Հիշել նախագիծը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՄԱՅԻՍԻ 26-Ի ԹԻՎ 825-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

 

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՄԱՅԻՍԻ 26-Ի ԹԻՎ 825-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

 

 

1. Ընթացիկ իրավիճակը և իրավական ակտի ընդունման անհրաժեշտությունը.

Հայաստանի Հանրապետության կառավարության 2006 թվականի մայիսի 26-ի թիվ 825-Ն որոշման մեջ 2019 թվականի օգոստոսի 15-ին և 2021 թվականի նոյեմբերի 4-ին կատարված փոփխությունների արդյունքում նշված որոշման Կոմնորոշիչ ցանկը խմբագրվել է, ինչի արդյունքում ցանկում առկա մի շարք ձևակերպումներ կարիք ունեն վերախմբագրվելու, քանի որ շարադրանքները, ընդհանուր առմամբ, չեն բխում դրա բովանդակային պահանջներից, և այդպիսիք կարող են պատճառ հանդիսանալ ոչ օբյեկտիվ և ցանկի ընդհանուր բովանդակային պահանջներին չհամապատասխանող եզրակացությունների կայացմանը՝ պարունակելով նաև կոռուպցիոն ռիսկեր։

Նշված բովանդակային պահանջը ենթադրում է, որ ցանկում արտացոլված բոլոր հիվանդությունները պետք է պարտադիր կարգով ներառեն հիվանդություններից առաջացած ծանր բարդությունների արտահայտման աստիճանի արտացոլումը, որը հանդիսանում է տվյալ փորձաքննությունների համար ամենաառանցքային լուծվող խնդիրը։

Մասնավորապես` Կողմնորոշիչ ցանկի 8-րդ գլխի 41-րդ կետը սահմանում է. «սրտի հիվանդություններ՝ արյան շրջանառության 3-րդ աստիճանի անբավարարությամբ՝ ըստ Ստրաժեսկոյի դասակարգման կամ քրոնիկ սրտային անբավարարությամբ IV ֆունկցիոնալ դասի ըստ NYHA դասակարգման», և հաջորդիվ նշված է՝ «42. «Միոկարդիտներ՝ այլ դասերում դասակարգված հիվանդությունների ժամանակ (141*)» և թվարկված են հիվանդությունները, սակայն նշված չէ այդ հիվանդությունների առաջացրած ծանրագույն բարդությունները՝ «ըստ Ստրաժեսկոյի դասակարգման կամ քրոնիկ սրտային անբավարարությամբ IV ֆունկցիոնալ դասի ըստ NYHA դասակարգման», այսինքն` 42-րդ կետը կարելի է մեկնաբանել որպես թվարկված ենթակետերով հիվանդություններ՝ առանց ծանրագույն բարդությունների։

Նույն բովանդակային բացթողումը առկա է նաև 43-րդ կետում` հիպերտոնիկ հիվանդության վերաբերյալ։ 47-րդ կետում նշված է. «Անոթային հիվանդություններ՝ սուր և քրոնիկ զարկերակային 4-րդ աստիճանի անբավարարությամբ, կլինիկական և պաթոմորֆոլոգիական պատկերով գանգրենոզնեկրոտիկ փոփոխություններով», սակայն հաջորդիվ՝ 48-րդ կետում 1-ից 7-րդ ենթակետերով թվարկված են անոթային հիվանդություններ, որոնց վերաբերյալ բացակայում են վերը նշված ծանրագույն բարդությունները՝ «սուր և քրոնիկ զարկերակային 4-րդ աստիճանի անբավարարությամբ, կլինիկական և պաթոմորմոֆոլոգիական պատկերով գանգրենոզնեկրոտիկ փոփոխություններով», այսինքն` 48-րդ կետը նույնպես կարելի է մեկնաբանել որպես թվարկված ենթակետերով հիվանդություններ՝ առանց ծանրագույն բարդությունների։

Նախագծով առաջարկվող մյուս փոփոխությունը տեխնիկական բնույթ է կրում, ինչի արդյունքում ուժը կորցրած ճանաչված ենթակետը ներառվել է համապատասխան գլխում:

 

2. Առաջարկվող կարգավորման բնույթը.

«Հայաստանի Հանրապետության կառավարության 2006 թվականի մայիսի 26-ի թիվ 825-Ն որոշման մեջ փոփոխություններ կատարելու մասին» Կառավարության որոշման նախագծով առաջարկվում է Հայաստանի Հանրապետության կառավարության 2006 թվականի մայիսի 26-ի թիվ 825-Ն որոշման Կողմնորոշիչ ցանկի 8-րդ գլուխը շարադրել նոր խմբագրությամբ, ինչի արդյունքում կսահմանվեն վկայակոչված կետերով թվարկված անոթային հիվանդությունների ծանրագույն բարդությունները:

Միաժամանակ, Կողմնորոշիչ ցանկի 10-րդ կետի 1-ին ենթակետի բովանդակությունը ներառվել է նույն ցանկի 8-րդ գլխում:

 

3. Նախագծի մշակման գործընթացում ներգրավված ինստիտուտները և անձինք.

Նախագծը մշակվել է Առողջապահության նախարարության «Դատաբժշկական գիտագործնական կենտրոն» ՊՈԱԿ-ի և իրավաբական վարչության կողմից:

 

4. Ակնկալվող արդյունքը.

Նախագծի ընդունմամբ ակնկալվում է Հայաստանի Հանրապետության կառավարության 2006 թվականի մայիսի 26-ի թիվ 825-Ն որոշման Կողմնորոշիչ ցանկի 8-րդ գլուխի կետերով թվարկված անոթային հիվանդությունների համար սահմանել դրանց ծանրագույն բարդությունները, որպիսիք ունեն էական փորձագիտական կարևորություն, ինչպես նաև շտկել բովանդակության մեջ տեղ գտած տեխնիկական բնույթի վրիպակը:

 

5. Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին.

Նախագծի ընդունմամբ լրացուցիչ ֆինանսական միջոցներ անհրաժեշտություն և պետական բյուջեի եկամուտներում և ծախսերում փոփոխություններ չեն առաջանա:

 

6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

Նախագիծն անուղղակիորեն բխում է Կառավարության 2021-2026 թվականների ծրագրի` «Բժշկական օգնության և սպասարկման որակի բարելավում» 21-րդ կետից:

  • Քննարկվել է

    11.04.2022 - 26.04.2022

  • Տեսակ

    Որոշում

  • Ոլորտ

    Առողջապահություն

  • Նախարարություն

    Առողջապահության նախարարություն

Ուղարկել նամակ նախագծի հեղինակին

Ձեր ուղարկած առաջարկը կտեղադրվի կայքում 10 աշխ. օրվա ընթացքում

Չեղարկել

Դիտումներ` 2909

Տպել