«Հայաստանի Հանրապետության կառավարության 2021 թվականի նոյեմբերի 11-ի N 1864-Լ որոշման մեջ փոփոխություն կատարելու մասին» ՀՀ կառավարության որոշման նախագիծ

Անհրաժեշտ է հավելվածի ողջ տեքստում, մասնավորապես` 06-01, 06-02, 08-02, 08-03, 12-01, 12-02, 12-04, 12-05, 14-02, 14-03, 14-05, 28-01, 28-02 և 28-03 ենթատեսակներում ուղղել <<նշանակված>> բառում առկա տառասխալը:

Անհրաժեշտ է 09-06 ենթատեսակում <<նշումների>> բառը փոխարինել <<նմուշների>> բառով:

Գտնում եմ, որ 16-01 ենթատեսակում <<ամբողջություն>> բառը պետք է փոխարինել <<ամբողջությունը>> բառով:

Անհրաժեշտ է 16-02, 16-03 և 16-06 ենթատեսակներում ուղղել <<վերանորոգման>> բառում առկա տառասխալը: 

Համաձայն նախագծի հիմնավորումների՝ յուրաքանչյուր մեկ առանձին օբյեկտի փորձաքննության օբյեկտավորման չափանիշներն օպտիմալացվել են, իսկ փորձաքննության արժեքները՝ համարժեք նվազեցվել: Այնինչ, հետաքաբանական տեսակի 06-04 (սառը և նետողական զենքի փորձաքննություն) ենթատեսակի օբյեկտի գնահատման չափանիշը <<հինգ>> բառից հետո լրացվել է <<նույնատիպ>> բառով, որի պայմաններում ներկայումս գործող իրավակարգավորմամբ (յուրաքանչյուր հետազոտելի մինչև ներառյալ հինգ նմուշների ամբողջությունը՝ անկախ տիպից) ղեկավարվելու պարագայում սառը և նետողական զենքի փորձաքննության արժեքը ավելի մատչելի է լինելու, քանի որ տիպային պատկանելիություն չի նախատեսում: Օրինակ՝ գործող իրավակարգավորման համաձայն 5 տարբեր տիպի նմուշների փորձաքննության արժեքը 45.000 դրամ է, իսկ նախագծի ընդունման արդյունքում կկազմի 225.000 դրամ, այսինքն՝ 5 անգամ գինը կավելանա, ուստի, գնտում եմ, որ անհրաժեշտ է չփոփոխել գործող չափանիշն ու հավելվածի 06-04 ենթակետի օբյեկտի գնահատման չափանիշից հանել <<նույնատիպ>>բառը:

Փորձագիտական կազմակերպությունների ներկայացուցիչների հետ քննարկումների շրջանակներում միաձայն որոշվել էր 12-01 և 12-02 ենթատեսակներում «լաբորատոր հետազոտման յուրաքանչյուր մինչև ներառյալ հինգ», իսկ 28-01 ենթատեսակում՝«լաբորատորհետազոտման յուրաքանչյուր մինչև ներառյալ երեք» բառերը հանել՝ հիմք ընդունելով պրակտիկայում հրդեհի կամ պայթյունի վայրից փորձաքննությանը ներկայացվող հետազոտելի նմուշների քանակները:Սակայն սույն նախագծի հավելվածում 28-01 ենթատեսակի օբյեկտի չափանիշում համապատասխան փոփոխությունները կատարվել են, իսկ 12-01 և 12-02 ենթատեսակներում «մինչև ներառյալ հինգ» բառերը չեն հանվել, որոնք առաջարկում եմ հանել՝ համապատասխանեցնելով 28-01 ենթատեսակի օբյեկտի չափանիշի տրամաբանությանը:

Առաջարկվող փոփոխությունների արդյունքում ծավալային տեսանկյունից եռապատկվել է յուրաքանչյուր օբյեկտի գնահատման չափանիշը և միաժամանակ կրճատվել է միջին նորմատիվային ժամածախսը (03-01 և 03-02 ենթատեսակի մասով 16-ից դարձվել է 12, իսկ 03-04-ի մասով՝ 28-ից 20): Նման ժամածախսի պայմաններում հնարավոր չի լինելու իրականացնել մանրակրկիտ հետազոտություններ, ուսումնասիրել հետազոտելի օբյեկտները (այդ թվում նաև՝ համեմատական նմուշները), պարզել դրանց կատարման եղանակները, հայտնաբերել առկա անհամապատասխանությունները, առանձին դեպքերում կատարել վերլուծություններ նախկինում իրականացված փորձաքննությունների շրջանակներում ուսումնասիրված և հետազոտված օբյեկտների միջև, ինչպես նաև հաստատել կամ հերքել դրանց կապը: Վերոգրյալի հաշվառմամբ գտնում եմ, որ անհրաժեշտ է չնվազեցնել միջին նորմատիվային ժամածախսը, այսինքն՝ պահպանել 03-01 և 03-02 ենթատեսակների համար 16 ժամը, իսկ 03-04-ի համար՝ 28 ժամը, որի պայմաններում դժվարությամբ, բայց հնարավոր կլինի ապահովել նախագծով առաջարկվող գործող իրավակարգավորումների համեմատ խստացված օբյեկտի գնահատման չափանիշին համապատասխան մեկ առանձին օբյեկտի պատշաճ փորձաքննությունը: