«Հայաստանի Հանրապետության կառավարության 2006 թվականի ապրիլի 13-ի թիվ 488-Ն որոշման մեջ փոփոխություններ կատարելու մասին» ՀՀ կառավարության որոշման նախագիծ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

«__» _________2025 թվականի     N _____ - Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ԱՊՐԻԼԻ 13-Ի ԹԻՎ 488-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Ղեկավարվելով «Նորմատիվ իրավական ակտերի մասին» օրենքի 33-րդ և 34-րդ հոդվածներով` Հայաստանի Հանրապետության կառավարությունը որոշում է.

1․ Հայաստանի Հանրապետության կառավարության 2006 թվականի ապրիլի 13-ի «Տեխնածին վթարների, մահացու կամ ծանր ելքով արտադրական դժբախտ դեպքերի տեխնիկական քննության և հաշվառման կարգը սահմանելու մասին» թիվ 488-Ն որոշմամբ սահմանված հավելվածի (այսուհետ՝ Հավելված) մեջ կատարել հետևյալ փոփոխությունները.

1)     Հավելվածի 6-րդ կետում ««Տեխնիկական անվտանգության ազգային կենտրոն» պետական ոչ առևտրային կազմակերպությունը (այսուհետ` ազգային կենտրոն), ինչպես նաև հավատարմագրված անձինք: Հատուկ, կարևորագույն և ռազմավարական նշանակության օբյեկտներում տեխնածին վթարների, արտադրական դժբախտ դեպքերի տեխնիկական քննությունն իրականացնում է Հայաստանի Հանրապետության արտակարգ իրավիճակների նախարարի կողմից ստեղծված հանձնաժողովը:» բառերը փոխարինել «լիազոր մարմնի կողմից ստեղծված հանձնաժողովը» բառերով.

2)    Հավելվածի 6.1-րդ կետում «Հայաստանի Հանրապետության արտակարգ իրավիճակների նախարարության (այսուհետ` Լիազոր մարմին) աշխատակազմի հավատարմագրման և լիցենզավորման գործակալությունը (այսուհետ` գործակալություն):» բառերը փոխարինել «Հայաստանի Հանրապետության ներքին գործերի նախարարության (այսուհետ` Լիազոր մարմին) իրավասու ստորաբաժանման ռեեստրի բաժինը (այսուհետ` Ռեեստրի բաժին)» բառերով.

3)    Հավելվածի 7-րդ կետում «գործակալությանը և ազգային կենտրոնին» բառերը փոխարինել «Լիազոր մարմնի օպերատիվ կառավարման կենտրոնին կամ Ռեեստրի բաժնին»  բառերով.

4)    Հավելվածի 9-րդ կետում «ազգային կենտրոնի ղեկավարի հրամանով ստեղծվում է հանձնախումբ: Հանձնախմբում ընդգրկվում են ազգային կենտրոնի, արտադրական վտանգավոր օբյեկտը շահագործող անձի ներկայացուցիչներ և համապատասխան ոլորտի մասնագետներ: Հատուկ, կարևորագույն և ռազմավարական նշանակության օբյեկտներում տեխնածին վթարների, արտադրական դժբախտ դեպքերի տեխնիկական քննության անցկացման նպատակով լիազոր մարմնի ղեկավարի կողմից մեկօրյա ժամկետում ստեղծվում է հանձնաժողով, որի կազմում կարող են ընդգրկվել գործակալության, Հայաստանի Հանրապետության քաղաքաշինության, տեխնիկական և հրդեհային անվտանգության տեսչական մարմնի, ազգային կենտրոնի, հավատարմագրված անձանց և այլ կազմակերպությունների ներկայացուցիչներ:» բառերը փոխարինել «Լիազոր մարմնի ղեկավարի հրամանով դժբախտ դեպքի հաղորդումը ստանալուց հետո մեկ աշխատանքային օրվա ընթացքում ստեղծվում է հանձնաժողով: Հանձնաժողովում ընդգրկվում են հավատարմագրված անձանց, անհրաժեշտության դեպքում նաև շահագործող անձանց ներկայացուցիչներ կամ համապատասխան ոլորտի մասնագետներ» բառերով.

5)    Հավելվածի 10-րդ, 11-րդ, 12-րդ և 13-րդ կետերում «հանձնախումբ» բառը փոխարինել «հանձնաժողով» բառով․

6)   Հավելվածի 12-րդ կետում «,իսկ հատուկ, կարևորագույն և ռազմավարական նշանակության օբյեկտներում տեղի ունեցած տեխնածին վթարի տեխնիկական քննության հանձնաժողովը ոչ ավելի, քան 10-օրյա» բառերը հանել.

7)    Հավելվածի 14-րդ կետը շարադրել նոր խմբագրությամբ հետևյալ բովանդակությամբ՝

«14. Հանձնաժողովը 2 աշխատանքային օրվա ընթացքում եզրակացության մեկ օրինակը՝ կից փաստաթղթերով, ներկայացնում է Ռեեստրի բաժին, իսկ փաստաթղթերի պատճեները՝ արտադրական վտանգավոր օբյեկտ շահագործող անձին: Փաստաթղթերի երկրորդ օրինակը՝ կարված վիճակում ենթակա է պահպանման Հանձնաժողովի նախագահի մոտ: Եթե տեղի է ունեցել դժբախտ դեպք, ապա հանձնաժողովն եզրակացության և կից փաստաթղթերի պատճեններն ուղարկում է նաև Հայաստանի Հանրապետության առողջապահական և աշխատանքի տեսչական մարմին և դատախազություն: Եթե առաջացել է (կամ կարող է առաջանալ) սուր մասնագիտական հիվանդություն կամ թունավորում, ապա եզրակացության և կից փաստաթղթերի պատճեններն ուղարկվում են նաև Հայաստանի Հանրապետության առողջապահական և աշխատանքի տեսչական մարմին:».

8)   Հավելվածի 15-րդ կետում «գործակալությունում» բառը հանել:

2․ Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

               ՎԱՐՉԱՊԵՏ                                                                                                                                                                                Ն. ՓԱՇԻՆՅԱՆ