Հիմնվելով Փարիզյան համաձայնագրի շրջանակներում նախկին հանձնառությունների վրա՝ Հայաստանի ԱՍՀ 3․0-ն կարևոր առաջընթաց է երկրի կլիմայական քաղաքականության ուղղությամբ՝ 2026–2035 թթ․ համար սահմանելով հստակ, ամբողջ տնտեսությունը ներառող մեղմման և հարմարվողականության նպատակներ։ Փաստաթուղթը սահմանում է ՋԳ արտանետումների կրճատման ինչպես ոչ պայմանական (44%), այնպես էլ պայմանական թիրախներ (52%) 1990 թ․ մակարդակի համեմատությամբ՝ արտահայտելով Հայաստանի ռազմավարական անցումը ցածր արտանետումներով և կլիմայի փոփոխությանը դիմակայուն զարգացող մոդելի՝ հանձնառու հասնելու Փարիզյան համաձայնագրով սահմանված գլոբալ տաքացման 1.5°C-ից ցածր նպատակին։
Հանձնառությունը ներառում է մեղմման միջոցառումներ հիմնական ոլորտներում (ՋԳ արտանետումների և կլանման բոլոր աղբյուրներն ու կատեգորիաները ներառվել են՝ համաձայն ՋԳ արտանետումների ազգային ամենավերջին գույքագրման) և հարմարվողականության պլանավորում առաջնահերթ ոլորտներում։ Այս մոտեցմամբ ընդլայնվում է կլիմայական կառավարման համակարգը՝ ապահովելով ոլորտային համադրելիություն, փոխկապակցվածություն և հաշվետվողականության բարձրացում։
ԱՍՀ 3.0-ն առաջնահերթություն է տալիս հարմարվողականությանը՝ որպես ազգային հրամայական, և ըստ հնարավորության համատեղում է մեղմման բազմաթիվ առավելությունները։ Առանցքային ոլորտներում հարմարվողականության գործողությունները նպաստում են կլիմայական փոփոխությունների նկատմամբ Հայաստանի խոցելիության նվազեցմանը, ինչպես նաև հնարավորոթյուն տալիս անցնելու զարգացման ցածր արտանետումներով ուղու։
ԱՍՀ 3.0 թիրախները հիմնված են 1990 թ․ ՋԳ արտանետումների (26,014 Գգ CO₂ համարժեք) վրա՝ որպես ելակետային տարի։ 2035 թ․ համար կանխատեսվող արտանետումները գործունեության պահպանողական սցենարի դեպքում գնահատվում են մոտավորապես 24,740 Գգ CO₂ համարժեք, ինչը գրեթե հավասար է 1990 թ․ արտանետումների մակարդակին՝ 26,014 Գգ CO₂ համարժեք։ ԱՍՀ 3.0 իրականացման արդյունքում ակնկալվում է ՋԳ արտանետումները զսպել 11,404 Գգ CO₂ համարժեք մակարդակում կամ 1990 թվականի նկատմամբ կրճատել 44% - ով:
