ՀԻՄՆԱՎՈՐՈՒՄ

«ՀԱՆՐԱՅԻՆ ՏԵՂԵԿՈՒԹՅՈՒՆՆԵՐԻ ԲԱՑԱՀԱՅՏՄԱՆ ԿԱՐԳԸ ԵՎ ՇՐՋԱՆԱԿԸ ՍԱՀՄԱՆԵԼՈՒ ՄԱՍԻՆ»

ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Ընթացիկ իրավիճակը և իրավական ակտի ընդունման անհրաժեշտությունը

Թվայնացման գործընթացների արագ զարգացման և պետական տեղեկատվական համակարգերի ընդլայնման համատեքստում հանրային տեղեկությունների մատչելիությունն ու թափանցիկությունն առանձնահատուկ կարևորություն են ձեռք բերում:

«Հանրային տեղեկությունների մասին» Հայաստանի Հանրապետության օրենքի 7-րդ հոդվածի 5-րդ մասը Հայաստանի Հանրապետության կառավարությանը հանձնարարում է սահմանել հանրային տեղեկությունների բացահայտման կարգը և շրջանակը:

Նախագծի ընդունումը պայմանավորված է նաև ՀՀ վարչապետի 2026 թվականի փետրվարի 13-ի ««Կիբեռանվտանգության մասին», «Հանրային տեղեկությունների մասին», «Տեղեկատվական համակարգերի կարգավորման մարմնի մասին», «Անձնական տվյալների պաշտպանության մասին» օրենքում փոփոխություններ և լրացումներ կատարելու մասին», «Պետական գաղտնիքի մասին» օրենքում փոփոխություն կատարելու մասին», «Տեղեկատվության ազատության մասին» օրենքում փոփոխություններ կատարելու մասին», «Կառավարության կառուցվածքի և գործունեության մասին» օրենքում լրացում կատարելու մասին», «Ազգային անվտանգության մարմինների մասին» օրենքում փոփոխություններ և լրացումներ կատարելու մասին» օրենքների կիրարկումն ապահովող միջոցառումների ցանկը հաստատելու մասին» N 117-Ա որոշման պահանջներով, համաձայն որի, ի թիվս այլ օրենքների, սահմանվել են նաև «Հանրային տեղեկությունների մասին» օրենքի կիրարկումն ապահովող միջոցառումները։ Նախագծի ընդունման անհրաժեշտությունը նախատեսված է այդ որոշմամբ սահմանված միջոցառումների ցանկի 12-րդ կետով։

2. Կարգավորման նպատակը և բնույթը

Նախագծի հիմնական նպատակն է ապահովել «Հանրային տեղեկությունների մասին» օրենքով ամրագրված՝ տեղեկատվություն ստանալու իրավունքի արդյունավետ իրականացումը՝ հստակ սահմանելով բացահայտման ենթակա տեղեկությունների շրջանակը, բացահայտման մեթոդներն ու ժամկետները:

Նախագիծը կարգավորում է հետևյալ հիմնական հարաբերությունները.

1. պարտադիր բացահայտման ենթակա տեղեկությունների ցանկ՝ ներառելով պետական մարմինների գործունեությանը, բյուջեներին, գնումներին, անձնակազմին, ծառայություններին և բաց տվյալներին վերաբերող տեղեկություններ,

2. տեղեկությունների բացահայտման մեթոդի ընտրության կանոններ՝ ըստ տեղեկության բնույթի և հրատապության,

3. բացահայտված տեղեկությունների արժանահավատության և թարմության ապահովման պահանջներ:

3. Նախագծի մշակման գործընթացում ներգրավված ինստիտուտները և անձինք

·   Բարձր տեխնոլոգիաների արդյունաբերության նախարարություն,

·  «Հայաստանի տեղեկատվական համակարգերի գործակալություն» հիմնադրամ։

4. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները

Նախագծի ընդունման դեպքում Հայաստանի Հանրապետության պետական բյուջեի եկամուտների և ծախսերի մասով լրացուցիչ ֆինանսական միջոցների անհրաժեշտություն չի առաջանա:

5. Կապը ռազմավարական փաստաթղթերի հետ

Նախագիծը բխում է «Հանրային տեղեկությունների մասին» Հայաստանի Հանրապետության օրենքի 7-րդ հոդվածի 5-րդ մասից և ուղղված է օրենքի արդյունավետ կիրառման ապահովմանը:

6. Ակնկալվող արդյունքը

Նախագծի ընդունման արդյունքում ակնկալվում է`

1. ապահովել հանրության պետական տեղեկատվությանն արդյունավետ և ժամանակին մուտքի մեխանիզմ,

2. վերացնել տեղեկատվություն տնօրինող մարմինների գործունեության ոչ միատեսակ պրակտիկան տեղեկությունների բացահայտման գործընթացում,

3. բարձրացնել պետական կառավարման թափանցիկությունն ու հաշվետվողականությունը: