ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2021 ԹՎԱԿԱՆԻ ԱՊՐԻԼԻ 6-Ի N 347-Ա ՈՐՈՇՄԱՆ ՄԵՋ ԼՐԱՑՈՒՄ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2021 ԹՎԱԿԱՆԻ ԱՊՐԻԼԻ 6-Ի N 347-Ա ՈՐՈՇՄԱՆ ՄԵՋ ԼՐԱՑՈՒՄ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ՈՐՈՇՄԱՆ ՆԱԽԱԳԾԻ

1.    Իրավական ակտի անհրաժեշտությունը․

Վարչապետի որոշման նախագծի (այսուհետ` նախագիծ) ընդունումը պայմանավորված է Հայաստանի Հանրապետությունում ՄԻԱՎ/ՁԻԱՀ-ի, տուբերկուլոզի և մալարիայի դեմ ուղղված միջոցառումները համակարգող հանձնաժողովի (այսուհետ` ՄՀՀ) կազմում փոփոխություն կատարելու և այն համալրելու անհրաժեշտությամբ:

2.               Ընթացիկ իրավիճակը և առկա խնդիրները․

ՄՀՀ-ն խորհրդակցական մարմին է, որը ստեղծվել է ՄԻԱՎ/ՁԻԱՀ-ի կանխարգելման ծրագրային առաջարկը նախապատրաստելու, քննարկելու, ՁԻԱՀ-ի, տուբերկուլոզի և մալարիայի դեմ պայքարի Գլոբալ հիմնադրամին (այսուհետ` Գլոբալ հիմնադրամ) առաջարկությունները ներկայացնելու, ԳՀ-ի դրամաշնորհային ծրագրի իրականացմանը աջակցելու և այլ` իր կարգավիճակից բխող նպատակներով:

Ներկայացված նախագծով նախատեսվում է լրացում և փոփոխություններ կատարել Հայաստանի Հանրապետության վարչապետի 2021 թվականի ապրիլի 6-ի N347-Ա որոշմամբ ստեղծված ՄՀՀ-ի կազմում:

Հաշվի առնելով, որ նախատեսվում է Գլոբալ հիմնադրամի աջակցության աստիճանական կրճատում 2027 թվականից և 2030 թվականից՝ մշտական դադարեցում, ինչպես նաև հիմք ընդունելով նախկինում իրականացված ուսումնասիրության արդյունքները և դրանց հիման վրա ներկայացված առաջարկները, նախատեսվում է, որ դրամաշնորհային աջակցության ավարտից հետո ՄԻԱՎ/ՁԻԱՀ-ի և տուբերկուլոզի ոլորտներում իրականացվող գործառույթների շարունակականության ապահովման նպատակով ՄՀՀ-ն կներառվի ՀՀ ԱՆ «Ակադեմիկոս Ս․ Ավդալբեկյանի անվան Առողջապահության ազգային ինստիտուտ» ՓԲԸ-ի կազմում։ Հաշվի առնելով, որ Հայաստանի Հանրապետությունը գտնվում է անցումային փուլում, անհրաժեշտ է նախապես ապահովել Առողջապահության ազգային ինստիտուտի առավել ակտիվ ներգրավվածությունը ՄՀՀ գործունեության մեջ՝ անցումային գործընթացի սահուն իրականացումն ու հանձնաժողովի գործառույթների անխափան շարունակականությունն ապահովելու նպատակով։

Միաժամանակ, փոփոխությունը պայմանավորված է Հայաստանի Հանրապետությունում Միավորված ազգերի կազմակերպության ՄԻԱՎ/ՁԻԱՀ-ի հարցերի համատեղ ծրագրի (UNAIDS) գործունեության ավարտով։ Այդ համատեքստում առաջարկվում է վերանայել հանձնաժողովի կազմը՝ նվազեցնելով Միավորված ազգերի կազմակերպության ներկայացուցիչների թիվը երեքից մինչև երկու։

Հաջորդ փոփոխությամբ առաջարկվում է սահմանել, որ հասարակական կազմակերպությունները ՄՀՀ-ում ներկայացված լինեն բացառապես տվյալ հասարակական կազմակերպության անդամ հանդիսացող անձանց միջոցով։

ՀԿ անդամ հանդիսացող ներկայացուցիչներն ունեն կազմակերպության ներքին իրավական ակտերով ամրագրված կարգավիճակ, գործում են կազմակերպության կանոնադրության և ներքին կարգավորումների շրջանակներում, ունեն հստակ սահմանված իրավունքներ և պարտականություններ, մասնակցում են կազմակերպության որոշումների կայացման գործընթացներին։ Նշված կարգավորումը ապահովում է, որ ՄՀՀ-ում հանդես եկող ներկայացուցիչները պատշաճ կերպով լիազորված լինեն ներկայացնելու իրենց կազմակերպությունները։

Բացի այդ, առաջարկվող փոփոխությունը միտված է հասարակական կազմակերպությունների ՄՀՀ-ում մասնակցության կայունության և շարունակականության ապահովմանը, ինչը կնպաստի հանձնաժողովի գործունեության ինստիտուցիոնալ կայունությանը։ Սույն մոտեցումը համահունչ է Գլոբալ հիմնադրամի և ՄՀՀ-ի սկզբունքներին, որոնք կարևորում են հաշվետվողականությունը, թափանցիկությունը, ինչպես նաև շահագրգիռ կողմերի լիարժեք և իրավաչափ ներկայացվածությունը։

3.    Առաջարկվող կարգավորման բնույթը․

Ներկայացված նախագծով նախատեսվում է լրացում և փոփոխություն կատարել Հայաստանի Հանրապետության վարչապետի 2021 թվականի ապրիլի 6-ի N347-Ա որոշմամբ ստեղծված ՄՀՀ-ի կազմում: Մասնավորապես, նախատեսվում է`

- ՄՀՀ-ի կազմում ներառել Հայաստանի Հանրապետության առողջապահության նախարարության «Ակադեմիկոս Ս․ Ավդալբեկյանի անվան Առողջապահության ազգային ինստիտուտ» փակ բաժնետիրական ընկերություն մեկ ներկայացուցիչ,

- Միավորված ազգերի կազմակերպության ներկայացուցիչների թիվը սահմանել երկու` երեքի փոխարեն,

- Սահմանել, որ հասարակական կազմակերպությունների կողմից ՄՀՀ-ում առաջադրվող ներկայացուցիչները պետք է լինեն տվյալ կազմակերպության անդամները։

4.               Նախագծի մշակման գործընթացում ներգրավված ինստիտուտները և անձինք․

Նա­­խագիծը մշակվել է Հայաստանի Հանրապետության առողջապահության նախարարության և Հայաստանի Հանրապետությունում ՄԻԱՎ/ՁԻԱՀ-ի, տուբերկուլոզի և մալարիայի դեմ ուղղված միջոցառումները համակարգող հանձնաժողովի քարտուղարության կողմից:

5. Նախագծի ընդունմամբ Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունների մասին․

Նախագծի ընդունման կապակցությամբ լրացուցիչ ֆինանսական միջոցների անհրաժեշտություն չի առաջանում, պետական բյուջեի եկամուտներում և ծախսերում փոփոխություններ չեն նախատեսվում։

6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ․

Որոշման նախագիծը չի բխում որևէ ռազմավարական փաստաթղթից: