«ՄԱՔՍԱՅԻՆ ԿԱՐԳԱՎՈՐՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ»

Հայաստանի Հանրապետության Վարչապետի 07․04․2023թ․ N388-Ա որոշման հավելվածի 3-րդ կետով նախատեսված է «Եվրասիական տնտեսական միությունում փոխադրումների հետագծման համար նավիգացիոն կապարակնիքների կիրառման մասին» համաձայնագրով նախատեսված դեպքերում պատասխանատվության սահմանում «Մաքսային կարգավորման մասին» օրենքով։ Նշված համաձայնագրի 5-րդ հոդվածի 1-ին կետի 1-ին պարբերության համաձայն՝ ազգային օպերատորը ապահովում է Եվրասիական տնտեսական միության անդամ պետությունների տարածքներով փոխադրումների հետագծելիության կիրառման համար տեղեկատվական համակարգի աշխատանքը մշտական հիմունքներով՝ շաբաթական 7 օր և օրվա ընթացքում 24 ժամ։ Նույն կետի երկրորդ պարբերության համաձայն՝ նշված պարտավորության չկատարման կամ ոչ պատշաճ կատարման համար ազգային օպերատորը կրում է անդամ պետությունների օրենսդրությամբ սահմանված պատասխանատվություն, ինչը նախատեսվում է սահմանել նախագծով։