությունների ներկա վիճակը և առկա խնդիրները. Վերոնշյալ օրենքով փոփոխություններ և լրացումներ են կատարվել ՀՀ հարկային օրենսգրքում (այսուհետ՝ Օրենսգիրք) և վերանայվել են գիտահետազոտական աշխատանքների հետ կապված ձևակերպումները։ Բացի այդ, խմբագրվել է Օրենսգրքի 121-րդ հոդվածի 6-րդ մասը և սահմանվել է, որ գիտահետազոտական աշխատանքների հետ կապված՝ շահութահարկ վճարողի հարկման բազայի որոշման նպատակով համախառն եկամուտը նվազեցնելու արտոնությունը կիրառվում է Կառավարության սահմանած չափանիշներին համապատասխանող գիտական հետազոտությունների և փորձարարական մշակումների աշխատանքների վրա կատարվող ծախսերի մասով (մինչև նշյալ փոփոխությունը չափանիշները սահմանված էին Օրենսգրքի 121-րդ հոդվածի 6-րդ մասով)։
Խնդիրն այն է, որ ՀՀ կառավարության 2017 թվականի հուլիսի 6-ի N 772-Ն որոշումը կիրառելի է միայն ԱԱՀ-ից ազատվող գիտահետազոտական աշխատանքների մասով։ Բացի այդ, որոշման մեջ կիրառվող ձևակերպումները չեն համապատասխանում Օրենսգրքում կատարված փոփոխությունների արդյունքում վերանայված՝ գիտահետազոտական աշխատանքների հետ կապված ձևակերպումներին:
- Առկա խնդիրների առաջարկվող լուծումները. Նախագծով առաջարկվում է ՀՀ կառավարության 2017 թվականի հուլիսի 6-ի N 772-Ն որոշմամբ սահմանել շահութահարկով հարկման բազայի որոշման նպատակով համախառն եկամուտը նվազեցնելու արտոնությունը կիրառելու նպատակով գիտական հետազոտությունների և փորձարարական մշակումների չափանիշները, ինչպես նաև որոշման մեջ կիրառվող ձևակերպումները համապատասխանեցնել Օրենսգրքում կատարված փոփոխությունների արդյունքում վերանայված՝ գիտահետազոտական աշխատանքների հետ կապված ձևակերպումներին:
- Կարգավորման առարկան. Նախագծի կարգավորման առարկան աշխատանքները գիտական հետազոտություններ և փորձարարական մշակումներ համարելու չափանիշներն են:
- Նախագծի մշակման գործընթացում ներգրավված ինստիտուտները և անձինք. Նախագիծը մշակվել է ՀՀ ֆինանսների նախարարության կողմից:
- Իրավական ակտի կիրառման դեպքում ակնկալվող արդյունքը. Նախագծի ընդունման արդյունքում ակնկալվում է կարգավորել շահութահարկով հարկման բազայի որոշման նպատակով համախառն եկամուտը նվազեցնելու արտոնությունը կիրառելու նպատակով աշխատանքները գիտական հետազոտություններ և փորձարարական մշակումներ համարելու չափանիշների, ինչպես նաև ՀՀ կառավարության 2017 թվականի հուլիսի 6-ի N 772-Ն որոշմամբ սահմանված՝ գիտահետազոտական աշխատանքների հետ կապված ձևակերպումները համապատասխանեցնելու հետ կապված հարաբերությունները:
Միաժամանակ, նախագծի ընդունումը լրացուցիչ ֆինանսական միջոցների անհրաժեշտություն չի պահանջում, իսկ դրա ընդունմամբ պայմանավորված՝ պետական բյուջեի եկամուտների էական նվազեցում կամ ծախսերի ավելացում տեղի չի ունենա:
- Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026 թվականների ծրագիր, ոլորտային և/կամ այլ ռազմավարություններ․
Նախագիծը բխում է Կառավարության 2021-2026 թվականների ծրագրի մի շարք բաժիններով սահմանված քաղաքականության ուղղություններից։ Մասնավորապես՝
- Գործարար և ներդրումային միջավայրի բարելավում մասով սահմանված քաղաքականության ուղղություններից, մասնավորապես, մասնավոր հատվածում գիտահետազոտական աշխատանքները, գյուտարարությունն ու նորարարությունը խրախուսելու նպատակով ստեղծվելու են արտոնագրված գյուտերի առևտրայնացումից ստացվող եկամուտների հարկման առավել խրախուսող մեխանիզմներ,
- «Հարկաբյուջետային քաղաքականություն» մասով սահմանված քաղաքականության ուղղություններից, ըստ որի՝
- Հարկաբյուջետային քաղաքականության հիմնական նպատակը պետական ֆինանսական համակարգի բարձր արդյունավետությունն է: Դրան հասնելու նպատակով Կառավարությունը շարունակելու է հարկային քաղաքականության այնպիսի բարեփոխումները, որոնք նպաստելու են բիզնես միջավայրի մրցունակության բարձրացմանը,
- Կառավարության կողմից իրականացվող հարկային քաղաքականությունն ուղղված է լինելու տնտեսության ներդրումային գրավչության բարձրացմանն ու տնտեսական ակտիվության մակարդակի բարելավմանը՝ դրանով իսկ ստեղծելով կայուն նախադրյալներ արտահանման և երկարաժամկետ տնտեսական աճի, հանրային բարիքի վերաբաշխման և հարկաբյուջետային կայունության ամրապնդման համար:
