Հիշել նախագիծը

«Բյուջետային ծրագրերի գնահատման կարգը հաստատելու մասին» ՀՀ կառավարության որոշման նախագիծ

ՀԻՄՆԱՎՈՐՈՒՄ

«ԲՅՈՒՋԵՏԱՅԻՆ ԾՐԱԳՐԵՐԻ ԳՆԱՀԱՏՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ  ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

 

  1. Իրավական ակտի ընդունման անհրաժեշտությունը (նպատակը)

«Բյուջետային ծրագրերի գնահատման կարգը հաստատելու մասին» Հայաստանի Հանրապետության  կառավարության որոշման նախագծով (այսուհետ՝ Նախագիծ) առաջարկվում է իրավական հիմքեր ձևավորել բյուջետային ծրագրերի գնահատման կառուցակարգերի ներդրման համար: Նախագծի ընդունման անհրաժեշտությունը բխում է ՀՀ կառավարության 2019 թվականի նոյեմբերի 28-ի N 1716-Լ որոշմամբ սահմանված՝ Պետական ֆինանսների կառավարման համակարգի 2019-2023 թվականների բարեփոխումների ռազմավարության և Պետական ֆինանսների կառավարման համակարգի բարեփոխումների 2019-2023 թվականներին իրականացվելիք գործողությունների ծրագրի, ինչպես նաև ՀՀ կառավարության 2021 թվականի նոյեմբերի 18-ի N 1902-Լ որոշմամբ հաստատված՝ ՀՀ կառավարության 2021-2026 թվականների գործունեության միջոցառումների ծրագրի պահանջներից: Այդ նպատակով 2024 թվականի մայիսի 2-ին Ազգային Ժողովում առաջին ընթերցմամբ ընդունվել է «Հայաստանի Հանրապետության բյուջետային համակարգի մասին» օրենքում փոփոխություններ և լրացումներ կատարելու մասին» Հայաստանի Հանրապետության օրենքը:

  1. 2. Ընթացիկ իրավիճակը և խնդիրները

Նախագծի ընդունման հիմքերը բխում են դեռևս Հայաստանի Հանրապետության կառավարության 2015 թվականի օգոստոսի 13-ի նիստի N 38 արձանագրային որոշման հավելվածի 54-րդ կետից, համաձայն որի բյուջետային համակարգում ծրագրային բյուջետավորման սկզբունքների ներմուծմամբ հիմնական ուշադրությունը կենտրոնացվում է բյուջետային ծրագրերի և դրանց արդյունքների վրա` առաջ բերելով այդ ծրագրերի գնահատման կանոնավոր գործընթացի ներդրման անհրաժեշտություն: Սակայն նշված կանոնավոր գործընթացները դեռևս ներդրված չեն, ինչը սահմանափակում է բյուջետային ծրագրերի ազդեցությունը և արդյունքները գնահատելու ՀՀ կառավարության հնարավորությունը:

ՀՀ կառավարության 2019 թվականի նոյեմբերի 28-ի N 1716-Լ որոշմամբ սահմանվել են «Պետական ֆինանսների կառավարման համակարգի 2019-2023 թվականների   բարեփոխումների ռազմավարությունը» և «Պետական ֆինանսների կառավարման համակարգի բարեփոխումների 2019-2023 թվականներին իրականացվելիք գործողությունների ծրագիրը», որի «Ծրագրային բյուջետավորում և ռազմավարական պլանավորում» բաղադրիչով նախատեսվել էր ներդնել բյուջետային ծրագրերի գնահատ­ման կանոնավոր գործընթաց և մշակել բյուջետային ծրագրերի գնահատման ուղեցույցներ: Իսկ ՀՀ կառավարության 2021 թվականի նոյեմբերի 18-ի N 1902-Լ որոշմամբ հաստատված՝ ՀՀ կառավարության 2021-2026 թվականների գործունեության միջոցառումների ծրագրի «2. Բյուջետային ծրագրերի գնահատման գործընթացի ներդրում» նպատակով սահմանվել է «2.5. Գնահատման համակարգի ներդրում» միջոցառումը:

Այդ նպատակով մշակվել և ՀՀ վարչապետի 2022 թվականի ապրիլի 28-ի N 446-Ա որոշմամբ հաստատվել է «Պետական բյուջետային ծրագրերի գնահատման համակարգի ներդրման հայեցակարգը», որում տրվում է գնահատման համակարգի և գնահատման գործընթացների ընդհանուր նկարագիրը, սահմանվում են համակարգի ինստիտուցիոնալ կառուցվածքը, կառավարման մոդելը և դերակատարությունների բաշխումը և այլն: Մշակվել է նաև բյուջետային ծրագրերի գնահատման մեթոդական ուղեցույցը:

Թեև առկա է հաստատված հայեցակարգ, սակայն օրենսդրական մակարդակով բյուջետային ծրագրերի գնահատում իրականացնելու համար անհրաժեշտ է սահմանել լիազորությունների կարգ, ըստ որի կառավարությունը իրավասու կլինի իրականացնել բյուջետային ծրագրերի գնահատման գործառույթները: Դրան է միտված 2024 թվականի մայիսի 2-ին Ազգային Ժողովում առաջին ընթերցմամբ ընդունված «Հայաստանի Հանրապետության բյուջետային համակարգի մասին» օրենքում փոփոխություններ և լրացումներ կատարելու մասին» Հայաստանի Հանրապետության օրենքը, որի 3-րդ հոդվածի 2-րդ մասի համաձայն Կառավարությունը սահմանում է պետական բյուջետային ծրագրերի գնահատման իրականացման կարգը: Նախագծով սահմանվում են գնահատման գործընթացի մասնակիցները, մասնավորապես ՀՀ ֆինանսների նախարարության կառուցվածքում առաջարկվում է ստեղծել Գնահատման ստորաբաժանում:

  1. Տվյալ բնագավառում իրականացվող քաղաքականությունը

Նախագծի ընդունմամբ տվյալ բնագավառում ներկայումս իրականացվող քաղաքականու­թյան փոփոխություն չի նախատեսվում:

  1. Կարգավորման նպատակը և բնույթը

Ծրագրերի արդյունավետության և արդյունքայնության բարձրացման նպատակով նախատեսվում է ներդնել  բյուջետային ծրագրերի գնահատման կանոնավոր գործընթաց, որի բացակայությունը սահմանափակում է բյուջետային ծրագրերի արդյունքները և ազդեցութ­յունը գնահատելու, բյուջետային ծրագրերը վերանայելու և բարելավելու Կառավարության հնարավորությունները:

  1. Կապը ռազմավարական փաստաթղթերի հետ

Նախագիծը բխում է ՀՀ կառավարության 2019 թվականի նոյեմբերի 28-ի N 1716-Լ որոշմամբ սահմանված` Պետական ֆինանսների կառավարման համակարգի 2019-2023 թվականների   բարեփոխումների ռազմավարության և Պետական ֆինանսների կառավարման համակարգի բարեփոխումների 2019-2023 թվականներին իրականացվելիք գործողությունների ծրագրի «Ծրագրային բյուջետավորում և ռազմավարական պլանավորում» բաղադրիչից և ՀՀ կառա­վա­րության 2021 թվա­կանի նոյեմ­բերի 18-ի N 1902-Լ որոշմամբ հաստատված ՀՀ կառա­վա­րու­թյան 2021-2026 թվականների գործունեության միջոցառումների ծրագրի «2. Բյուջետային ծրագրերի գնահատման գործընթացի ներդրում» նպատակի «2.5. Գնահատման համակարգի ներդրում» միջոցառումից:

  1. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է ՀՀ ֆինանսների նախարարության կողմից:

  1. Ակնկալվող արդյունքը

Նախագծով առաջարկվում է իրավական հիմքեր ձևավորել բյուջետային ծրագրերի գնահատման կառուցակարգերի, ինչպես նաև բյուջետային ծրագրերի ազդեցության և արդյունավետության պարբերական և կանոնավոր գնահատման գործընթացի ներդրման համար, որը կնպաստի բյուջետային ծրագրերի արդյունավետության բարձրացմանը:

  1. Իրավական ակտի ընդունման կապակցությամբ այլ նորմատիվ իրավական ակտերի ընդունման անհրաժեշտությունը

Նախագծի ընդունման կապակցությամբ նախատեսվում է ոլորտը կարգավորող այլ իրավական ակտերի (ուղեցույց, մեթոդական ձեռնարկ) ընդունում:

  1. Նախագծի ընդունման կապակցությամբ պետական բյուջեում կամ տեղական ինքնակառավարման մարմինների բյուջեներում ծախսերի և եկամուտների էական ավելացումների կամ նվազեցումների մասին

Նախագծի ընդունման կապակցությամբ պետական բյուջեում կամ տեղական ինքնակառավարման մարմինների բյուջեներում ծախսերի և եկամուտների էական ավելացում կամ նվազեցում չի նախատեսվում:

  • Քննարկվել է

    06.12.2024 - 22.12.2024

  • Տեսակ

    Որոշում

  • Ոլորտ

    Ֆինանսական, Հանրային կառավարում

Ուղարկել նամակ նախագծի հեղինակին

Ձեր ուղարկած առաջարկը կտեղադրվի կայքում 10 աշխ. օրվա ընթացքում

Չեղարկել

Դիտումներ` 625

Տպել

Առաջարկներ`

Արտակ Պողոսյան

07.12.2024

Հարգելի գործընկերներ, Ողջունելի Ձեր նախաձեռնության մշակված և հանրային կարծիքի ներկայացված ՀՀ-ի կարևորագույն գործընթացի գնահատման փաստաթուղթը։ Միևնույն ժամանակ առաջարկում եմ ներկայացված նախագիծը լրամշակել և համապատասխանեցնել այն իր վերնագրին համապատասխան։ Մասնավորապես․ - Առաջարկվող նախագիծը նախատեսված է բյուջետային ծրագրերի գնահատման ԿԱՐԳԸ հաստատելու մասին։ Սակայն, նախագծով չեն ներկայացվել որևէ գնահատման չափորոշիչ։ Այն զուրկ է թե մինչ-ծրագրային, թե հետ-ծրագրային չափորոշիչներից։ Իսկ նախագծով նշված աշխատակարգը, որը պետք է հաստատվի Վարչապետի որոշմամբ չի կարող հաստատել և նկարագրել բացակայող գնահատման չափորոշիչները։ - Ներկայացված նախագիծը տպավորություն է ձևավորում, որ ՀՀ ֆինանսների նախարարությունը մշակել է ավելի շուտ հիմնավորում կառուցվածքային փոփոխություն կատարելու, հաստիքային միավորների քանակի ավելացման նպատակով, ինչպես նաև նոր խորհրդակցական մարմին ձևավորման համար։ - Բացի այդ, հաշվի առնելով պետական և համայնքային բյուջեի և իրականացվող ծրագրերի հանրային լինելու գաղափարից՝ առաջարկվող խորհրդում բացակայում եմ հանրային և մասնագիտական հասարակական կառույցների ներգրավման հնարավորությունը։ Խստորեն առաջարկում եմ առնվազն 40 տոկոս մասնակցության համամասնությամբ։

Տեսնել ավելին