««ՊԵՏԱԿԱՆ ՍԱՀՄԱՆԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՕՐԵՆՔԻ ՆԱԽԱԳԻԾ

ՀԻՄՆԱՎՈՐՈՒՄ

««ՊԵՏԱԿԱՆ ՍԱՀՄԱՆԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՕՐԵՆՔԻ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ

1. Ընթացիկ իրավիճակը և իրավական ակտի ընդունման անհրաժեշտությունը

Ներկայումս Հայաստանի Հանրապետության սահմանային էլեկտրոնային կառավարման տեղեկատվական համակարգի (այսուհետ նաև՝ ՍԷԿՏ համակարգ) հետ կապված հարաբերությունները կարգավորվում են ՀՀ կառավարության՝ 2006 թվականի հունիսի 22-ի «Հայաստանի Հանրապետության սահմանային էլեկտրոնային կառավարման տեղեկատվական համակարգ ստեղծելու, դրա շահագործման կարգը և համակարգից օգտվողների ցանկը սահմանելու մասին» N 884-Ն որոշմամբ: Այսինքն՝ համակարգի էությունը, դրա հետ կապված սկզբունքային կարգավորումներն օրենքի մակարդակում ամրագրված չեն: Ավելին՝ ՀՀ կառավարության՝ վերը նշված որոշման ընդունման համար օրենքով լիազորող նորմ սահմանված չէ:

Մինչդեռ հաշվի առնելով ՍԷԿՏ համակարգի կարևոր նշանակությունը՝ դրա վերաբերյալ հիմնարար կարգավորումներն անհրաժեշտ է սահմանել օրենքում՝ միևնույն ժամանակ հստակ սահմանագծելով ենթաօրենսդրական ակտով կարգավորման ենթակա հարցերի շրջանակը, ինչի ապահովմանը միտված է սույն նախագիծը:

2. Առաջարկվող կարգավորման բնույթը

Նախագծով առաջարկվում է «Պետական սահմանի մասին» օրենքում ամրագրել սահմանային վերահսկողության իրականացումն ապահովելու նպատակով անհրաժեշտ տվյալների միասնական հաշվառման հանգամանքը, սահմանել, որ նման հաշվառումն իրականացվում է ՍԷԿՏ համակարգի միջոցով, նախատեսել համակարգից օգտվելու և դրանում տեղեկություններ մուտքագրելու ընդհանուր պայմանները, ինչպես նաև հստակեցնել համակարգի վերաբերյալ ենթաօրենսդրական մակարդակում կարգավորման ենթակա հարցերի շրջանակն ու լիազորված մարմնի գործառույթները:

3. Ակնկալվող արդյունքը

Նախագծի ընդունմամբ կհստակեցվի ՍԷԿՏ համակարգի կարգավիճակը և հնարավորություն կստեղծվի առավել համակարգային կարգավորումների նախատեսման համար:

Միևնույն ժամանակ, սույն նախագծի ընդունումը չի ենթադրում լրացուցիչ ֆինանսական միջոցների անհրաժեշտություն և պետական բյուջեի եկամուտներում և ծախսերում էական փոփոխություններ:

4. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026 թթ. ծրագիր, ոլորտային և/կամ այլ ռազմավարություններ

Սույն նախագծի ընդունումն անմիջականորեն նախատեսված չէ ռազմավարական փաստաթղթերով: