Հիշել նախագիծը

Գտնվում է ՀՀ կառավարությունում

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՐԵԱԿԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ԵՎ «ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀՀ ՕՐԵՆՔՆԵՐԻ ՆԱԽԱԳԾԵՐԻ ՓԱԹԵԹ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՐԵԱԿԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ», «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՆԵՐԻ ԸՆԴՈՒՆՄԱՆ

 

 

  1. Ընթացիկ իրավիճակը և իրավական ակտի ընդունման անհրաժեշտությունը

Տնտեսական աճի և գործարարության զարգացման, ինչպես նաև քրեական օրենսգրքով միայն հանրային վտանգավորության որոշակի աստիճան ունեցող արարքների նախատեսման և քրեադատավարական ռեսուրսների խնայողության նպատակով անհրաժեշտություն է առաջացել ապաքրեականացնել տնտեսական գործունեության դեմ ուղղված որոշ հանցագործություններ: Այդ նպատակով ՀՀ վարչապետը ՀՀ կառավարության 2017 թվականի նոյեմբերի 30-ի նիստին տվել է համապատասխան հանձնարարական: 

  Տնտեսական որոշ հանցագործությունների ապաքրեականացման անհրաժեշտությունը բազմիցս ընդգծվել է ինչպես ՀՀ վարչապետին կից գործող փոքր և միջին ձեռնարկատիրության խորհրդում, այնպես էլ գիտական շրջանակներում: Իսկ ՀՀ նոր քրեական օրենսգրքի նախագծով մի շարք հանցավոր արարքներ արդեն նախատեսված չեն:

 

  1. Ընթացիկ իրավիճակը և խնդիրները

 

Գործող քրեական օրենսգրքի տնտեսական գործունեության դեմ ուղղված հանցագործությունների գլուխը բավականին ծանրաբեռնված է և պարունակում է հանցանքներ, որոնք ընկնում են քրեական օրենսգրքի այլ հանցակազմերի ներքո, ինչպես նաև ցածր հանրային վտանգավորության պատճառով կարող են արդյունավետորեն կարգավորվել քաղաքացիաիրավական կամ վարչական պատասխանատվության դաշտում: Մասնավորապես, կեղծ գովազդի հոդվածով, ըստ www.court.am կայքում հրապարակված դատական վիճակագրության, վերջին տարիներին որևէ քրեական գործ դատարան չի տարվել: Ավելին, ըստ ՀՀ ոստիկանության ինֆորմացիոն կոնտրոնի տրամադրած տվյալների, 2015-2017 թվականներին անգամ որևէ հանցադեպ չի գրանվել: Բացի այդ, նշված բնագավառի նկատմամբ արդեն իսկ գործում են պետական վերահսկողության արդյունավետ կառուցակարգեր, ուստի, նպատակահարմար է նշված արարքը տանել վարչական պատասխանատվության տիրույթ:

Բացառապես քաղաքացիաիրավական բնույթ ունեն ապրանքային նշանի ապօրինի օգտագործման և վարկի ոչ նպատակային օգտագործման հետ կապված հարաբերությունները, որոնց հետ կապված ևս քրեական գործեր գրեթե չեն քննվում դատարանների կողմից: Մասնավորապես, ապրանքային նշանի ապօրինի օգտագործման հետ կապված 2014-2017 թվականներին գրանցված մի քանի դեպքից որևէ մեկով գործը դատարան չի հասել՝ քրեական գործի հարուցումը մերժելու, բողոքի բացակայության, գործը կասեցնելու կամ հանցադեպի բացակայության պատճառով հաշվառումից հանվելու պատճառով: Բացի այդ, ապրանքային նշանն ապօրինի օգտագործելը, ըստ ՀՀ քրեական դատավարության օրենսգրքի 183-րդ հոդվածի, մասնավոր մեղադրանքի գործ է, ուստի ակնհայտ է, որ օրենսդիրը այն դասում է նվազ հանրային վտանգավորություն ունեցող արարքների շարքին և այն կարող է կարգավորվել քաղաքացիաիրավական հարաբերությունների միջոցով: Ինչ վերաբերում է վարկը ոչ նպատակային օգտագործելուն, ապա այդ հոդվածով 2012-2017 թվականների ընթացքում քննվել է ընդամենը 2 գործ: Դրա քրեաիրավական պաշտպանության անհրաժեշտության բացակայության մասին է վկայում նաև այն, որ վարկը ոչ նպատակային օգտագործելը նախատեսված չէ օրինակ Էստոնիայի, Գերմանիայի և Կանադայի քրեական օրենսգրքերով:

Բացի այդ, անհասկանալի է, թե ինչու է օրենսգիրքը նախատեսում հենց կեղծ գինի, օղի կամ այլ ալկոհոլային խմիչք պատրաստելը կամ դրանցով մարդու առողջությանը վնաս պատճառելը: Սա ավելորդ կարգավորում է: Ավելի նպատակահարմար է նշված արարքի համար քրեական պատասխանատվության ենթարկել ընդհանուր կարգով, ինչպես դա արվում է արտասահմանյան երկրների քրեական օրենսգրքերով:

210-213-րդ հոդվածների վերաբերյալ առաջարկվող փոփոխությունների և լրացումների հիմնավորումը ներկայացված է ՀՀ տնտեսական զարգացման և ներդրումների նախարարության կողմից 29.01.2018թ. ՀՀ կառավարության աշխատակազմ ներկայացված 01/17.3/597-18 թվակիր գրությամբ:

  

  1. Կարգավորման նպատակը և բնույթը

Նախագծերի փաթեթով առաջարկվող փոփոխությունների համաձայն որոշ արարքներ քրեական պատասխանատվության դաշտից կտեղափոխվեն վարչական պատասխանատվության դաշտ, իսկ որոշներն էլ՝ քաղաքացիաիրավական:

 

  1. Ակնկալվող արդյունքը

 Նախագծերի փաթեթի ընդունման դեպքում իրավական հիմքեր կստեղծվեն գործարարության զարգացման և խրախուսման, քրեական օրենսգրքի բեռնաթափման, ցածր հանրային վտանգավորություն ունեցող արարքների ապաքրեականացման և քրեադատավարական ռեսուրսների խնայողության համար:

  • Քննարկվել է

    06.02.2018 - 22.02.2018

  • Տեսակ

    Օրենք

  • Ոլորտ

    Էկոնոմիկա, Տնտեսական, Քրեական օրենսդրություն

  • Նախարարություն

    Տնտեսական զարգացման և ներդրումների նախարարություն

Հանրային քննարկում

22.02.2018 15:54

Երեւան 0010, Մ.Մկրտչյան 5

Ուղարկել նամակ նախագծի հեղինակին

Ձեր ուղարկած առաջարկը կտեղադրվի կայքում 10 աշխ. օրվա ընթացքում

Չեղարկել

Դիտումներ` 681

Տպել

Առաջարկներ`

Լիանա Բաբաջանյան

09.02.2018

Անթույլատրելի է Քրեական օրենսգրքի 191-րդ հոդվածի ապաքրեականացումը, քանի որ խոսքը վերաբերվում է ոչ միայն ֆիզիկական և իրավաբանական անձանց կողմից վարկը ոչ նպատակային օգտագործելուն, այլև պետության, ի դեմս՝ պետական մարմինների, միջազգային կազմակերպությունների կամ այլ պետությունների կողմից տրամադրված վարկերի օգտագործելուն: Ընդհակառակը, օրենսդրությունն պետք է միտված լինի նման վարկերի օգտագործման նկատմամբ վերահսկողության ուժեղացմանը: Իսկ այն հանգամանքը, որ նման հոդվածներով հարուցված քրեական գործեր չկան կամ գրեթե չկան, ևս պայմանավորված է պատասխանատվության խստությամբ:

Artur Vardanyan

07.02.2018

Քանի որ 191-րդ հոդվածը վերաբերվում է նաև պետական վարկերին ու պետական կորուստներին` անհրաժեշտ է այն թողնել որպես քրեորեն պատժելի արարք` նման արարքները չխրախուսելու համար: 198, 207 հոդվածները կարող են ուղղակիորեն կապված լինել մարդկանց առողջության հետ, քանի որ կեղծ գովազդի արդյունքում, մարդիկ կարող են օգտագործել սխալ ներկայացված նյութեր և ապրանքներ: Իսկ կեղծ ալկոհոլի ստեղծումը դա կարող է դառնալ նույնիսկ մահվան պատճառ: Խնդրում եմ այս հոդվածները թողնել քրական օրենսգրքում:

Տեսնել ավելին