ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ՆՈՅԵՄԲԵՐԻ 23-Ի N 2017-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ՆՈՅԵՄԲԵՐԻ 23-Ի N 2017-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Ընթացիկ իրավիճակը և իրավական ակտի ընդունման անհրաժեշտությունը

Հայաստանի Հանրապետության կառավարության 2019 թվականի փետրվարի 28-ի «Հայաստանի Հանրապետության տարածք դեղեր, դեղանյութեր, դեղաբուսական հումք և հետազոտվող դեղագործական արտադրանք ներմուծելու և Հայաստանի Հանրապետության տարածքից արտահանելու, ներմուծման կամ արտահանման նպատակով փորձաքննության իրականացման կարգերը և անհրաժեշտ փաստաթղթերի ցանկը սահմանելու, ինչպես նաև Հայաստանի Հանրապետության կառավարության 2000 թվականի սեպտեմբերի 20-ի N 581 որոշումն ուժը կորցրած ճանաչելու մասին» N 202-Ն որոշման մեջ պլանավորվում է կատարել թույլատվական փաստաթղթի տրամադրման ժամկետի փոփոխություն, որով պայմանավորված անհրաժեշտություն է առաջացել կատարել համապատասխան լրացում նաև ՀՀ կառավարության 2023 թվականի նոյեմբերի 23-ի N 2017-Ն որոշման մեջ:

2. Առաջարկվող կարգավորումների բնույթը

ՀՀ կառավարության 2019 թվականի փետրվարի 28-ի N 202-Ն որոշմամբ հաստատված հավելվածի 29-րդ կետի համաձայն Լիազոր մարմինը փորձագիտական եզրակացությունն ստանալուց հետո հայտը բավարարում կամ մերժում է մեկ աշխատանքային օրվա ընթացքում: Մինչդեռ, փորձը ցույց է տալիս, որ վերջին տարիներին զգալիորեն ավելացել է դեղագործական արտադրանքի ներմուծման հավաստագրման նպատակով հայտերի թիվը (2022թ՝ 3107, 2023թ՝ 3507, 2024թ՝ 3545): Ստեղծված իրավիճակում անհնար է դառնում որոշմամբ սահմանված ժամկետներում տրամադրել հավաստագիր կամ մերժել դրա տրամադրումը: ՈՒստի մշակվել է ՀՀ կառավարության 2019 թվականի փետրվարի 28-ի N 202-Ն որոշման մեջ փոփոխություններ և լրացումներ կատարելու մասին ՀՀ կառավարության որոշման նախագիծ, որի համաձայն Լիազոր մարմնին հնարավորություն է տրվում համապատասխան որոշումն ընդունել երկու օրվա ընթացքում: Միաժամանակ, առաջարկվում է կատարել լրացում ՀՀ կառավարության 2023 թվականի նոյեմբերի 23-ի N2017-Ն որոշման հավելվածի 11-րդ կետում՝ երկու իրավական ակտերի դրույթների ներդաշնակեցման նպատակով:

3. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է Առողջապահության նախարարության աշխատակազմի դեղորայքային քաղաքականության և բժշկական տեխնոլոգիաների և իրավաբանական վարչությունների կողմից:

4. Ակնկալվող արդյունքը

Դեղերի, դեղանյութերի, դեղաբուսական հումքի և հետազոտվող դեղագործական արտադրանքի ներմուծման թույլտվության իրատեսական ժամկետների ապահովում:

5. Նախագծի ընդունման կապակցությամբ Հայաստանի Հանրապետության պետական բյուջեում ծախսերի և եկամուտների ավելացման կամ նվազեցման բացակայության մասին

Կառավարության որոշման նախագծի ընդունումը Հայաստանի Հանրապետության պետական բյուջեում ծախսերի և եկամուտների ավելացում կամ նվազեցում չի առաջացնում:

6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ

Սույն նախագծի ընդունումը բխում է ՀՀ կառավարության 2021 թվականի օգոստոսի 18-ի N 1363-Ա որոշման հավելվածի 4.5-րդ կետով սահմանված հանրային առողջության պահպանմանն ու բարելավմանն ուղղված բարձր որակի ծառայությունների մատուցումից, որի կարևորագույն բաղադրիչներից մեկը հանդիսանում է անվտանգ, որակյալ և արդյունավետ դեղերով բնակչության ապահովումը: