ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՐԶԵՐՈՒՄ ՄԱՍՆԱՎՈՐ ԿԱՄ ՄԱՍՆԱՎՈՐԻ ԿՈՂՄԻՑ ՇԱՀԱԳՈՐԾՎՈՂ ՄԱՐԶԱԿԱՆ ԵՆԹԱԿԱՌՈՒՑՎԱԾՔՆԵՐՈՒՄ ԴՊՐՈՑԱՀԱՍԱԿ ԵՐԵԽԱՆԵՐԻ ԼՈՂ, ԴԱՀՈՒԿԱՅԻՆ ՍՊՈՐՏ, ՀՐԱՁԳՈՒԹՅՈՒՆ ՄԱՐԶԱՁԵՎԵՐԻ ՈՒՍՈՒՑՄԱՆ ԾՐԱԳՐԵՐԸ ԵՎ ՖԻՆԱՆՍԱՎՈՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Առաջարկում եմ անպայման ծրագրում ներառել կետ ներառական երեխաների մասնակցությունը ապահովելու համար։

Ողջունելի է մասնավոր ենթակառուցվածքները դպրոցականների մարզական կյանքում ներգրավելու նախաձեռնությունը։ Սակայն հաշվի առնելով մարզային առանձնահատկությունները՝ կցանկանայի բարձրաձայնել հետևյալ հարցը՝

Ինչպե՞ս է լուծվելու հեռավոր համայնքների երեխաների տրանսպորտային հասանելիության հարցը դեպի այդ մասնավոր օբյեկտներ։

Նաև պետք է նշել, որ լողը, դահուկային սպորտը և հատկապես հրաձգությունը պահանջում են խիստ անվտանգային կանոններ և որակավորված մարզիչներ։ Արդյո՞ք մասնավորի մարզիչները պետք է անցնեն հատուկ սերտիֆիկացում պետության կողմից՝ նախքան երեխաների հետ աշխատելը։

Սույն նախագիծը միտված է կարևոր հանրային նպատակների՝ երեխաների ֆիզիկական զարգացման, առողջ ապրելակերպի խթանման և սպորտի հասանելիության բարձրացման ապահովմանը։ Սակայն, հաշվի առնելով ծրագրի իրականացման առանձնահատկությունները (մասնավոր հատվածի ներգրավում, բյուջետային ֆինանսավորում, երեխաների մասնակցություն), անհրաժեշտ է լրացուցիչ կարգավորումների սահմանում՝ հնարավոր ռիսկերը նվազեցնելու և արդյունավետությունը բարձրացնելու նպատակով։

«Դպրոցահասակ երեխաներ» ձևակերպումը իրավական առումով կարող է տարբեր կերպ մեկնաբանվել։ Տարիքային շրջանակի և առաջնահերթ խմբերի հստակ սահմանումը թույլ է տալիս ապահովել ծրագրի թիրախայնությունը և կանխել ռեսուրսների ոչ նպատակային բաշխումը։ Առանց այս հստակեցման՝ հնարավոր է, որ ծրագրից օգտվեն ոչ առաջնահերթ խմբերը՝ սահմանափակելով առավել կարիքավորների հասանելիությունը։ 

Առաջարկում ենք հստակ սահմանել «դպրոցահասակ երեխաներ» հասկացությունը՝ ներառելով տարիքային սահմանները (օրինակ՝ 6-18 տարեկան), ինչպես նաև նախատեսել սոցիալապես խոցելի խմբերի (սոցիալական նպաստառու ընտանիքների երեխաներ, հաշմանդամություն ունեցող երեխաներ և այլն) առաջնահերթ ընդգրկման մեխանիզմներ։