Հիշել նախագիծը

Լրամշակման փուլում է

«Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ և լրացումներ կատարելու մասին», «Տեղական ինքնակառավարման մասին» Հայաստանի Հանրապետության օրենքում փոփոխություններ կատարելու մասին» Հայաստանի Հանրապետության օրենքների նախագծեր

ՀԻՄՆԱՎՈՐՈՒՄ

«Հայաստանի Հանրապետության վարչատարածքային բաժանման մասին» օրենքում փոփոխություններ կատարելու մասին», «Տեղական ինքնակառավարման մասին» օրենքում  լրացում և փոփոխություն կատարելու մասին» օրենքների ընդունման

 

  1. Ընթացիկ իրավիճակը և իրավական ակտի ընդունման անհրաժեշտությունը

 

2011 թվականի նոյեմբերի 10-ին ՀՀ կառավարության կողմից հավանության արժանացավ «Համայնքների խոշորացման և միջհամայնքային միավորումների ձևավորման հայեցակարգը»: Դրանով իսկ ՀՀ կառավարությունը հաստատեց, որ վարչատարածքային բարեփոխումներն անհրաժեշտ են՝ համայնքների զարգացման շարունակականության ապահովման, համայնքի կողմից առավել որակյալ և մատչելի ծառայությունների մատուցման, խոշորացված համայնքների միավորված ռեսուրսների (մարդկային, ֆինանսական, հողային և այլն) առավել արդյունավետ օգտագործման տեսանկյունից: Այնուհետ, համայնքների խոշորացման գործընթացի անհրաժեշտությունը կարևորվեց նաև այլ փաստաթղթեթում, մասնավորապես, ՀՀ կառավարության տարեկան ծրագրերում, Կայուն զարգացման ծրագրում, ՀՀ 2014-2025 թթ. հեռանկարային զարգացման ռազմավարական ծրագրում և այլն:

2016 թվականի փետրվարի 14-ից ի վեր իրականացվել է համայնքների միավորման թվով 54 ծրագիր, ինչի արդյունքում 486 համայնքների միավորման արդյունքում ձևավորվել է թվով 54 համայնք:

Միավորված համայնքներում իրականացվել են վերլուծություններ՝ համայնքային փնջերի ծրագրային առաջնահերթությունների վերաբերյալ, ինչի արդյունքում հրապարակվել է այդ վերլուծությունների ամփոփ հաշվետվությունը (այն զետեղված է ՀՀ տարածքային կառավարման և ենթակառուցվածքների նախարարության պաշտոնական կայքում):

Վարչատարածքային բարեփոխումների ծրագրի շրջանակներում միավորված համայնքներում իրականացվել են ներդրումային ծրագրեր՝ ԱՄՆ ՄԶԳ (8.6 մլն ԱՄՆ դոլար) և Շվեյցարական դաշնային զարգացման գործակալության (2,3 մլն ԱՄՆ դոլար) ֆինանսավորմամբ: Ընթացքի մեջ է սոցիալական ներդրումների և տեղական զարգացման ծրագրի 2-րդ բաղադրիչը, որի շրջանակներում միավորված համայնքներին արդեն տրամադրվել է թվով 89 կոմունալ, ինքնագնաց և կցովի գյուղատնտեսական տեխնիկա։

         ՀՀ-ում վարչատարածքային բարեփոխումների շարունակականությունն ապահովելու նպատակով՝ ՀՀ կառավարության ծրագրում (ՀՀ կառավարության 2019 թվականի փետրվարի 8-ի №65-Ա), ինչպես նաև ՀՀ կառավարության 2019 թվականի մայիսի 16-ի №650-Լ որոշմամբ հաստատված գերակա խնդիրների և միջոցառումների ցանկում ընդգրկվել է «Վարչատարածքային բաժանման մասին օրենքում փոփոխություններ և լրացումներ կատարելու մասին» ՀՀ օրենքի նախագիծը ՀՀ կառավարություն ներկայացնելը» միջոցառումը:

Նախագծով նախատեսվում է ձևավորվել հետևյալ համայնքային փնջերը.

ՀՀ Արագածոտնի մարզի Թալին՝ Թալին, Ագարակավան, Ակունք, Աշնակ, Գառնահովիտ, Դաշտադեմ, Դավթաշեն, Դիան, Եղնիկ, Զարինջա, Զովասար, Թաթուլ, Իրինդ, Ծաղկասար, Կաթնաղբյուր, Կարմրաշեն, Կաքավաձոր, Հացաշեն, Մաստարա, Ներքին Բազմաբերդ, Ներքին Սասնաշեն, Նոր Արթիկ, Շղարշիկ, Ոսկեթաս, Պարտիզակ, Սուսեր, Վերին Բազմաբերդ, Վերին Սասնաշեն, Ցամաքասար (թվով 29),

ՀՀ Արագածոտնի մարզի Դդմասար՝ Դդմասար, Արևուտ, Թլիկ, Կանչ, Հակո, Սորիկ (թվով 6),

         ՀՀ Արարատի  մարզի Մասիս՝ ք. Մասիս, Ազատաշեն, Այնթապ, Արբաթ, Արգավանդ, Արևաբույր, Գեղանիստ, Գետափնյա, Դաշտավան, Դարակերտ, Դարբնիկ, Զորակ, Խաչփար, Հայանիստ, Հովտաշատ, Ղուկասավան, Մարմարաշեն, Նիզամի, Նոր Խարբերդ, Նոր Կյուրին, Նորաբաց, Նորամարգ, Ջրահովիտ, Ռանչպար, Սայաթ Նովա, Սիս, Սիփանիկ (թվով 27),

         ՀՀ Արարատի  մարզի Արաքս՝ Մխչյան, Աբովյան, Ազատավան, Արաքսավան, Արևշատ, Բաղրամյան, Բարձրաշեն, Բերքանուշ, Բյուրավան, Բուրաստան, Գետազատ, Դեղձուտ, Դիմիտրով, Դիտակ, Լանջազատ, Կանաչուտ, Հովտաշեն, գ. Մասիս, Մրգանուշ, Մրգավետ, Նշավան, Ջրաշեն, Վարդաշեն (թվով 23),

         ՀՀ Արմավիրի մարզի Մեծամոր՝ Մեծամոր, Ակնալիճ, Աղավնատուն, Ամբերդ, Այգեշատ, Արագած, Արշալույս, Արտաշար, Արևիկ, Գեղակերտ, Դաշտ, Դողս, Եղեգնուտ, Զարթոնք, Լեռնամերձ, Ծաղկալանջ, Ծաղկունք, Ծիածան, Հայթաղ, Հովտամեջ, Մայիսյան, Մրգաշատ, Մրգաստան, Շահումյան, Շահումյանի թռչնաֆաբրիկա, Տարոնիկ (թվով 26):

         ՀՀ Լոռու մարզի Թումանյան՝ Թումանյան, Դսեղ, Ձորագետ, Չկալով (թվով 4),

         ՀՀ Լոռու մարզի Սպիտակ՝ Սպիտակ, Արևաշող, Գեղասար, Գոգարան, Լեռնանցք, Լեռնավան, Լուսաղբյուր, Խնկոյան, Ծաղկաբեր, Կաթնաջուր, Հարթագյուղ, Արջհովիտ, Մեծ Պարնի, Նոր Խաչակապ, Շենավան, Շիրակամուտ, Ջրաշեն, Սարալանջ, Սարահարթ, Սարամեջ, Քարաձոր (թվով 21),

         ՀՀ Կոտայքի մարզի Աբովյան՝ Աբովյան, Ակունք, Առինջ, Արամուս, Բալահովիտ, Գեղաշեն, Գետարգել, Կաթնաղբյուր, Կամարիս, Մայակովսկի, Պտղնի, Վերին Պտղնի (թվով 12),

         ՀՀ Կոտայքի մարզի Նաիրի՝ Եղվարդ, Արգել, Գետամեջ, Թեղենիք, Մրգաշեն, Նոր Արտամետ, Նոր Գեղի, Նոր Հաճն, Պռոշյան, Քանաքեռավան, Քասախ, Քարաշամբ (թվով 12),

         ՀՀ Կոտայքի մարզի Ծաղկաձոր՝ Ծաղկաձոր, Մեղրաձոր (թվով 2),

         ՀՀ Շիրակի մարզի Արթիկ՝ Արթիկ, Անուշավան, Արևշատ, Գեղանիստ, Գետափ, Լեռնակերտ, Լուսակերտ, Հայկասար, Հայրենյաց, Հառիճ, Հոռոմ, Հովտաշեն, Մեծ Մանթաշ, Մեղրաշեն, Նահապետավան, Նոր Կյանք, Պեմզաշեն, Սարալանջ, Սարատակ, Սպանդարյան, Վարդաքար, Տուֆաշեն, Փանիկ, Փոքր Մանթաշ (թվով 24):

         Այսպիսով, առաջարկվող ծրագրերում ներգրավված է լինելու թվով 186 համայնք, որոնց միավորման արդյունքում ձևավորվելու է թվով 11 համայնք:

         Միավորվող համայնքների տեղական ինքնակառավարման մարմինների  հետ (նաև բնակիչների հետ «Town Hall» ձևաչափով) կազմակերպվել են քննարկումներ, որոնց արդյունքներով մշակվել է «Վարչատարածքային բաժանման մասին» Հայաստանի Հանրապետության օրենքում փոփոխություններ և լրացումներ կատարելու մասին» օրենքի նախագիծը: Գերիշխող համայնքներում քննարկումների ընթացքում բնակչության մեծամասնությունը հակված է եղել համայնքների միավորման «շրջանային» մոդելին: Միավորվող Դդմասար համայնքը ձևավորվում է թվով 5 համայնքների միավորումից: Այդ համայնքներում հիմնական բնակչությունը բաղկացած է ազգային փաքրամասնություն համարվող եզդի բնակչությունից: Ազգային փոքրամասնությունների պաշտպանության մասին շրջանակային կոնվենցիայով ՀՀ ստանձնած պարտավորությունների համաձայն՝ այդ համայնքները միավորվում են միմյանց հետ, որպեսզի չնվազի այդ համայնքների բնակչության կառուցվածքային կազմը:

         «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ և լրացումներ կատարելու մասին» 09.06.17 ՀՕ-93-Ն օրենքով միավորված Գեղամասար համայնքի կենտրոնի փոփոխությունը պայմանավորված է այն հանգամանքով, որ Գեղամասար համայնքի ավագանին իր 17.09.2020թ. №45 որոշմամբ ուղերձով դիմել է ՀՀ վարչապետին և Ազգային ժողովին համայնքային կենտրոնը Սոթք գյուղից Գեղամասար գյուղ տեղափոխելու առաջարկով: 

         Նախագծում ներառվել է նաև Կադաստրի կոմիտեի կողմից մշակված «Հայաստանի Հանրապետության վարչատարածքային բաժանման մասին» ՀՀ օրենքում փոփոխություններ կատարելու մասին» ՀՀ օրենքի նախագիծը, որի հիմքում ընկած է ՀՀ աշխարհագրական օբյեկտների անվանակոչումների և անվանափոխումների մասնագիտական հանձնաժողովի՝ 2020 թվականի օգոստոսի 21-ին կայացած №2020-02 նիստի ընթացքում ընդունված առաջարկությունները, որոնք ձևավորվել էին ՀՀ Արագածոտնի, Արարատի, Լոռու և Սյունիքի մարզպետների որոշումների հիման վրա:

         Նախագծով նախատեսվում է Սյունիքի մարզի Կապան համայնքի բնակավայրերի ցանկը լրացնել Ըրկենանց բնակաբայրով: Այդ առաջարկությունը ստացվել է Կապան համայնքի ղեկավարից, որը փոխանցվել է Կադաստրի կոմիտե և քննարկվել է ՀՀ աշխարհագրական օբյեկտների անվանակոչումների և անվանափոխումների մասնագիտական հանձնաժողովի՝ 2020 թվականի օգոստոսի 21-ին կայացած №2020-02 նիստի ընթացքում և ստացել դրական եզրակացություն:

  1. Առաջարկվող կարգավորման բնույթը

 

ՀՀ տարածքային կառավարման և ենթակառուցվածքների նախարարության կողմից մշակվել է «Հայաստանի Հանրապետության վարչատարածքային բաժանման մասին» օրենքում փոփոխություններ կատարելու մասին» ՀՀ օրենքի նախագիծը, որի համաձայն՝ նախատեսվում է իրականացնել համայնքների միավորման 11 ծրագիր՝ Արագածոտնի մարզի Թալին, Դդմասար, Արարատի մարզի Մասիս, Արաքս, Արմավիրի մարզի Մեծամոր, Լոռու մարզի Թումանյան, Սպիտակ, Կոտայքի մարզի Աբովյան, Նաիրի, Ծաղկաձոր, Շիրակի մարզի Արթիկ համայնքային փնջերում:

«Տեղական ինքնակառավարման մասին» Հայաստանի Հանրապետության օրենքում  փոփոխություններ կատարելու նպատակն է՝ վերոնշյալ համայնքներում նշանակել համայնքի ավագանու ընտրություն, միավորվող համայնքների տեղական ինքնակառավարման մարմինների լիազորությունները դադարեցնելու և միավորված համայնքների տեղական ինքնակառավարման մարմինների լիազորությունների ստանձնման ժամկետների վերաբերյալ օրենքով տալ իրավակարգավորումներ:

 

  1. Նախագծի մշակման գործընթացում ներգրավված ինստիտուտները, անձինք և նրանց դիրքորոշումը

        

ՀՀ տարածքային կառավարման և ենթակառուցվածքների նախարարություն

  1. Ակնկալվող արդյունքը

        

Իրավական ակտերի փաթեթի կիրառման դեպքում կապահովվի համայնքների միավորման գործընթացի իրավական բազան:

  • Քննարկվել է

    07.12.2020 - 22.12.2020

  • Տեսակ

    Օրենք

  • Ոլորտ

    Տարածքային կառավարման և զարգացման

  • Նախարարություն

    Տարածքային կառավարման և ենթակառուցվածքների նախարարություն

Ուղարկել նամակ նախագծի հեղինակին

Ձեր ուղարկած առաջարկը կտեղադրվի կայքում 10 աշխ. օրվա ընթացքում

Չեղարկել

Դիտումներ` 15144

Տպել

Առաջարկներ`

Gayane Simonyan

21.12.2020

Կտրականապես դեմ եմ Կոտայքի մարզի Ակունք համայնքը ՀՀ Կոտայքի մարզի Աբովյան՝ Աբովյան, Ակունք, Առինջ, Արամուս, Բալահովիտ, Գեղաշեն, Գետարգել, Կաթնաղբյուր, Կամարիս, Մայակովսկի, Պտղնի, Վերին Պտղնի (թվով 12) համայնքային փնջում ընդգրկելուն: Փաստորեն, ըստ նախագծի, Ակունք գյուղը պետք է ընդգրկվի վերոնշյալ համայնքային փնջում, ինչը ենթադրում է Ակունք խոշորացված համայնքի կազմալուծում: Այնինչ, Ակունք խոշորացված համայնքը, որն ընդգրկում է օրգանապես արդյունավետորեն միմյանց հետ կապված 8 գյուղեր (Ակունք, Կոտայք, Կապուտան, Հատիս, Զովաշեն, Սևաբերդ, Զառ և Նոր գյուղ) բավականին կայացած, շոշափելի առաջընթաց գրանցող, շարունակաբար և համաչափ զարգացող համայնք է, որտեղ մշտապես վեր են հանվում իրական խնդիրները, հստակեցվում են դրանց հաղթահարման ուղիները, սահմանվում են առաջնահերթություններ և հաջողությամբ կյանքի են կոչվում դրանք: Պատահական չէ, որ 2019-ին Ակունք խոշորացված համայնքը «Համայնքների միության» և Տարածքային կառավարման նախարարության կողմից ճանաչվել է ՀՀ լավագույն համայնք: Իմ խորին համոզմամբ, Ակունք խոշորացված համայնքի կազմալուծումը և Ակունք գյուղը այդ փնջում ընդգրկելը ոչ միայն չի նպաստում, այլ հակառակը` հակասում է ՀՀ-ում վարչատարածքային բարեփոխումների շարունակականության ապահովման տրամաբանությանը: Նման մոտեցումը համարում եմ անհիմն և ապակառուցողական: Առաջարկում եմ. 1. Նախագծից հանել Կոտայքի մարզի Ակունք գյուղը, 2. Ուսումնասիրել և տարածել Ակունք համայնքի դրական փորձը` որպես խոշորացված համայնքի կառավարման հաջողված օրինակ:

Syuzan Hovsepyan

19.12.2020

Խնդրում եմ հստակ ներկայացնել, թե ի՞նչ հանրային քննարկումների արդյունքում է նման որոշում նախագծվել (խնդրում եմ ներկայացրեք հղումները, հիմքերը)։ Առաջարկում եմ նախագծից հանել ՀՀ Լոռու մարզի Թումանյան խոշորացված համայնքի կազմում մասնավորապես Դսեղ համայնքը ներառելու մասը։ Վստահաբար կարող եմ ասել, որ Դսեղի բնակչության գերակշռող մասը դեմ է այս նախագծին։ Եվ դա ունի իր հստակ պատճառները․ 1)Դսեղի բնակչության թվաքանակը արդեն իսկ 7 բնակավայրերով խոշորացված Թումանյան համայնքի ընդհանուր բնակչության թվաքանակի 1/2-ից ավելին է։ 2) Դսեղը ունի բոլոր ենթակառուցվածքները (միջնակարգ դպրոց, մանկապարտեզ, մշակույթի տուն, արտադպրոցական դաստիարակության կազմակերպման անհրաժեշտ խմբակներ, համայնքային գրադարան, առողջության պահպանման առաջնային կենտրոն, գործող եկեղեցի, փոստային ծառայություն, կարկտակայան, համայնքային հանդիսությունների սրահ և այլն), ինչպես նաև բնակչության լիարժեք սպասարկումն իրականացնելու համար անհրաժեշտ ծառայությունները՝ փողոցային լուսավորության ապահովում, աղբահանության կազմակերպում և այլն, ավելին՝ հենց Դսեղն է տարիներ շարունակ օրինակ բուժծառայություններ մատուցել նույն Մոտկորի շրջանի գյուղերին, որոնք ներկայումս մտնում են Թումանյան համայնքի կազմի մեջ։ 3) Դսեղը շատ մեծ զբոսաշրջային պոտենցիալ ունեցող և այդ ուղղությամբ զարգացող համայնք է, որը այս հեռանկարային ուղղության զարգացման համար ունի բոլոր նախադրյալները․ հյուրանոցներ, հյուրատներ, բնության այցելուների կենտրոն, զբոսաշրջային տարբեր ծառայություններ մատուցող կառույցներ։ Այսինքն՝ այս ուղղությունը համայնքի համար արդեն իսկ զարգացման գերակա ուղղություն է և բավականին շատ թվով ներդրողներ են այստեղ աշխատում։ Խոշորացման պարագայում շատ մեծ է այս ուղղությամբ տարվող աշխատանքների ինտենսիվության նվազման հավանականությունը։ 4) Դսեղը ինքնաբավ համայնք է, որն ի վիճակի է և ունի բոլոր ռեսուրսներն ու հնարավորությունները՝ ապահովելու սեփական համայնքի բնակչության /և ոչ միայն/ կարիքները և պահանջմունքները և խոշորանալու պարագայում Դսեղը միայն տուժելու է թե՛ ֆինանսական, թե՛ ծառայությունների ստացման, թե՛ ներդրումների քանակի նվազման տեսանկյունից։ Այս տեսանկյունից ո՞րն է հիմնավորումը, չէ՞ որ խոշորացումը պետք է բխի բոլոր համայնքների շահերից։ Ո՞րն է Դսեղ համայնքի շահն այս իրավիճակում։

Անի Կարապետյան

18.12.2020

Կոչ եմ անում վերանայել նախագիծը և չկազմաքանդել արդեն կայացած համայնքները:

Տեսնել ավելին