«Հայաստանի Հանրապետության կառավարության 2021 թվականի նոյեմբերի 18-ի N 1902-Լ որոշման մեջ փոփոխություններ կատարելու մասին» ՀՀ կառավարության որոշման նախագիծ

Հ Ի Մ Ն Ա Վ Ո Ր Ո Ւ Մ

 «Հայաստանի Հանրապետության կառավարության 2021 թվականի նոյեմբերի 18-ի N 1902-Լ որոշման մեջ փոփոխություններ կատարելու մասին» ՀՀ կառավարության որոշման նախագծի ընդունման

          1. Անհրաժեշտությունը

«Հայաստանի Հանրապետության կառավարության 2021 թվականի նոյեմբերի 18-ի N 1902-Լ որոշման մեջ փոփոխություններ կատարելու մասին» ՀՀ կառավարության որոշման նախագծի ընդունումը բխում է ՀՀ կառավարության 2021 թվականի փետրվարի 25-ի N 252-Լ որոշմամբ հաստատված աշխատակարգի 8-րդ կետի պահանջից, համաձայն որի՝ համապատասխան մարմինները յուրաքանչյուր տարվա հոկտեմբերի 15-ից մինչև նոյեմբերի 1-ը կարող են առաջարկություններ ներկայացնել հաջորդ տարվա (տարիների) համար նախատեսված միջոցառումներում փոփոխություններ և լրացումներ կատարելու վերաբերյալ: 

2.  Ընթացիկ իրավիճակը և խնդիրները

ՀՀ կառավարության 2021 թվականի նոյեմբերի 18-ի N 1902-Լ որոշմամբ հաստատվել են ՀՀ կառավարության 2021-2026թթ. գործունեու­թյան միջոցառումների ծրագրի կատարումն ապահովող միջոցառումների ցանկը և դրանց հիմնավորումները: Ի կատարումն Հայաստանի Հանրապետության կառավարության 2021 թվականի փետրվարի 25-ի N 252-Լ որոշմամբ հաստատված աշխատակարգի 8-րդ կետի պահանջի՝ համապատասխան մարմիններից ստացվել են առաջարկություններ կառավարության գործունեության միջոցառումների ծրագրում փոփոխություններ և լրացումներ կատարելու նպատակով: Ընդ որում, առաջարկությունները ներկայացվել են՝ հաշվի առնելով 09.09.2025թ.-ի N 02/08.5/29321-2025  հանձնարարականի հետևյալ պահանջները.

1. ՀՀ կառավարության 2021թ. նոյեմբերի 18-ի N 1902-Լ որոշմամբ 2021-2025թթ. համար հաստատված միջոցառումների ժամկետների փոփոխություն չի կատարվելու.

2. Միջոցառումների ծրագրի վերանայումը պետք է բխի Կառավարության ծրագրից, «Հայաստանի վերափոխման ռազմավարություն 2050» ցուցանիշներից և արդեն իսկ ընդունված ոլորտային ռազմավարություններից.

3. Պետք է բացառել լիազորող նորմ չունեցող ՀՀ կառավարության և ՀՀ վարչապետի որոշումների նախագծերի նախատեսումը միջոցառումների ծրագրում.

4. Շարունակական միջոցառումների (օրինակ՝ 2021-2026թթ.) յուրաքանչյուր տարվա համար նախատեսել իրատեսական, որակական և քանակական արդյունքային ցուցանիշներ, որոնք հիմք կհանդիսանան հաշվետու ժամանակահատվածում միջոցառումների նպատակների չափման, առաջընթացի և արդյունավետության գնահատման համար.

5. Ֆինանսավորում պահանջող 2026թ. միջոցառումների մասով միջոցառումների ծրագիրը համապատասխանեցնել ՄԺԾԾ 2026-2028թթ․ բյուջետային ֆինանսավորման հայտին:              

3.  Կարգավորման նպատակը և բնույթը

Նախագծի կարգավորման նպատակն է հաստատել ՀՀ կառավարության 2021-2026թթ. գործունեու­թյան միջոցառումների ծրագրի կատարումն ապահովող միջոցառումների ցանկը և դրանց հիմնավորումները նոր խմբագրությամբ՝ համապատասխան մարմիններից ստացված առաջարկությունների հիման վրա:

4.  Նախագծի մշակման գործընթացում ներգրավված ինստիտուտները և անձիք

Նախագիծը մշակվել է համապատասխան մարմիններից ստացված առաջարկությունների հիման վրա՝ ՀՀ վարչապետի աշխատակազմի ծրագրերի փորձաքննության վարչության կողմից:

5.  Ակնկալվող արդյունքը

Նախագծի ընդունման արդյունքում կլրամշակվի ՀՀ կառավարության 2021-2026թթ. գործունեու­թյան միջոցառումների ծրագրի կատարումն ապահովող միջոցառումների ցանկը և դրանց հիմնավորումները: