«Հայաստանի Հանրապետության կառավարության 2007 թվականի հունիսի 28-ի N 955-Ն որոշման մեջ փոփոխություններ և լրացումներ կատարելու մասին», «Հայաստանի Հանրապետության կառավարության 2006 թվականի հոկտեմբերի 26-ի N 1699-Ն որոշման մեջ փոփոխություններ և լրացումներ կատարելու մասին» և «Հայաստանի Հանրապետության կառավարության 2008 թվականի հոկտեմբերի 10-ի N 113-Ն որոշման մեջ փոփոխություն կատարելու մասին» ՀՀ կառավարության որոշումների նախագծեր

Անվադողերի կիրառման միջակայքերի աղյուսակում մայիս և սեպտեմբեր ամիսներին ձմեռային բութակավորված անվադողերի օգտագործումը երթևեկության անվտանգության տեսակետից հիմնավորված չէ, քանի որ այդ ամիսներին հիմնականում առանց ձյան ծածկույթի ասֆալտային կամ բետոնային ծածկով ճանապարհների վրա բութակավոր անվադողերի շահագործումը որպես հետևանք կարող է բերել երկաթյա բութակների արտանետման , ինչը վտանգ կարող է հանդիսանալ երթևեկության մասնակից այլ տրանսպորտային միջոցների համար։ Առաջարկ - Մայիս և սեպտեմբեր ամիսները միավորել հունիս-օգոստոս ամիսներին՝ կիրառելով անվադողերի նկատմամբ համապատասխան սահմանափակումները։

Առաջարկում ենք բոլոր նախագծերում առանց բացառության խուսափել «հաշմանդամ» կամ «հաշմանդամներ» ձևակերպումները կիրառելուց՝ հիմք ընդունելով «Հաշմանդամություն ունեցող անձանց իրավունքների մասին» ՀՀ օրենքը։ Միաժամանակ առաջարկում ենք նախագծերով փոփոխել տվյալ որոշումների այլ մասերում կիրառվող համանման ձևակերպումները։ Հայտնում ենք նաև, որ այն սխալ է ոչ միայն օրենքի տեսանկյունից, այլև որպես գոյական օգտագործելն անընդունելի է համարվում հաշմանդամություն ունեցող անձանց և նրանց ներկայացնող կազմակերպությունների կողմից, քանի որ չի արտացոլում հաշմանդամության սոցիալական մոտեցումը։

Նախագծերն առաջարկում ենք համապատասխանեցնել «Անձի ֆունկցիոնալության գնահատման մասին» ՀՀ օրենքին՝ հաշվի առնելով, որ անձանց նկատմամբ այլևս չեն սահմանվում հաշմանդամության խմբեր (սակայն խմբերը պահպանվում են նախկին համակարգով գնահատված անձանց դեպքում)։