ՆԱԽԱԳԻԾ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ
ՈՐՈՇՈՒՄ
———— ——— 2025 թվականի N ————- Ն
ԲԱՐՁՐԱԳՈՒՅՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆԸ ԲԱՐՁՐ ԱՌԱՋԱԴԻՄՈՒԹՅԱՄԲ ԱՎԱՐՏԱԾ ԵՎ ԱՇԽԱՏԱՆՔԱՅԻՆ ՍՏԱԺ ՉՈՒՆԵՑՈՂ ՔԱՂԱՔԱՑԻՆԵՐԻՆ ՊԵՏԱԿԱՆ ՄԱՐՄԻՆՆԵՐՈՒՄ ԱՇԽԱՏԱՆՔՈՎ ԱՊԱՀՈՎԵԼՈՒ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Սահմանադրության 146-րդ հոդվածի 2-րդ մասը՝ Հայաստանի Հանրապետության կառավարությունը որոշում է.
1.Հաստատել բարձրագույն ուսումնական հաստատությունը բարձր առաջադիմությամբ ավարտած և աշխատանքային ստաժ չունեցող քաղաքացիներին պետական մարմիններում աշխատանքով ապահովելու ծրագիրը՝ համաձայն հավելվածի:
- Սահմանել, որ սույն ծրագրի շրջանակներում շահառուների զբաղվածության հիմնախնդիրներն ուսումնասիրելու (վերլուծելու) աշխատանքների իրականացման, տվյալների հավաքագրման, վերլուծության և արդյունքների վերաբերյալ հաշվետվություն ներկայացնող պատասխանատու պետական մարմինը Աշխատանքի և սոցիալական հարցերի նախարարությունն է:
3․ Սույն որոշումն ուժի մեջ է մտնում պաշտոնական հրապարակմանը հաջորդող օրվանից։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՎԱՐՉԱՊԵՏ Ն. ՓԱՇԻՆՅԱՆ
Հավելված
Հայաստանի Հանրապետության
կառավարության 2025 թվականի ---ի N -Ն որոշման
ԾՐԱԳԻՐ
ԲԱՐՁՐԱԳՈՒՅՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆԸ ԲԱՐՁՐ ԱՌԱՋԱԴԻՄՈՒԹՅԱՄԲ ԱՎԱՐՏԱԾ ԵՎ ԱՇԽԱՏԱՆՔԱՅԻՆ ՍՏԱԺ ՉՈՒՆԵՑՈՂ ՔԱՂԱՔԱՑԻՆԵՐԻՆ ՊԵՏԱԿԱՆ ՄԱՐՄԻՆՆԵՐՈՒՄ ԱՇԽԱՏԱՆՔՈՎ ԱՊԱՀՈՎԵԼՈՒ
- ԸՆԴՀԱՆՈՒՐ ԴՐՈՒՅԹՆԵՐ
- Բարձրագույն ուսումնական հաստատությունը բարձր առաջադիմությամբ ավարտած և աշխատանքային ստաժ չունեցող քաղաքացիներին պետական մարմիններում աշխատանքով ապահովելու ծրագրի (այսուհետ՝ ծրագիր) նպատակն է խթանել բարձրագույն կրթություն ունեցող մասնագետների աշխատանքի ընդունումը պետական մարմիններում՝ նրանց հնարավորություն տալով կիրառելու իրենց գիտելիքները և ձեռք բերելու աշխատանքային փորձ:
- Ծրագրի շահառու են հանդիսանում ծրագրին դիմելու օրվան նախորդող երեք տարիների հավատարմագրված բարձրագույն ուսումնական հաստատությունների բարձր առաջադիմությամբ (միջին որակական գնահատականի առավելագույն արժեքի առնվազն 80 տոկոս ապահոված) շրջանավարատները:
- ԾՐԱԳՐԻ ԳՈՐԾԱՐԿՄԱՆ ԿԱՐԳԸ
- Ըստ պետական մարմնի կանոնադրական գործառույթներով պայմանավորված պահանջների՝ յուրաքանչյուր տարի հուլիսի 1-ից հուլիսի 15-ը պետական մարմինը իր պաշտոնական կայքէջում բարձրագույն կրթություն ունեցող, սակայն աշխատանքային ստաժ չունեցող մասնագետներին պետական մարմնում աշխատանքով ապահովելու նպատակով հայտարարում է ընդունելություն:
- Պետական մարմինը հայտարարության մեջ նշում է այն մասնագիտությունները և փաստաթղթերի ցանկը, որոնք անհրաժեշտ են իր կանոնադրական գործառույթները իրականացնելու և շահառուների հետ աշխատանքային պայմանագիր կնքելու համար։
- Դիմումների ընդունման վերջնաժամկետի ավարտից հետո՝ երկու աշխատանքային օրվա ընթացքում ձևավորվում է դիմողների ցուցակ։ Պետական մարմինը դիմողների ցուցակի ձևավորումից հետո՝ երեք աշխատանքային օրվա ընթացքում, դիմողների ցուցակում ընդգրկված անձանցից ընտրում է հայտարարության մեջ նշված պահանջները բավարարող անձանց (այսուհետ՝ շահառու) և էլեկտրոնային փոստի միջոցով հրավիրում հարցազրույցի:
- Հարցազրույցն անցկացվում է էլեկտրոնային եղանակով ծանուցելուց հետո՝ հինգ աշխատանքային օրվա ընթացքում: Հարցազրույցի արդյունքում առաջնահերթությունը տրվում է հետևյալ պայմաններին` ըստ հաջորդականության՝
- պետական մարմնի հայտարարության մեջ նշված մասնագիտությամբ կամ կրթական ծրագրով որակավորում ունեցող շահառուին.
- մագիստրոսի որակավորում ունեցող շահառուին.
- բարձրագույն ուսումնական հաստատությունը գերազանցությամբ (միջին որակական գնահատականի առավելագույն արժեքի առնվազն 90 տոկոս ապահոված) ավարտած շահառուին։
- Համապատասխան պետական մարմինը հարցազրույցի արդյունքների հիման վրա շահառուների հետ մինչև մեկ տարի ժամկետով կնքում է աշխատանքային պայմանագիր:
- Համապատասխան պետական մարմնում ընդգրկված շահառուները ենթարկվում են տվյալ պետական մարմնի ներքին կարգապահական կանոններին, եթե պայմանագրով այլ բան նախատեսված չէ։
- Պետական մարմնում յուրաքանչյուր տարի սույն ծրագրով ներգրավվող շահառուների առավելագույն թիվը չի կարող գերազանցել Հայաստանի Հանրապետության վարչապետի որոշմամբ տվյալ պետական մարմնին հատկացված հաստիքների առավելագույն թվաքանակի մեկ տոկոսը։
- Յուրաքանչյուր քաղաքացի սույն ծրագրի շահառու կարող է լինել միայն մեկ անգամ։
- Աշխատանքային պայմանագիր կնքած շահառուին վճարվում է ամսական աշխատավարձ 140.000 ՀՀ դրամ Կառավարության աջակցության ծրագրի բյուջեով նախատեսված միջոցներից, որը յուրաքանչյուր տարվա համար չի կարող գերազանցել 200.000 (երկու հարյուր) միլիոն ՀՀ դրամը:
- ԾՐԱԳՐԻ ՄՈՆԻԹՈՐԻՆԳԸ
12․ Պետական մարմինը յուրաքանչյուր եռամսյակի ավարտից հետո՝ երեք աշխատանքային օրվա ընթացքում, ծրագրի շահառուների թվաքանակի, կնքված և լուծված աշխատանքային պայմանագրերի թվաքանակի, ծրագրի կատարման ընթացքի վերաբերյալ հաշվետվություն է ներկայացնում Աշխատանքի և սոցիալական հարցերի նախարարություն և Քաղաքացիական ծառայության գրասենյակ:
- Սույն ծրագրի 12-րդ կետում նշված տեղեկատվությունը ստանալուց հետո՝ տասը աշխատանքային օրվա ընթացքում, Աշխատանքի և սոցիալական հարցերի նախարարությունը հաշվետվություն է ներկայացնում վարչապետին:
