«Պետական տուրքի մասին» ՀՀ օրենքում փոփոխություն կատարելու մասին» ՀՀ օրենքի նախագիծ

ՀԻՄՆԱՎՈՐՈՒՄ

 «ՊԵՏԱԿԱՆ ՏՈՒՐՔԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ ՀՀ ՕՐԵՆՔԻ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը

2017թ. դեկտեմբերին ՀՀ կառավարության կողմից հավանության արժանացած Հաշվապահական հաշվառման և աուդիտորական գործունեության ոլորտների բարեփոխումների հայեցակարգի, ինչպես նաև հայեցակարգի կիրարկումն ապահովող միջոցառման ցանկին հավանություն տալու մասին ՀՀ կառավարության արձանագրային որոշումների պահանջից բխում է «Հաշվապահական հաշվառման մասին», «Աուդիտորական գործունեության մասին» և «Հաշվապահական հաշվառման և աուդիտորական գործունեության կարգավորման և հանրային վերահսկողության գործառույթներ իրականացնող մարմինների մասին» ՀՀ օրենքների նախագծերի մշակումը, որոնցով աուդիտորական կազմակերպությունները պարտավոր կլինեն աուդիտորական կազմակերպությունների ռեեստրում գրանցվելու համար վճարել տարեկան անդամավճար համապատասխան հավատարմագրված մասնագիտական կառույցներին, որոնց անդամակցում են:

 2.Կարգավորման հարաբերությունների ներկա վիճակը և առկա խնդիրները.

Ներկայումս գործող կարգավորումների համաձայն՝ աուդիտորական կազմակերպությունները լիցենզավորման համար վճարում են տարեկան պետական տուրք:

3.Առկա խնդիրների առաջարկվող լուծումները.

Օրենքի նախագծի ընդունմամբ առաջարկվում է աուդիտորական կազմակերպությունների համար ներկայումս գործող պետական տուրքի վճարման պարտավորությունը հանել, այն փոխանցելով հավատարմագրված մասնագիտական կառույցներին՝ որպես անդամավճար:

 4.Կարգավորման առարկան.

Նախագծի կարգավորման առարկան աուդիտորական կազմակերպությունների կողմից լիցենզավորման նպատակով պետական տուրքի վճարման գործընթացն է:

5. Նախագծի մշակման գործընթացում ներգրավված ինստիտուտները և անձինք.

Նախագիծը մշակվել է ՀՀ ֆինանսների նախարարության աշխատակազմի կող­­մից:

6. Իրավական ակտի կիրառման դեպքում ակնկալվող արդյունքը.

Նախագծի ընդունմամբ աուդիտորական կազմակերպությունների կողմից պետական տուրքի վճարման պարտավորությունը կփոխարինվի հավատարմագրված մասնագիտական կառույցներին կատարվող անդամավճարով: