ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2019 ԹՎԱԿԱՆԻ ԴԵԿՏԵՄԲԵՐԻ 25-Ի №523-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2019 ԹՎԱԿԱՆԻ ԴԵԿՏԵՄԲԵՐԻ 25-Ի №523-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ  ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀՀ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ ՈՐՈՇՄԱՆ ՆԱԽԱԳԾԻ ՎԵՐԱԲԵՐՅԱԼ

1.    Ընթացիկ իրավիճակը, խնդիրները և անհրաժեշտությունը

 Նոր սպառողի կամ սպառողի վերակառուցվող սպառման համակարգը բաշխման ցանցին միացման հետ կապված գործընթացները սահմանված է ՀՀ հանրային ծառայությունները կարգավորող հանձնաժողովի 2019 թվականի դեկտեմբերի 25-ի №523-Ն որոշմամբ հաստատված Հայաստանի Հանրապետության էլեկտրաէներգետիկական շուկայի բաշխման ցանցային կանոններով։

Համաձայն նշված կանոնների  6(10) կՎ լարմամբ միացման, ինչպես նաև բազմաբնակարան շենքերի դեպքում սպառողի սպառման համակարգի միացումը բաշխման ցանցին իրականացվում է սպառման համակարգը էլեկտրական ցանցին միացման, էլեկտրական էներգիայի բաշխման և էլեկտրական էներգիայի երաշխավորված մատակարարման պայմանագրի և (կամ) կառուցվող բազմաբնակարան շենքի կամ կառուցապատվող թաղամասի սպառման համակարգն էլեկտրական ցանցին միացման պայմանագրի հիման վրա։

«Հայաստանի էլեկտրական ցանցեր» ՓԲԸ-ն դիմել է ՀՀ հանրային ծառայությունները կարգավորող հանձնաժողով՝ ներկայացնելով 6(10) կՎ լարմամբ սպառման համակարգերի և բազմաբնակարան շենքերի՝ բաշխման ցանցին միացման ընթացակարգի գործնականում առկա իրավիճակը։ Մասնավորապես, այն որ վերոնշյալ սպառողներին սնող ենթակառուցվածքները հիմնականում չեն մասնակցում այլ բաժանորդների համակարգերի սնուցմանը։

Հաշվի առնելով նշվածը՝ հանձնաժողովը մշակել է 6(10) կՎ լարմամբ սպառման համակարգերի և բազմաբնակարան շենքերի՝ բաշխման ցանցին միացման ընթացակարգի փոփոխության վերաբերյալ որոշման նախագիծ։

2.    Կարգավորման նպատակը և բնույթը

Որոշման նախագծով առաջարկվում է, հաշվի առնելով փաստացի իրավիճակը՝ 6(10) կՎ լարմամբ և բազմաբնակարան շենքերի սպառման համակարգերը բաշխման ցանցին միացնել «Հայաստանի էլեկտրական ցանցեր» ՓԲԸ-ի կողմից տրամադրվող տեխնիկական պայմանների միջոցով։ Միևնույն ժամանակ, առաջարկվում է հստակեցնել տեխնիկական պայմանների տրամադրաման համար անհրաժեշտ պայմանները, ինչպես նաև այն դեպքերը և պայմանները, երբ կառուցված համակարգերը ենթակա են հանձնման  «Հայաստանի էլեկտրական ցանցեր»         ՓԲԸ-ին։

3. Նախագծի մշակման գործընթացում ներգրավված ինստիտուտները և անձինք

Որոշման նախագիծը մշակվել է ՀՀ հանրային ծառայությունները կարգավորող հանձնաժողովի կողմից։

 4. Ակնկալվող արդյունքը

Որոշման ընդնունման արդյունքում, ակնկալվում է ապահովել մրցակցային միջավայր, որի հետևանքով նաև նոր հզորությունների կառուցման առավել արագ ժամկետներ և մատչելի գներ։ Վերոնշյալ սպառման համակարգերի միացումը բաշխման ցանցին առանց միացման վճարի գանձման իրականացումը կնվազեցնի նաև ազդեցությունը սակագնի վրա։