««Նախադպրոցական կրթության մասին» օրենքում փոփոխություն կատարելու մասին» 2025 թվականի մարտի 5-ի N ՀՕ-57-Ն օրենքի ընդունմամբ նոր խմբագրությամբ են շարադրվել մի շարք հոդվածներ, այդ թվում՝ նախադպրոցական կրթության պետական կրթական չափորոշչի, նախադպրոցական կրթական ծրագրային բաղադրիչների վերաբերյալ դրույթները սահմանող:
Վերոնշյալ հասկացություններնն արտացոլված են ՀՀ կառավարության 2021 թվականի մայիսի 13-ի N 744-Ն որոշմամբ հաստատված «Նախադպրոցական կրթության պետական կրթական չափորոշչում» (այսուհետ՝ չափորոշիչ):
Միևնուն ժամանակ, չափորոշչի ներդրման նպատակով Կրթության, գիտության, մշակույթի և սպորտի նախարարի հրամաններով հաստատվել են նախադպրոցական կրթական հիմնական ծրագրեր (այսուհետ՝ ծրագրեր)՝ տարիքային բոլոր խմբերի համար:
Ծրագրերի աստիճանական ներդրումը հանրապետության համայնքային նախադպրոցական ուսումնական հաստատություններում (այսուհետ՝ հաստատություն) մեկնարկել է 2022-2023 ուսումնական տարում և ուղեկցվել է «Կրթության զարգացման և նորարարությունների ազգային կենտրոն» հիմնադրամի կողմից հաստատությունների մանկավարժական համակազմերի համար իրականացվող վերապատրաստման դասընթացներով և ուղեկցվել է պարբերական մշտադիտարկումներով:
Չափորոշչի ներդրման ընթացքում իրականացված մշտադիտարկումների և վերլուծության, ինչպես նաև նախադպրոցական ուսումնական հաստատությունների մանկավարժական համակազմերից ստացված դիտարկումների հիման վրա կատարվել են մի շարք բովանդակային փոփոխություններ, որոնք արտացոլված են ներկայացվող նախագծում:
Նախադպրոցական կրթության բովանդակային միասնական քաղաքականությունը ապահովելու նպատակով Կրթության, գիտության, մշակույթի և սպորտի նախարարությունը մշակել է սույն նախագիծը:
