«Հայաստանի Հանրապետության վարչական իրավախախտումների վերաբերյալ օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագիծ

Հիմնավորոմ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ

1.Անհրաժեշտությունը

«Հայաստանի Հանրապետության վարչական իրավախախտումների վերաբերյալ օրենսգրքում փոփոխություններ և լրացումներ կատարելու մասին» ՀՀ օրենքի նախագծի ընդունման անհրաժեշտությունը պայմանավորված է Հայաստանի Հանրապետությունում ընդհանուր օգտագործման երկաթուղային տրանսպորտով ուղևորափոխադրումների ժամանակ անտոմս երթևեկելու համար տուգանք նշանակալու մարմին որոշելու օրենսդրական բացը լրացնելու և Հայաստանի Հանրապետության կողմից միջազգային պայմանագրերով ստանձնած պարտավորությունների կատարումն ապահովելու համար։

Փոփոխությունները և լրացումները սահմանելու են․

- Ընդհանուր օգտագործման երկաթուղային տրանսպորտով անտոմս երթևեկելու դեպքում տուգանքի նշանակող մարմինը և կիրառվող տուգանքի չափերը։

2.Ընթացիկ վիճակը և խնդիրները

Գործող իրավական ակտերում նախագծով ներկայացված դրույթները կարգավորված չեն։

3.Կարգավորման նպատակը

Հայաստանի Հանրապետությունում ընդհանուր օգտագործման երկաթուղային տրանսպորտով ուղևորափոխադրումների ժամանակ անտոմս երթևեկելու դեպքում տուգանքները կիրառող մարմնի որոշումը, չափերի սահմանումը և անտոմս երթևեկելու կանխարգելումը։

4.Նախագծի մշակման գործընթացում ներգրավված ինստիտուտները և անձիք

Նախագիծը մշակվել է ՀՀ տարածքային կառավարման և ենթակառուցվածքների նախարարության կողմից:

5.Ակնկալվող արդյունքը

Հայաստանի Հանրապետության ընդհանուր օգտագործման երկաթուղային տրանսպորտի բնագավառում անտոմս երթևեկելու կանխարգելումը և վարչական տուգանքի նշանակումը:

6.Տեղեկատվություն լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին

Նախագծի ընդունումը պետական բյուջեի փոփոխության չի հանգեցնում։

7.Նախագծի ընդունման առնչությամբ ընդունվելիք այլ իրավական ակտերի նախագծերը կամ դրանց ընդունման անհրաժեշտության բացակայության մասին

Նախագծի ընդունումը ենթադրում է ՀՀ գործադիր մարմնի ճյուղային ոլորտում համապատասխան ենթաօրենսդրական ակտերի մշակում։

8.Կապը ռազմավարական փաստաթղթերի հետ

Նախագծի ընդունումը բխում է Տարածքային զարգացման և շրջակա միջավայրի նախարարական կոմիտեի 2025 թվականի մարտի 24-ի նիստի թիվ ԿԱ/90-2025 արձանագրության 2.1-ի կետի պահանջի կատարման անհրաժեշտությունից։