«Հայաստանի Հանրապետության կառավարության 2021 թվականի փետրվարի 25-ի N 252-Լ որոշման մեջ լրացումներ կատարելու մասին» ՀՀ կառավարության որոշման նախագիծ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2021 ԹՎԱԿԱՆԻ ՓԵՏՐՎԱՐԻ 25-Ի N 252-Լ ՈՐՈՇՄԱՆ ՄԵՋ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ

1.    Ընթացիկ իրավիճակը և իրավական ակտի ընդունման անհրաժեշտությունը

Հայաստանի Հանրապետության կառավարության 2026թ. հունվարի 8-ի N 16-L որոշմամբ հաստատվեց Հայաստանի տնտեսական և ինստիտուցիոնալ վերափոխման դոկտրինը: Նշյալ փաստաթղթի 36-րդ կետի 1-ին ենթակետով կրթությունը սահմանվում է որպես «ռազմավարությունների ռազմավարություն»՝ Հայաստանի նոր տնտեսական պարադիգմի հիմք հանդիսանալով: Մասնավորապես, կրթությունը մեկ ճյուղային քաղաքականություն լինելու փոխարեն դառնում է դոկտրինի առանցքը, որը կանխորոշում է տնտեսական զարգացման ծավալն ու բովանդակությունը, պետական կառավարման արդյունավետությունն ու ճկունությունը, ազգային ինքնության ամրությունը և պետականության հարատևության օրակարգի հաջողությունը:

Հաշվի առնելով վերոգրյալը՝ անհրաժեշտություն է առաջանում Հայաստանի Հանրապետության կառավարության 2021թ. փետրվարի 25-ի N 252-Լ որոշման մեջ իրականացնել համապատասխան լրացումներ՝ Կառավարության ռազմավարական կառավարման աշխատակարգի և դոկտրինի ներդաշնակեցումը ապահովելու նպատակով: 

Միաժամանակ, «Կրթության մասին» օրենքի 4-րդ հոդվածը սահմանում է, որ «Կրթության բնագավառում պետական քաղաքականության կազմակերպական հիմքը կրթության զարգացման պետական ծրագիրն է, որը Հայաստանի Հանրապետության կառավարության ներկայացմամբ հաստատում է Հայաստանի Հանրապետության Ազգային ժողովը»։

2.    Առաջարկվող կարգավորման բնույթը

Կառավարության աշխատակարգով նախատեսվող 6 ռազմավարությունների մշակման գործընթացի և Հայաստանի տնտեսական և ինստիտուցիոնալ վերափոխման դոկտրինի միջև ներդաշնակեցումն ապահովելու նպատակով առաջարկվում է ռազմավարությունների համար ներկայացվելիք մեթոդական պահանջներում սահմանել առանձին դրույթ, որով ռազմավարությունները կունենան վերաբերելի կրթական բաղադրիչ՝ համահունչ Ազգային ժողովի կողմից ընդունված Կրթության զարգացման պետական ծրագրին։ 

3.    Նախագծի մշակման գործընթացում ներգրավված ինստիտուտները

Նախագիծը մշակել է Վարչապետի աշխատակազմի կողմից։

4.    Ակնկալվող արդյունքը

Առաջարկվող փոփոխությամբ դոկտրինից բխող 6 ռազմավարություններից յուրաքանչյուրը կունենա կրթության, կարողությունների զարգացման բաղադրիչ՝ այդպիսով նպաստելով նաև ոլորտային, ճյուղային ռազմավարությունների ներդաշնակեցմանը Կրթության զարգացման պետական ծրագրի և դոկտրինով սահմանված հանձնառության հետ:

5.    Լրացուցիչ ֆինանսական միջոցների անհրաժեշտությունը, պետական և տեղական ինքնակառավարման մարմինների բյուջեներում եկամուտների և ծախսերի սպասվելիք փոփոխությունները.

Նախագծի ընդունմամբ լրացուցիչ ֆինանսական միջոցների անհրաժեշտություն չի առաջանում:

6.   Նախագծի ընդունման առնչությամբ ընդունվելիք այլ իրավական ակտերի կամ դրանց ընդունման անհրաժեշտության բացակայության մասին.

Նախագծի ընդունումն այլ իրավական ակտերի ընդունման անհրաժեշտություն չի առաջացնում:

7.    Կապը ռազմավարական փաստաթղթերի հետ

Սույն որոշման ընդունումը Հանրային կառավարման բարեփոխումների ռազմավարությամբ և ՀՀ կառավարության 2021-2026 թվականների գործունեության միջոցառումների ծրագրով ստանձնած հանձնառություն է, ինչպես նաև բխում է Հայաստանի տնտեսական և ինստիտուցիոնալ վերափոխման դոկտրինից: