ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՅՈՒՆԻՔԻ ԵՎ ՎԱՅՈՑ ՁՈՐԻ ՄԱՐԶԵՐՈՒՄ ԶԲՈՍԱՇՐՋՈՒԹՅԱՆ ԽԹԱՆՄԱՆ ՄԻՋՈՑԱՌՈՒՄԸ ՀԱՍՏԱՏԵԼՈՒ ՄԱՍԻՆ

ՀԻՄՆԱՎՈՐՈՒՄ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՅՈՒՆԻՔԻ ԵՎ ՎԱՅՈՑ ՁՈՐԻ ՄԱՐԶԵՐՈՒՄ ԶԲՈՍԱՇՐՋՈՒԹՅԱՆ ԽԹԱՆՄԱՆ ՄԻՋՈՑԱՌՈՒՄԸ ՀԱՍՏԱՏԵԼՈՒ ՄԱՍԻՆ

 1․Անհրաժեշտությունը

  Միջոցառման անհրաժեշտությունը պայմանավորված է ՀՀ Վայոց ձորի և Սյունիքի մարզերում զբոսաշրջային հոսքերի որոշակի նվազմամբ, ինչպես նաև ձմեռային սեզոնին ընդառաջ դեպի այդ մարզեր հոսքերի խթանման անհրաժեշտությամբ:

2․Ընթացիկ իրավիճակը և խնդիրները

Վայոց ձորի և Սյունիքի մարզերի հյուրանոցային տնտեսության օբյեկտներում առկա մահճակալային ֆոնդն այս պահին օգտագործվում է իր միջին սեզոնային ծանրաբեռնվածությունից պակաս չափով, սակայն տնտեսավարողները պատրաստ են ընդունելու ավելի մեծ թվով զբոսաշրջիկների: Միևնույն ժամանակ, կապված վերջին շրջանում Հայաստան տեղափոխված մեծ թվով նոր բիզնեսների ակտիվությամբ, երևանյան հյուրանոցային տնտեսության օբյեկտները գործում են մեծ ծանրաբեռնվածությամբ:

Նշված անհամաչափությունը որոշակիորեն մեղմելու, ինչպես նաև ձմեռային սեզոնին անցումը սահուն կազմակերպելու նպատակով անհրաժեշտություն է առաջացել որոշակիորեն ուղղորդելու հյուրանոցային ծառայություններից օգտվողներին:

 3․Տվյալ բնագավառում իրականացվող քաղաքականությունը

Տվյալ բնագավառում իրականացվող քաղաքականությունն ուղղված է ՀՀ տարածքային համաչափ զարգացմանը, զբոսաշրջային ուղղությունների լիարժեք օգտագործմանը:

 4․Առաջարկվող լուծումները

Նախագծով առաջարկվում է սահմանել, որ 2022 թվականի դեկտեմբերի 1-ից 2023 թվականի մայիսի 10-ը ընկած ժամանակահատվածում Սյունիքի և Վայոց ձորի մարզերում գործող հյուրանոցային տնտեսության օբյեկտում մատուցված ծառայություններից օգտվող տնտեսավարողներին տրամադրել փոխհատուցում` ծառայության գնի 60%-ի չափով, բայց ոչ ավելի քան 3,000,000.00 դրամը։

 5․Կարգավորման նպատակը և բնույթը

Նախագծով առաջարկվող կարգավորումները նպատակ ունեն հյուրանոցային ծառայությունների գնի փոխհատուցման միջոցով ակտիվացնել Սյունիքի և Վայոց ձորի մարզերի զբոսաշրջային հոսքերը:

6․Նախագիծը մշակող մարմինը

Նախագիծը մշակվել է ՀՀ էկոնոմիկայի նախարարության և ՎԶԵԲ-ի Հայաստանի ներդրումային խորհրդի կողմից:

7․Կապը ռազմավարական փաստաթղթերի հետ.

Նախագծի ընդունումը բխում է Կառավարության 2021-2026թթ. ծրագրից։

 8․ Ակնկալվող արդյունքը

Նախագծի ընդունմամբ նախատեսվում է ապահովել լրացուցիչ մոտ 2500 զբոսաշրջիկի այցելություն Սյունիքի և Վայոց ձորի մարզեր, որոնք կստեղծեն լրացուցիչ եկամուտներ ինչպես հյուրանոցային տնտեսության, այնպես էլ հանրային սննդի օբյեկտների և այլ տնտեսավարողների համար:

Նախագծի ընդունմամբ նախատեսվում է պետական բյուջեից ծախսել մոտավորապես 45,000,000․00 դրամ: Նշված գումարը հաշվարկվել է` հիմք ընդունելով զբոսաշրջային գործակալությունների և հյուրանոցային տնտեսության օբյեկտերի ներկայացուցիչների հետ քննարկման արդյունքները, ինչպես նաև նախորդ ժամանակաշրջանի վիճակագրական տվյալները, ենթադրվում է, որ մոտ 2500 հոգի (աշխատակից) կօգտվի հյուրանոցային ծառայություններից: Նախատեսվում է նաև, որ միջինում կիրականացվի 2 գիշերակաց` յուրաքանչյուր գիշերակացի համար վճարելով միջինում 20,000․00 դրամ, ընդ որում միջին գինը որոշվել է Սյունիքի և Վայոց ձորի մարզերում գործող հյուրանոցային համալիրների գների վերլուծության արդյունքում։

Ակնկալվում է, որ միջոցառման հիմնական շահառուները կլինեն առավել կայացած միջին և խոշոր ընկերությունները, որոնք, որպես կանոն, գործում են հարկման ընդհանուր համակարգում, ուստի փոխհատուցման չափը որոշելիս հաշվի է առնվել շահութահարկի և եկամտային հարկերի գծով պարտավորությունների կատարման արդյունքում փոխհատուցման փաստացի չափի էական նվազումը:  

Չնայած միջոցառման շահառու հանդիսացող բնակավայրերի կացության և հանրային սննդի ոլորտի հարկ վճարողների զգալի մասը, ըստ ՀՀ ՊԵԿ-ից ստացված տեղեկատվության, գործում է միկրոձեռնարկատիրության համակարգում` ենթադրվում է, որ շահառուներն առավելապես օգտվելու են  առավել բարձր կարգի ծառայություններ մատուցող հյուրանոցներից և հանրային սննդի օբյեկտներից, որոնք իրենց հերթին վճարելու են հարկեր (ԱԱՀ, շահութահարկ, շրջանառության հարկ)` նվազեցնելով պետական բյուջեից փաստացի իրականացվող ծախսերի մեծությունը: