««Հայաստանի Հանրապետության քննչական կոմիտեի մասին» օրենքում փոփոխություններ կատարելու մասին» օրենքի նախագիծ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՆՆՉԱԿԱՆ ԿՈՄԻՏԵԻ ՄԱՍԻՆ» ՕՐԵՆՔՈՒՄ  ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հոդված 1. «Հայաստանի Հանրապետության քննչական կոմիտեի մասին» 2014 թվականի մայիսի 19-ի ՀՕ-25-Ն օրենքի (այսուհետ՝ Օրենք) Օրենքի 18-րդ հոդվածում.

1) 7-րդ, 7.1-ին և 7.2-րդ մասերը շարադրել հետևյալ խմբագրությամբ.

«7. Հայտերի ընդունումից հետո հայտատուները հանձնում են բանավոր քննություն, որի անցկացման կարգը սահմանում է քննչական կոմիտեի նախագահը: Բանավոր քննության ընթացքում որակավորման հանձնաժողովն ստուգում է հայտատուի մասնագիտական պատրաստվածությունը, գործնական հմտությունները, քննչական կոմիտեում ինքնավար պաշտոն զբաղեցնող անձին վերաբերող հիմնարար իրավական ակտերին իրազեկվածությունը, անձնական որակները և արժանիքները (ինքնատիրապետում, վարվեցողություն, լսելու կարողություն, հաղորդակցման հմտություններ, վերլուծական կարողություններ և այլն), ինչպես նաև նրա ներկայացրած փաստաթղթերի համապատասխանությունն օրենքով նախատեսված պահանջներին:

7.1. Բանավոր քննության ավարտից հետո՝ երկու աշխատանքային օրվա ընթացքում, որակավորման հանձնաժողովը Կոռուպցիայի կանխարգելման հանձնաժողով է ներկայացնում բանավոր քննության արդյունքով դրական գնահատական ստացած հայտատուների բարեվարքության վերաբերյալ լրացված հարցաթերթիկները մեկամսյա ժամկետում խորհրդատվական եզրակացություն ստանալու նպատակով:

7.2. Կոռուպցիայի կանխարգելման հանձնաժողովի կողմից խորհրդատվական եզրակացությունն ստանալուց հետո  որակավորման հանձնաժողովի նախագահը խորհրդատվական եզրակացությունը երկու աշխատանքային օրվա ընթացքում տրամադրում է որակավորման հանձնաժողովի անդամներին։

Կոռուպցիայի կանխարգելման հանձնաժողովի կողմից խորհրդատվական եզրակացությունն ստանալուց հետո՝ 15 օրվա ընթացքում, հայտատուների հետ որակավորման հանձնաժողովը հարցազրույց է անցկացնում, եթե Կոռուպցիայի կանխարգելման հանձնաժողովը ներկայացրել է բարեվարքության վերաբերյալ բացասական բնույթի խորհրդատվական եզրակացություն կամ բարեվարքության վերաբերյալ խորհրդատվական դրական եզրակացությունը պարունակում է պարզաբանման ենթակա հարցեր:

Որակավորման հանձնաժողովի կողմից թեկնածուների ընտրության ընթացքում հանձնաժողովը հաշվի է առնում հայտատուի վերաբերյալ Կոռուպցիայի կանխարգելման հանձնաժողովի տրամադրած՝ բարեվարքության վերաբերյալ խորհրդատվական եզրակացությունը:».

2) 7.3-րդ մասն ուժը կորցրած ճանաչել:

Հոդված 2. Օրենքի 18.1-ին հոդվածի 1-ին մասում «դատախազի» բառից առաջ լրացնել «դատավորի,» բառը:

Հոդված 3. Սույն օրենքն ուժի մեջ է մտնում պաշտոնական հրապարակմանը հաջորդող օրվանից: