«ԷԼԵԿՏՐՈՆԱՅԻՆ ԵՐԹԱԿԱՐԳԱՎԱՐԱԿԱՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ՊԱՀԱՆՋՆԵՐԸ ՀԱՍՏԱՏԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

Հայաստանի Հանրապետության կառավարության «Էլեկտրոնային երթակարգավարական ծառայությունների մատուցման պահանջները հաստատելու մասին» որոշման նախագծի հավելվածով հաստատվող պահանջների. 1. Առաջարկում եմ 3-րդ կետում ««Գնումների մասին» օրենքի պահանջներին համապատասխան» բառերից հետո լրացնել «իսկ ներհամայնքային ավտոբուսային կանոնավոր փոխադրումների դեպքում՝ էլեկտրոնային երթակարգավարական ծառայությունների մատուցման գործընթացը կարող է համայնքի ղեկավարի որոշմամբ կազմակերպվել առանց գնման գործընթացի կազմակերպման՝ 100 տոկոս համայնքային մասնակցությամբ կազմակերպության միջոցով» բառերը։ Եթե համայնքի ղեկավարը կարող է ներհամայնքային ավտոբուսային կանոնավոր փոխադրումները կազմակերպել 100 տոկոս համայնքային մասնակցությամբ կազմակերպության միջոցով, առանց գնման գործընթացի կամ առանց մրցույթի, ապա ինչու չի կարող կազմակերպել ներհամայնքային ավտոբուսային կանոնավոր փոխադրումների էլեկտրոնային երթակարգավարական ծառայությունների մատուցման գործընթացը։ Կարծում եմ, որ նման սահմանափակումը անիմաստ է, նամանավանդ որ այն Օրենքով չէ։

2. Առաջարկում եմ 4-րդ կետում «երթուղային ցանցի կառավարման համակարգի» բառերը հանել, քանի որ երթուղային ցանցի կառավարումը ծավալուն համակարգ է, որի միայն մի բաղկացուցիչ մասն է երթակարգավարական ծառայությունը։ Անհասկանալի է, արդյոք նախատեսվում է տվյալ որոշմամբ երթուղային ցանցերի կառավարումը «Գնումների մասին» օրենքի պահանջներին համապատասխան՝ պատվիրակել։ Միաժամանակ կարծում եմ, գործող օրենսդրությունը հնարավորություն չի տալիս երթուղայաին ցանցի կառավարումը ամբողջությամբ թվայնացնել։

3. Պահանջների 5-րդ և 6-րդ կետերը միմյանց հակասում են, այսպես 5-րդ կետով սահմանված է, որ էլեկտրոնային երթակարգավարական ծառայությունների մատուցման ծրագրային համակարգը պետք է հնարավորություն տա էլեկտրոնային եղանակով իրականացնելու երթուղային ցանցի մոդելների մշակումը, իսկ 6-րդ կետով սահմանված է, որ էլեկտրոնային երթակարգավարական ծառայությունների մատուցման ծրագրային համակարգը պետք է հնարավորություն ունենա հաշվառելու երթուղիների մեքենաները, ինչպես նաև մոդելավորել նախատեսվող երթուղային ցանցը: Կարծում եմ, որ երթուղային ցանցերի ձևավորումը մոդելավորման միջոցով շատ կարևոր է, սակայն այն շատ ավելի լուրջ հանձնարարություն է քան էլեկտրոնային երթակարգավարական ծառայությունների մատուցումը, ինչպես նաև երթակարգավարական ծառայությունը մատուցվում է գործող երթուղային ցանցում։ Միաժամանակ, կարծում եմ, որ էլեկտրոնային երթակարգավարական ծառայությունների մատուցման ծրագրային ապահովումը պետք է այնպես մշակված լինի, որ դրա տվյալների բազայի հիման վրա հնարավոր լինի մոդելավորված երթուղային ցանցերը կամ գործող երթուղային ցանցերը մոդելավորման միջոցով արդիականացնել՝ համապատասխանեցնել առկա ուղևորահոսքի և երթևեկության ու այլ անհրաժեշտ պահանջներին։ Նման պահանջի սահմանումը համարում եմ խելամիտ։ Առաջարկում եմ, հաշվի առնելով վերոգրյալը խմբագրել 5-րդ և 6-րդ կետերը։