ՊԵՏԱԿԱՆ ԲՅՈՒՋԵԻ ՄԻՋՈՑՆԵՐԻ ՀԱՇՎԻՆ ՇԻՆԱՐԱՐԱԿԱՆ ԱՇԽԱՏԱՆՔՆԵՐԻ ԳՆՄԱՆ ՀՆԱՐԱՎՈՐ ՄԱՍՆԱԿԻՑՆԵՐԻ ՆԱԽԱՈՐԱԿԱՎՈՐՄԱՆ ԸՆԹԱՑԱԿԱՐԳԸ ՍԱՀՄԱՆԵԼՈՒ ՄԱՍԻՆ

1.

Անհրաժեշտությունը

Նախագծի մշակումը պայմանավորված ՀՀ վարչապետի 25.08.2022թ. թիվ 977-Ա որոշմամբ հաստատված գնումների համակարգի զարգացման հայեցակարգից բխող միջոցառումների ծրագրի՝ 6.7 կետով սահմանված, ինչպես նաև «Հայաստանի Հանրապետության կառավարության 2021-2026 թվականների գործունեության միջոցառումների ծրագիրը հաստատելու մասին» ՀՀ կառավարության 18.11.2021թ. թիվ 1902-Լ որոշմամբ հաստատված՝ ՀՀ ֆինանսների նախարարությանը վերապահված 13.1 միջոցառման (գնման պայմանագրերի ոչ պատշաճ կատարման ռիսկերը նվազեցնելու նպատակով կառավարության որոշման նախագծի մշակում և ՀՀ կառավարության քննարկմանը ներկայացում) կատարումն ապահովելու անհրաժեշտությամբ:

2.

Ընթացիկ իրավիճակը և խնդիրները

 Գնումների համակարգի զարգացման հայեցակարգից բխող միջոցառումների ծրագրի՝ 6.7 կետով նախատեսված է «Գնման գործընթացի մասնակիցների վարկանշավորում» միջոցառումը, որից ակնկալվող արդյունքն է մասնակիցների վարկանիշավորման համակարգի ներդրումը՝ հիմնված ոչ հայեցողական չափորոշիչների վրա: Միաժամանակ նշված միջոցառումը ներառված է նաև ՀՀ կառավարության 2021-2026թ. գործունեության միջոցառումների ծրագրի վերոնշյալ կետում:

Նախագծով նախատեսվում է սահմանել, որ փորձաքննված նախագծանախահաշվային փաստաթղթերի հիման վրա իրականացված շինարարական աշխատանքներ կատարած բարեխիղճ մասնակիցները կներառվեն նախաորակավորված մասնակիցների ցուցակում, իսկ այդ ցուցակում ընգրկված մասնակիցների գնման ընթացակարգերին մասնակցության առանձնահատությունները կսահմանվեն  ՀՀ կառավարության առանձին որոշմամբ:

Մասնավորապես նախագծով նախատեսվում է սահմանել, որ բարեխիղճ մասնակիցները կներառվեն նշված ցուցակում եթե 2024թ. հունվարի 1-ից հետո ՀՀ ֆինանսների նախարարությունը պատվիրատուներից երեքից ավելի անգամ ստանա տվյալ և դրան նախորդող 2 տարիների ընթացքում այդ կապալառուների կողմից պայմանագրային պարտավորությունները պատշաճ կերպով կատարված լինելու վերաբերյալ  տեղեկատվություն:

3.

Տվյալ բնագավառում իրականացվող քաղաքականությունը

Գնումների համակարգի շարունակական թիրախային բարելավումներ

4.

Կարգավորման նպատակը և բնույթը

Գնումների համակարգի շարունակական թիրախային բարելավումներ

5.

Նախագծի մշակման գործընթացում ներգրավված ինստիտուտները և ան­ձիք

Նախագիծը մշակվել է ՀՀ ֆինանսների նախարարության կողմից:

6.

Ակնկալվող արդյունքը

Մասնակիցների վարկանիշավորման համակարգի ներդրում՝ հիմնված ոչ հայեցողական չափորոշիչների վրա:

7․

Տեղեկատվություն նախագծի ընդունմամբ այլ իրավական ակտերի ընդունման անհրաժեշտության կամ բացակայության մասին

Նախագծի ընդունմամբ անհրաժեշտություն կառաջանա նախաորակավորված հնարավոր մասնակիցների ցուցակում ընգրկված մասնակիցներին վարկանիշների շնորհման և այդ մասնակիցների՝  գնման ընթացակարգերին մասնակցության առանձնահատությունները սահմանել ՀՀ կառավարության առանձին որոշմամբ:

8․

Տեղեկատվություն՝ լրացուցիչ ֆինանսական միջոցների անհրաժեշտության և պետական կամ տեղական ինքնակառավարման մարմնի բյուջեի եկամուտներում և ծախսերում սպասվելիք փոփոխությունների մասին

Նախագծի ընդունմամբ պետական կամ տեղական ինքնակառավարման մարմնի բյուջեում ծախսերի և եկամուտների էական ավելացում կամ նվազեցում չի նախատեսվում:

9

Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ

Նախագիծը բխում է ՀՀ կառավարության 18.11.2021թ. թիվ 1902-Լ որոշման 1-ին հավելվածով հաստատված՝ Հայաստանի Հանրապետության կառավարության 2021-2026 թվականների գործունեության միջոցառումների ծրագրից: