ԱՇԽԱՏԱՆՔԻ ՀԻԳԻԵՆԱՅԻ ԾԱՌԱՅՈՒԹՅՈՒՆՆԵՐԻ ՆՎԱԶԱԳՈՒՅՆ ԾԱՎԱԼԸ ՍԱՀՄԱՆԵԼՈՒ ՄԱՍԻՆ

ՀԻՄՆԱՎՈՐՈՒՄ

«ԱՇԽԱՏԱՆՔԻ ՀԻԳԻԵՆԱՅԻ ԾԱՌԱՅՈՒԹՅՈՒՆՆԵՐԻ ՆՎԱԶԱԳՈՒՅՆ ԾԱՎԱԼԸ ՍԱՀՄԱՆԵԼՈՒ ՄԱՍԻՆ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը

ՀՀ աշխատանքային օրենսգրքի 243-րդ հոդվածով ամրագրված է.

«2.    Աշխատողների անվտանգությունը և առողջության պահպանությունը պարտավոր է ապահովել գործատուն: Հաշվի առնելով աշխատողների համար արտադրության կամ աշխատանքի վտանգավորության աստիճանը` գործատուն ներգրավում է աշխատողների անվտանգության ապահովման և առողջության պահպանման որակավորված ծառայություն կամ այդ գործառույթն իրականացնում է անձամբ:»:

«Հանրային առողջապահության մասին» Հայաստանի Հանրապետության 2024 թվականի փետրվարի 28-ի ՀՕ-114-Ն օրենքի 51-րդ հոդվածի 2-րդ մասով սահմանվել է բժշկական օգնության և սպասարկման ոչ բուժական բնույթի լիցենզավորման ենթակա գործունեության «աշխատանքի հիգիենայի ծառայությունների մատուցում» տեսակը, որը Հայաստանի Հանրապետության կառավարության 2024 թվականի դեկտեմբերի 19-ի N 2005-Ն որոշմամբ լրացվել է նաև Հայաստանի Հանրապետության կառավարության 2008 թվականի մարտի 27-ի N 276-Ն որոշման մեջ։

Վերոնշյալ հոդվածի 4-րդ մասով սահմանված է, որ աշխատանքի հիգիենայի ծառայությունների նվազագույն ծավալը սահմանում է Կառավարությունը։

Նախագծի ընդունումը պայմանավորված է վերը նշված իրավական ակտերի համատեքստում բժշկական օգնության և սպասարկման ոչ բուժական բնույթի լիցենզավորման ենթակա գործունեության «աշխատանքի հիգիենայի ծառայությունների մատուցում» տեսակի կիրարկման համար անհրաժեշտ աշխատանքի հիգիենայի ծառայությունների նվազագույն ծավալի սահմանման անհրաժեշտությամբ:

2. Առաջարկվող կարգավորումների նպատակը և բնույթը

Նախագծով առաջարկվում է հաստատել աշխատանքի հիգիենայի ծառայությունների նվազագույն ծավալը, մասնավորապես.

1)      աշխատողների աշխատանքի պայմանների ուսումնասիրություն.

2)     արտադրական միջավայրի և աշխատանքային գործընթացի ֆիզիկական, քիմիական և կենսաբանական գործոնների ուսումնասիրություն, հանրային առողջապահական նորմատիվներին համապատասխանության որոշում՝ լաբորատոր-գործիքային հետազոտությունների միջոցով.

3)     աշխատողների աշխատանքի ծանրության և լարվածության ուսումնասիրություն.

4)     աշխատողների աշխատանքի պայմանների գնահատում.

5)     աշխատողների մասնագիտական ռիսկերի գնահատում.

6)     առողջական վիճակի պարտադիր նախնական (աշխատանքի ընդունվելիս) և պարբերական բժշկական զննության ենթակա աշխատողների ընտրություն, բժշկական զննության կազմակերպում.

7)     աշխատողների առողջության պահպանմանն ուղղված միջոցառումների մշակում և ներկայացում:

3. Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխության մասին

Նախագծի ընդունման կապակցությամբ պետական կամ տեղական ինքնակառավարման մարմինների բյուջեներում ծախuերի և եկամուտների ավելացում կամ նվազեցում չի սպասվում:

 4. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է ԱՆ «Հիվանդությունների վերահսկման և կանխարգելման ազգային կենտրոն» պետական ոչ առևտրային կազմակերպության աշխատողների կողմից:

 5. Ակնկալվող արդյունքը

Նախագծի ընդունմամբ կապահովվի «Հանրային առողջապահության մասին» Հայաստանի Հանրապետության 2024 թվականի փետրվարի 28-ի ՀՕ-114-Ն օրենքի 51-րդ հոդվածի 4-րդ մասով ամրագրված պահանջի կատարումը:

Միաժամանակ, նախագծի ընդունումը կնպաստի արտադրական միջավայրում և աշխատանքային գործընթացում աշխատողների առողջության վրա հնարավոր ռիսկերի կառավարմանն ու մեղմմանը, ինչպես նաև մասնագիտական հիվանդությունների կանխարգելմանը:

 6․ Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ

Նախագիծը կապված է ՀՀ կառավարության 2021 թվականի նոյեմբերի 24-ի «Հայաստանի Հանրապետության կառավարության 2021-2026 թվականների գործունեության միջոցառումների ծրագիրը հաստատելու մասին» թիվ 1902-Լ որոշման 1-ին հավելվածի «Առողջապահության նախարարություն» բաժնի 19-րդ կետի 19.1-րդ ենթակետի հետ և բխում է «Հանրային առողջապահության մասին» Հայաստանի Հանրապետության 2024 թվականի փետրվարի 28-ի ՀՕ-114-Ն օրենքի 51-րդ հոդվածի 4-րդ մասից:

Նախագծի ընդունմամբ կապահովվի «Հանրային առողջապահության մասին» Հայաստանի Հանրապետության 2024 թվականի փետրվարի 28-ի ՀՕ-114-Ն օրենքի կիրարկումը։